كەشە پارلامەنت سەناتىنىڭ توراعاسى قايرات ءمامي فرانتسيانىڭ قازاقستانداعى ەلشىسى جان-شارل بەرتونەنى قابىلدادى, دەپ حابارلادى سەناتتىڭ باسپاسوز قىزمەتى.
كەزدەسۋ بارىسىندا قازاقستان مەن فرانتسيانىڭ ەكىجاقتى قاتىناستارىن, ونىڭ ىشىندە پارلامەنتارالىق دەڭگەيدەگى بايلانىستاردى ودان ءارى نىعايتۋ ءماسەلەلەرى تالقىلاندى. «فرانتسيا قازاقستاننىڭ ەۋروپاداعى ماڭىزدى ارىپتەستەرىنىڭ ءبىرى بولىپ تابىلادى», دەدى ق.ءمامي.
ەكى ەل اراسىنداعى ساياسي سىندارلى ۇنقاتىسۋدى اتاپ وتە كەلىپ, سەنات توراعاسى پرەزيدەنتتەر ن.نازارباەۆ پەن ن.ساركوزي اراسىندا قالىپتاسقان سەنىمدى جانە دوستىق بايلانىستاردى اتاپ ءوتتى. سونىمەن قاتار, قازاقستاننىڭ سىرتقى ساياسي باستامالارىنا قولداۋ بىلدىرگەنى ءۇشىن فرانتسيا باسشىلىعىنا ريزاشىلىعىن ءبىلدىردى.
پارلامەنت سەناتىندا فرانتسيا سەناتىمەن ىنتىماقتاستىق توبى جۇمىس ىستەيدى. فرانتسيا سەناتىندا ءبىزدىڭ ەلىمىزدىڭ ەجەلگى دوسى سەناتور ەمەري دە مونتەسكيۋ باسقاراتىن «فرانتسيا-قازاقستان» دوستىق توبى قۇرىلدى, دەدى ق.ءمامي. بۇدان كەيىن ءتوراعا ءوز ارىپتەسىنە, فرانتسيا سەناتىنىڭ توراعاسىنا سالەم جولدادى جانە وزىنە قولايلى ۋاقىتتا قازاقستانعا رەسمي ساپارمەن كەلۋگە شاقىردى.