بيىلعى وقۋ جىلىندا قازاق مەملەكەتتىك قىزدار پەداگوگيكالىق ۋنيۆەرسيتەتىنىڭ 5741 ستۋدەنتى پەداگوگيكالىق جانە وندىرىستىك تاجىريبەدەن وتپەك.
بۇل ءبىلىم ورداسى جىل سايىن سان مىڭداعان مۇعالىم اتتى ۇرپاق تاربيەشىلەرىنىڭ قاناتىن قاتايتىپ ۇشىرادى. ستۋدەنتتەردىڭ كيەلى ماماندىقتى يەلەنىپ, ناعىز كاسىپ يەسى بولماققا ۇيرەتۋدىڭ شارتتى جولى – پەداگوگيكالىق تاجىريبە بولسا كەرەك. بيىلعى وقۋ جىلىندا جالپى سانى 5741 ستۋدەنت پەداگوگيكالىق جانە وندىرىستىك تاجىريبەدەن وتەدى. جاقىندا وسى ورايدا ۋنيۆەرسيتەتتە «قازىرگى مۇعالىمدى دايارلاۋ جۇيەسىندە پەداگوگيكالىق پراكتيكانىڭ الاتىن ورنى» اتتى باعدار بەرۋ كونفەرەنتسياسى بولىپ ءوتتى. كونفەرەنتسيانى ۋنيۆەرسيتەت رەكتورى دينار نوكەتاەۆا ءسوز سويلەپ اشتى. ول جالپى ۇستاز ماماندىعىنىڭ قادىر-قاسيەتىن تىلگە تيەك ەتە وتىرىپ: «مەملەكەت باسشىسى ءوزىنىڭ جىل سايىنعى حالىققا جولداۋىندا جاستار ماسەلەسى مەن ولاردىڭ ءبىلىم الۋىنا دەن قويىپ وتىرادى. وندا ەلباسى: «ساپالى ءبىلىم مەن عىلىم بولعان كەزدە عانا قازاقستاننىڭ كەلەشەگى جارقىن. ەڭ الدىمەن جاستاردىڭ بىلىمگە جانە عىلىمعا پاراساتتىلىق كوزقاراسىن وزگەرتەتىن ۋاقىت جەتتى. بىزگە حالىقارالىق دەڭگەيدە باسەكەلەسۋگە قابىلەتتى جان-جاقتى ماماندار قاجەت», دەپ كورسەتكەن-ءدى. وسى تالاپقا ساي ستۋدەنتتەر الەمدىك دەڭگەيدە, الاڭسىز ءبىلىم الۋى ءۇشىن جاعداي جاسالىپ جاتىر. بۇگىنگى تاڭدا سىزدەر مەن بىزدەر وسكەلەڭ ۇرپاققا ساپالى ءبىلىم, سانالى تاربيە بەرۋ جولىندا ەڭبەك ەتۋىمىز كەرەك. ال ستۋدەنتتەر وسى جاۋاپكەرشىلىكتى مەملەكەتتىك پراكتيكادا بالا تاربيەسىنىڭ قىر-سىرىن, ءسويلەۋ جانە قارىم-قاتىناس جاساۋ مادەنيەتىن ۇيرەنىپ شىعۋى ءتيىس», – دەي وتىرىپ, بولاشاق مامان يەلەرىنە ساتتىلىك تىلەدى.
ءىس-شارا بارىسىندا پەداگوگ مامانىنا جان-جاقتى تاجىريبە بەرۋ ماقساتىندا دارىستەر وقىلىپ, پسيحولوگيالىق ترەنينگتەر, پانورامالىق ساباقتار مەن پسيحوپورترەت كورسەتىلدى.
گۇلزەينەپ سادىرقىزى.
الماتى.