كەشە ۇقك شەكارا قىزمەتى اكادەمياسىنىڭ ساپتىق الاڭىندا, قازاقستان رەسپۋبليكاسى پرەزيدەنتىنىڭ جارلىعىنا سايكەس, «ەل تاۋەلسىزدىگىنىڭ 25 جىلدىعىنا وراي «مەملەكەتتىك شەكارانىڭ» تاقىرىپتىق كۇنىن اتاپ وتۋگە ارنالعان مەرەكەلىك شارا ءوتتى.
مۇنداي جيىن وسى كۇنى ەلىمىزدىڭ ءار وڭىرىندە وتكىزىلدى. جيىن بارىسىندا ەگەمەندىكتىڭ ماڭىزدى شارتى بولىپ تابىلاتىن مەملەكەتتىك شەكارا ماسەلەسىنىڭ حالىقارالىق-قۇقىقتىق رەسىمدەلۋى جانە قازاقستان مەملەكەتتىلىگىنىڭ ماڭىزدى بەلگىسى ەكەندىگى اتاپ ءوتىلدى. تاۋەلسىزدىكتىڭ العاشقى كۇندەرىندە مەملەكەت باسشىسى نۇرسۇلتان نازارباەۆ: «ءبىز ءۇشىن قازاقستاننىڭ تاۋەلسىزدىگى مەن اۋماقتىق تۇتاستىعىن ساقتاۋدان ماڭىزدى مىندەت جوق», – دەگەن بولاتىن. سالتاناتتى ساپتا جۇرگەن ساربازدار كۇننىڭ ساقىلداعان ايازىنا قاراماي, بويلارىنداعى وتانعا دەگەن ءورشىل رۋحتى اڭعارتتى.
ەلباسىمىزدىڭ «تۇڭعىش رەت تاريحتا ءبىزدىڭ مەملەكەت حالىقارالىق دارەجەدە تانىلعان ناقتى شەكاراسىن بەلگىلەدى. 14 مىڭ شاقىرىم مەملەكەتتىك شەكارا مەجەلەندى», دەپ ايتقانى ەسىمىزدە. اۋقىمدى ىستەر ارقاسىندا اتا-بابالارىمىزدان مۇرا بولىپ قالعان جەرىمىز قايتا قالپىنا كەلتىرىلدى. ساربازداردى ەڭسەلەندىرگەن سونداي ەرەن ىستەردىڭ ايبارى سەكىلدەنەدى. كوك تۋدىڭ جەلبىرەگەنى... مەرەيىمىزدى كوتەرەتىنىنىڭ ءبىر ايعاعى دەپ بىلەمىز. ساربازدار الدىندا ءسوز سويلەگەن «زاستاۆا تارلاندارى» قاۋىمداستىعىنىڭ توراعاسى, وتستاۆكاداعى گەنەرال-مايور مارات ءماجيتوۆ وسى جونىندە ايتتى.
بۇل مەرەكەلىك جيىنعا شەكارا قىزمەتىنىڭ الماتى گارنيزوندارى بويىنشا اسكەري بولىمدەرى, «نۇر وتان» پارتياسى الماتى قالالىق بولىمشەسىنىڭ وكىلدەرى, اكادەميا ارداگەرلەرى مەن باسشىلىق قۇرامى قاتىستى.
ساپارباي پارمانقۇلوۆ,
«ەگەمەن قازاقستان»
الماتى