قوستاناي قالاسىندا وبلىستىق ىشكى ىستەر دەپارتامەنتىنىڭ ۇيىمداستىرۋىمەن ەرەكشە اكتسيا ءوتتى. ەلىمىز تاۋەلسىزدىگىن العان جىلى دۇنيەگە كەلگەن پوليتسەيلەر اۆتوشەرۋگە شىقتى. 25 جاستاعى پوليتسەيلەر قالانىڭ ورتالىق كوشەلەرىمەن 25 شاقىرىم جول ءجۇردى. شەرۋدىڭ سوڭىندا ولار مىنگەن اۆتوموبيلدەرمەن «25» سانىن بەينەلەپ توقتادى.
قوستاناي وبلىستىق ىشكى ىستەر دەپارتامەنتى جەرگىلىكتى پوليتسيا وكىلى ادىلبەك دانەكەنوۆتىڭ ايتۋىنشا, پوليتسەيلەر مۇنداي اكتسيانى جىل سايىن ايتۋلى مەرەكەلەردە وتكىزىپ وتىرادى.
– ەل تاۋەلسىزدىگىنە 25 جىل تولدى. قازىر ەلىمىز ايتۋلى مەرەكەنىڭ قارساڭىندا تۇر. ءبىز اۆتوشەرۋ ارقىلى قوستانايلىقتار مەن قالا قوناقتارىنىڭ نازارىن وسى ايتۋلى وقيعاعا اۋدارىپ, مەرەكەلىك رۋحتى كوتەرگىمىز كەلدى, – دەيدى ادىلبەك دانەكەنوۆ.
اۆتوكولوننانى تاۋەلسىزدىك قۇرداسىنىڭ ءبىرى, پوليتسيا سەرجانتى رۋسلان ايتەنوۆ باسقاردى. ول 1991 جىلى اۋليەكول اۋدانىندا تۋعان. ىشكى ىستەر ورگانىندا قىزمەتىن باستاعانىنا ءۇش جىل بولدى, تاڭداعان ماماندىعىن جاقسى كورەدى, ءوزىن ەلدىڭ پاتريوتىمىن دەپ سانايدى. رۋسلان ارىپتەستەرىمەن بىرگە اۆتوشەرۋگە مۇقيات دايىندالدى, ونىڭ ەشقانداي قاتەسىز وتۋىنە ۇلەس قوستى.
– حالقىمىز ادەتتە وتباسىندا ۇل تۋعاندا ەرەكشە قۋانعان. ال سول جىلى ەلىمىز تاۋەلسىزدىگىن الىپ, اق تۇيەنىڭ قارنى جارىلىپ جاتقاندا ومىرگە ءبىز كەلىپ, اتا-انا قۋانىشى ەسەلەنگەن ەكەن. ەندى سوعان لايىق بولۋىمىز كەرەك, – دەيدى رۋسلان. اۆتوشەرۋگە قاتىسقان پوليتسەيلەردىڭ بارلىعى دا بۇل شەرۋ ولار ءۇشىن تاريحي وقيعا بولىپ قالاتىنىن, ماقتانىش ەتەتىندىگىن ايتتى.
ءنازيرا جارىمبەتوۆا,
«ەگەمەن قازاقستان»
قوستاناي