مينسكىدە (بەلارۋس) «ەلەكتروندى ۇكىمەتتى» دامىتۋ ماسەلەلەرى بويىنشا ساراپشىلار فورۋمىندا استاناداعى مەملەكەتتىك قىزمەت سالاسىنداعى وڭىرلىك حاب باسقارۋ كوميتەتى توراعاسى اليحان بايمەنوۆ مەملەكەتتىك قىزمەتتى مودەرنيزاتسيالاۋ مەن مەملەكەتتىك باسقارۋدى دامىتۋداعى عالامدىق جانە ايماقتىق ترەندتەرمەن تانىستىردى. فورۋمدى بەلارۋس رەسپۋبليكاسى ۇكىمەتى مەن بۇۇ دامۋ باعدارلاماسى ۇيىمداستىردى.
فورۋمعا بەلارۋس پرەزيدەنت اكىمشىلىگى وكىلدەرى مەن ۇكىمەت مۇشەلەرى, «ەلەكتروندى ۇكىمەت» سالاسىنداعى حالىقارالىق ساراپشىلار مەن اقپاراتتىق تەحنولوگيالار سالاسىنداعى جەتەكشى الەمدىك كومپانيالار ماماندارى قاتىستى.
اليحان بايمەنوۆ ءوز سوزىندە XIX عاسىرداعى زاڭگەرلەردىڭ ءبىرىنىڭ: «زاڭدار وسكەلەڭ ادامنىڭ كيىمى ءتارىزدى بولۋى كەرەك. ول ادامعا قىزمەت ەتەتىندەي ءپىشىلۋى ءتيىس – ءوسۋىن شەكتەمەۋى قاجەت» دەگەن ناقىلىن ەسكە سالدى. مەملەكەتتىك قىزمەتتى مودەرنيزاتسيالاۋدىڭ ءتورت ءوزارا بايلانىستى باعىتتارىنىڭ العاشقىسىن بايانداماشى «زاماناۋي, ۋاقىت تەزىنە جاۋاپ بەرەتىن, دامۋعا جاعداي جاسايتىن زاڭناما بولۋى ءتيىس» دەپ اتاپ كورسەتتى. «ەكىنشىسى - مەملەكەتتىڭ تيىمدىلىگى ءۇشىن عىلىم مەن تەحنولوگيالار جەتىستىكتەرىن پايدالانۋعا مۇمكىندىك بەرەتىن يننوۆاتسيالار. ءۇشىنشىسى - مەملەكەتتىك قىزمەتتى بۇگىنگى كۇن تالابىنا ساي, وزگەرىستەردى باسقارىپ, ولارعا يكەمدەلە الاتىن كادرلارمەن تولىقتىرۋ. ءتورتىنشىسى – ورتا (ينفراقۇرىلىم, مادەنيەت)», - دەدى اليحان بايمەنوۆ. سونىمەن بىرگە ول مەملەكەتتىك قىزمەتتى مودەرنيزاتسيالاۋ مەملەكەتتىك قىزمەت ساپاسىن كوتەرۋ ءۇشىن كەرەكتىگىن, بۇل ءوز كەزەگىندە مەملەكەتتىك قىزمەت ۇدەرىستەرىن ازاماتتار ءۇشىن قاراپايىمداتىپ, ولاردىڭ سەنىمىن ارتتىرۋعا اكەلۋى تيىستىگىن ايتتى.
فورۋم بارىسىندا مەملەكەتتىك باسقارۋ شەشىمدەرى تيىمدىلىگىن جەتىلدىرۋدە يننوۆاتسيالىق تەحنولوگيالاردى قولدانۋ, تسيفرلىق ترانسفورماتسيانىڭ ءار ءتۇرلى قوعامدىق قاتىناستار مەن ەكونوميكا سەكتورلارىنداعى ەرەكشەلىكتەرى ءسوز بولىپ, يزرايل مەن ەستونيا ۇلگىسىندە اقپاراتتىق جۇيەلەردى ەنگىزۋ تاجىريبەلەرى تالقىعا سالىندى. قاتىسۋشىلار مەملەكەتتىك باسقارۋ, الەۋمەتتىك سالا جانە ەكونوميكا سالالالارىندا زاماناۋي اقپاراتتىق تەحنولوگيالاردى قولدانۋدىڭ وزەكتى ماسەلەلەرى بويىنشا وي ءبولىستى.