قازاقستان ايەلدەرىنىڭ IV فورۋمىندا ءسويلەگەن سوزىندە مەملەكەت باسشىسى ن.ءا. نازارباەۆ: «وتباسىن نىعايتۋ ماسەلەسىندە ءايەلدىڭ ءرولى ەرەكشە, ويتكەنى, ولار يماندىلىق پەن ادامگەرشىلىكتى بارىنەن بيىك قويادى, ال وتباسى مەن بالانى – باستى قۇندىلىق دەپ باعالايدى. وسكەلەڭ ۇرپاقتىڭ بويىنا وسى قۇندىلىقتاردى جاس كەزىنەن ءسىڭىرۋىمىز كەرەك» دەگەن بولاتىن. بۇل – بەرىدەن ويلاسا, ۇل-قىزىنىڭ, ارىگە تەرەڭدەي ءتۇسسە, تۇتاس ءبىر قاۋىمنىڭ, حالىقتىڭ بولاشاعىنا نەمقۇرايدى قاراي المايتىن ءاربىر ازاماتتى تولعاندىراتىن ماسەلە. كوزگە وتتاي باسىلىپ, كوڭىلگە ورنىعىپ قالعان وسىنداي تەرەڭ ماعىنالى سوزدەردەن قات-قابات استار تاۋىپ, ونى ومىردە بولىپ جاتقان ءتۇرلى قۇبىلىستارعا قاراي وربىتۋگە بولادى.
ايتالىق, اتا-انانىڭ قاي-قايسىسى دا: «قايتسەك قىزدارىمىزدى اقىندار جىرلايتىنداي ارۋ ەتىپ وسىرۋگە بولادى؟» دەپ نەمەسە: «قايتسەك ۇلدارىمىز ماسىل ەمەس, اسىراۋشى ازامات بولىپ قالىپتاسادى؟» دەپ ويلايتىنى انىق. بالالار ەسەيە كەلە ول وي: «وتباسىنىڭ بەرەكەسىن قايتسە ساقتاۋعا بولادى؟», «وتباسىندا ەر – اقىلدى باسشىسى, ايەل – سەنىمدى قوسشىسى بولاتىن وتباسى مودەلىن قالاي جاڭعىرتۋعا بولادى؟» دەپ ءارى قاراي ءوربيدى.
مۇنداي مازاسىز ويلار بەكەردەن بەكەر كەلمەيدى, ارينە. قازىرگى كەزدە وتباسى پروبلەماسى – الەمدەگى ەڭ وزەكتى تاقىرىپتاردىڭ ءبىرى. قازاقستاندا دا الاڭداۋشىلىق تۋدىراتىن جاعدايلار بارشىلىق: اجىراسۋلار كوبەيىپ, كەزىندە تەڭىن تاپپاعان قىزدارىمىزدىڭ «ءوزىم ءۇشىن» دەپ بالا تۋى بەلەڭ الۋدا. بۇعان الدانعان قىزدار ومىرگە اكەلىپ, جەتىم بالالار ءۇيىنىڭ تۇرعىنىنا اينالاتىن ءسابيلەردى قوسساڭىز, نەكەسىز تۋعان بالالار سانى كەمىمەي تۇرعانىنا كوز جەتكىزەسىز.
وسىنىڭ ءبارى, تۇپتەپ كەلگەندە, وتباسى بەدەلىنىڭ تۇسۋىنەن تۋىندايدى. ەر ازاماتتىڭ شىن مانىندەگى وتاعاسى, ايەلدىڭ كيەسى بولۋى مىنا زاماننىڭ زىمىراعان ۇشقىرلىعىنا ىلەسە الماي, وتكەن عاسىرلاردا قالىپ قويعان سياقتى كورىنەدى. بۇعان بىرەۋدى جازعىرۋ قيىن – بۇعان جاھاندانعان زامان, وزگەرگەن قۇندىلىقتار دا ىقپال ەتكەنى ءسوزسىز. قازىرگى جاستارىمىزدىڭ باتىسقا ەلىكتەپ, الىستان ويلاماي, اق باتالى تۇرمىس قۇرماي-اق بىرگە تۇرىپ جاتاتىنى دا سونىڭ سالدارى.
شىن مانىسىندە ەركەك ءۇشىن دە, ايەل مەن بالا ءۇشىن دە ەڭ قولايلى جاعداي وتباسىندا عانا بولادى. نەكەدە تۇرعان ادامداردىڭ جاسى ۇزاعىراق بولاتىنى, جاراسىمدى وتباسىندا وسكەن بالالار جەتىستىككە تەز جەتەتىنى – بۇكىل الەمدە بەلگىلى بولىپ وتىرعان اكسيوما. قوعامدا سونى ناسيحاتتاۋ, قاجەت بولسا جارنامالاۋدىڭ جەتكىلىكسىزدىگى دە وتباسى قۇندىلىقتارىنىڭ قۇلدىراۋىنا اسەرىن تيگىزىپ وتىرعانى داۋسىز.
مىنە, سوندىقتان دا وتباسىنىڭ بەدەلىن ارتتىرۋ – قازاقستان رەسپۋبليكاسى پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ كۇن تارتىبىنەن ءتۇسپەيتىن وزەكتى ماسەلەلەرىنىڭ ءبىرى. جانە ونىڭ تۇجىرىمداماسى جاسالىپ, ىسكە اسىرۋدىڭ بۇرىننان بەلگىلى دە, تىڭنان ويلاپ تابىلعان, زامان تالابىنا لايىق ءارى ەل-جۇرتتى ەلەڭ ەتكىزەر امالدارى مەن ادىستەرى الدىن الا ويلاستىرىلادى. ءار ءىس-شارانىڭ جوسپارلانىپ, جان-جاقتى, مۇقيات دايىندالۋى دا ءبىزدىڭ قوعامىمىزدا وتباسى ماسەلەسىنىڭ قانشالىقتى وزەكتى ەكەندىگىن بىلدىرسە كەرەك.
الايدا, تىرشىلىك ءۇشىن اسا ماڭىزدى ساياسي جانە ەكونوميكالىق رەفورمالاردى دا, ەل ىشىندە كۇندەلىكتى تىرلىكتە بولىپ جاتقان جاڭا قۇبىلىس, تىڭ باستامالاردى دا كوپشىلىكتىڭ بىردەن جانە جاپپاي قابىلداي قويۋى نەعايبىل. ولاردىڭ ادامدار ساناسىندا ورنىعىپ, وزىمىزگە ءتان, حالقىمىزدىڭ ەرەكشەلىكتەرىن سىڭىرگەن ءتول ءىس-شاراعا اينالۋى ءۇشىن ءبىراز جىل ءوتىپ, ءبىرشاما تەر توگىلەتىنى بەلگىلى. سونداي ءىس-شارالاردىڭ ءبىرى رەتىندە ايەل زاتىنىڭ سۇلۋلىعىن پاش ەتۋدى كوزدەيتىن «قالا ارۋى», «وبلىس ارۋى», «قازاقستان ارۋى» سياقتى كونكۋرستاردى اتاۋعا بولادى.
ەلىمىزدە وتكىزىلگەن بۇل كونكۋرستاردى ءوزىمىزدىڭ ومىرىمىزگە, سالت-داستۇرلەرىمىزگە بەيىمدەۋ ونىڭ اتىن وزگەرتۋدەن باستالعانى كوڭىلگە قۋانىش ۇيالاتادى. كۇنى كەشەگى كەڭەستىك كەڭىستىكتەگى ورىس ءتىلدى مەملەكەتتەردى قوسا العاندا, بۇكىل الەمدە بۇل كونكۋرستار «miss» دەپ اتالسا, بىزدە سىنعا ءتۇسەتىن قىزدار «ارۋ» دەپ اسپەتتەلەتىن بولدى.
الەمدە ءبىر عاسىرعا جۋىق ۋاقىتتان بەرى وتكىزىلىپ كەلە جاتقان مۇنداي كونكۋرستاردىڭ ءبىزدىڭ حالىقتىڭ قابىلداۋىنا بارىنشا جاقىن ءتۇرى جيىرماسىنشى عاسىردىڭ 80-ءشى جىلدارى «قىز سىنى» جانە «جىگىت سۇلتانى» دەگەن تاقىرىپتارمەن باستاۋ العانى كوپشىلىكتىڭ ەسىندە بولار. الەمدىك كونكۋرستاردان ايىرماشىلىعى سول – بۇل كونكۋرستار ءتان سۇلۋلىعىن ەمەس, جان سۇلۋلىعىن پاش ەتۋگە باعىتتالعان ەدى. سوندىقتان دا ولاردا قىزدار مەن جىگىتتەردىڭ اقىلى مەن ءبىلىمىن, قارىمى مەن قابىلەتىن كورسەتۋگە ارنالعان تاپسىرمالارعا باسىمدىق بەرىلىپ, ارينە, قويىلاتىن سۇراقتار دا سول باعىتتا ويلاستىرىلدى.
العاشقى سىن وتكىزىلگەلى بەرى بۇل كونكۋرستاردىڭ شارتتارى دا, فورماتى دا سان وزگەرىپ, ۇنەمى جەتىلدىرىلۋ ۇستىندە. مىسالى, بەلگىلى ءبىر سالالار ءوز كونكۋرستارىن وتكىزىپ, سول سالانىڭ ەل ىشىندەگى نەمەسە شەتەلدەگى قىزمەتىن ناسيحاتتايتىن ارۋلاردى تاڭدادى («انا ءتىلى» ارۋى, «ميسس تۋريزم», «ميسس LG Electronik» جانە ت.ب.). ەلەكتروندىق داۋىس بەرۋ, sms حابارلامالار ارقىلى داۋىس بەرۋ ارقىلى الماتىدا «كوكتەم ارۋى», «قىس ارۋى», «كۇز ارۋى», «جاز ارۋى» سياقتى كونكۋرستار وتكىزىلگەنىنەن دە كوپشىلىك حاباردار بولار. مۇنىڭ ءبارى ءبىر جاعىنان قوعامنىڭ قىزداردى جان-جاقتى تاربيە بەرىپ وسىرۋگە, سونىڭ ىشىندە, ولاردىڭ كوز قۋانتار كوركىنە قوسا اقىلدى بولىپ, سول ارقىلى ءوزى قاتارلاس جاستارعا ونەگە كورسەتۋىن كوزدەسە, ەكىنشى جاعىنان الەمنىڭ مادەني ومىرىندە بولىپ جاتقان وقيعالاردان ەلىمىزدىڭ تىس قالماعانىن بىلدىرەدى.
سونىڭ ءبىر مىسالى رەتىندە بىزدە «سەزون» جۋرنالىنىڭ باستاماسىمەن جانە پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات ءجونىندەگى ۇلتتىق كوميسسيانىڭ ۇيىمداستىرۋىمەن وسىمەن ءۇشىنشى رەت وتكىزىلگەلى وتىرعان «ميسسيس قازاقستان» كونكۋرسىنىڭ الار ورنى ەرەكشە. بويجەتكەن قىزدار سايىسى ەمەس, جار ءسۇيىپ, تۇرمىس قۇرعان, بالا ءتاربيەسى مەن قوعامدىق قىزمەتىن قاتار الىپ جۇرگەن كەلىنشەكتەردىڭ سايىسى بولعان سوڭ, بۇل كونكۋرس اتاۋىنىڭ قازاقشا بالاماسىن تابۋدا ءالى ءبىراۋىزدى شەشىم جوق, سوندىقتان كوپشىلىككە ونىڭ ازىرشە «ميسسيس قازاقستان» دەپ اتالىپ جۇرگەنىن ايتا كەتكەن ءجون بولار.
جاسىراتىنى جوق, العاشىندا كوپشىلىك ىشىندە بۇل جاڭا كونكۋرستى جاتىرقاي قابىلداۋ انىق بايقالدى. پىكىرلەرىن اشىق ايتپاسا دا, «قىزداردىڭ ءجونى ءبىر باسقا, ايەلدەردى سايىستىرعاندارى نەسى؟» دەپ كۇڭكىلدەۋشىلەر بولعانى راس. جانە, ءبىر وكىنىشتىسى, وندايلار قازىر دە تابىلاتىن سياقتى. ونداي ادامدارمەن داۋلاسىپ جاتپاي-اق, كونكۋرس وتەتىن جەرگە بارىپ, ساحناعا شىققان ءار قاتىسۋشىنىڭ ءوزى جانە وتباسى تۋرالى ايتاتىن «تانىستىرۋ» نەمەسە «ۆيزيتنايا كارتوچكا» اتتى نومىرلەرىن كورۋدى ۇسىنۋ جەتكىلىكتى – ودان كەيىن ءسوزىنىڭ جاڭساق ەكەنىن تۇسىنەرى انىق.
ءبىز قاتىسۋشىلاردىڭ ءبىر دە بىرەۋىنىڭ «ءوزىم بولدىم, ءوزىم جەتتىم» دەگەنىن ەستىگەن جوقپىز. ءدۇيىم جۇرتتىڭ الدىندا تاتۋ-ءتاتتى تۇرمىسىن, بالا-شاعاسىنىڭ باقىتتى ءومىرىن, قول جەتكىزگەن تابىستارىن تىزبەكتەي ايتىپ, «وسىنىڭ ءبارى دە مەنىڭ جان جارىمنىڭ ارقاسىندا جۇزەگە استى», «ەگەر ەرىم قولداماعاندا, مەن مۇنداي بيىكتىكتى باعىندىرا الماس ەدىم», «قينالعان, قىسىلعان كەزىمدە كۇيەۋىم قاسىمنان تابىلادى», «اقىلشىم دا, كومەكشىم دە – سۇيگەن جارىم» دەگەن ءجۇرەكجاردى سىرلارىن اشقاندا ەرەكشە تولقيسىڭ. مۇنى وتباسىنداعى سىيلاستىقتىڭ, رۋحاني بىرلىكتىڭ كورسەتكىشى ەمەس دەپ كىم ايتا الادى؟
ونى ايتاسىز, بۇل – ەر ازاماتتى قادىرلەۋدىڭ, بەرەكە-بىرلىكتى ساقتاي ءبىلۋدىڭ مەكتەبى ەمەس پە؟ حالقىمىزدىڭ «ايەل – ءۇيدىڭ يەسى, ەر – ايەلدىڭ كيەسى» دەگەن ناقىل سوزىندە دە وسىنداي ماعىنا جاتىر. ءساتتى تۇرمىس قۇرىپ, بالا ءسۇيىپ, وتباسى, وشاق قاسىندا قالىپ قويماي, ەڭبەك جولىندا, ونەردە, بيزنەستە جارقىراپ جۇرگەن ايەلدەردىڭ مۇنداي سوزدەرى زالدا, تەلەديداردىڭ الدىندا «مەن دە سونداي بولسام» دەپ, دەمىن ىشىنە تارتىپ وتىرعان بويجەتكەندەرگە ۇلگى-ونەگە بولارى ءسوزسىز.
ەكىنشى جاعىنان مۇنداي كونكۋرسقا ايەلىنىڭ قاتىسۋى – ەر-ازاماتتىڭ بەدەلىن اسىرا تۇسەتىن فاكتورلاردىڭ ءبىرى دەر ەدىك. سەبەبى, حالىقتىڭ «جىبەكتى تۇتە الماعان ءجۇن ەتەدى, ارۋدى كۇتە الماعان كۇڭ ەتەدى» دەگەن ءسوزى بەكەر ايتىلماعان عوي. كەزىندە قولىن سوزىپ, جۇرەك سىرىن اشىپ جار ەتكەن ادامىن ءۇيلەنگەننەن كەيىن تاماعىن ءپىسىرىپ, كىر-قوڭىن جۋعىزاتىن قىزمەتكەر رەتىندە عانا كورەتىن جىگىتتەر دە بارى جاسىرىن ەمەس. مۇنداي جىگىتتەرگە ايەلدەرىنىڭ ەل الدىنا شىعىپ, كۇيەۋىنىڭ وتباسىنا, بالالارىنا دەگەن قامقورلىعى, ءوزىنىڭ وعان دەگەن شەكسىز ءسۇيىسپەنشىلىگى تۋرالى جۇرەكجاردى سوزدەردى ايتقانىن ەستۋ بۇيىرماعان. سولاي بولا تۇرىپ, «قىز كەزىندە ءبارى جاقسى…» دەپ كۇڭكىلدەيتىندەر دە سولاردىڭ اراسىنان شىعادى.
الەمدە تۇرمىس قۇرعان, بالالى-شاعالى ايەلدەردىڭ اراسىندا كونكۋرس وتكىزۋ ءداستۇرى بۇرىننان بار بولسا دا, ءبىزدىڭ ەلدە ول بيىل ءۇشىنشى رەت قانا وتكىزىلگەلى وتىرعانىن جوعارىدا ايتىپ كەتتىك. وسى از عانا ۋاقىت ءىشىندە مۇنداي كونكۋرستار – مىناۋ جاھاندىق ىقپالداسۋ زامانىندا ەرتە مە, كەش پە, ءبارىبىر بولاتىن بايقاۋ ەكەنىنە كوز جەتكەندەي. جىل وتكەن سايىن ونىڭ تارالۋ ايماعى كەڭىپ, قاتىسۋشىلاردىڭ سانى دا وسە تۇسۋدە. بۇرىن-سوڭدى ۇيىمداستىرىلىپ كورمەگەن سونى بايقاۋدى وتكىزۋگە العاشقى جىلى بەس وبلىس قانا تاۋەكەلدەسە, بيىل توعىز ءوڭىردىڭ كەربەز كەلىنشەكتەرى باق سىناستى, قاتىسۋشىلاردىڭ سانى ەكى ەسەگە جۋىق ءوستى. بۇل ەلىمىزدە ازاماتىن ارداقتاپ, بالالارىن ءتاربيەلەي ءجۇرىپ, ەڭبەكتە دە ءوز ورنىن تاپقان, ءسويتىپ ۇجىمىنىڭ, ءوز ورتاسىنىڭ سىي-قۇرمەتىنە بولەنگەن ايەلدەردىڭ كوبەيە ءتۇسكەنىن, ءسويتىپ, جوعارىداعى فورۋمدا ەلباسىمىز ايتقانداي: «وتباسى مەن قوعامدا ايەل قۇرمەتتەلەتىن بولسا, ەلىمىز ءۇشىن الاڭداماۋعا بولاتىن» زامانعا اياق باسقانىمىزدى كورسەتسە كەرەك.
رەسپۋبليكالىق العاشقى كونكۋرستىڭ جەڭىمپازى اتانعان دينارا ءساتجان 2009 جىلى ۆەتنامدا وتكەن الەمدىك كونكۋرسقا قاتىسىپ قايتتى. جۇلدەلى ورىنعا يە بولا الماسا دا, ءبىراز نارسەنى كورىپ, كوڭىلگە ءتۇيىپ قايتقان دينارا ەل ىشىندەگى كونكۋرستى ءوتكىزۋ فورماتى بويىنشا بىرقاتار قۇندى ۇسىنىستار جاسادى. ال بىلتىرعى جىلى كونكۋرستا جۇلدىزى جانعان گۇلناز الىمگەرەي بيىل اقش-تا وتەتىن كونكۋرستا قازاقستاندىق كەلىنشەكتەر اتىنان سايىسقا تۇسەدى.
«ميسسيس قازاقستان» كونكۋرسىنىڭ تاعى ءبىر ەرەكشەلىگى – ونىڭ قايىرىمدىلىق جاساۋعا ۇندەيتىنى. وتكەن ەكى كونكۋرس كەزىندە دا اجەپتاۋىر قاراجات جينالىپ, العاشقىسى سارىاعاشتا بولعان سۋ تاسقىنىنان زارداپ شەككەندەرگە, ال بىلتىرعى جىلى باتىس قازاقستان وبلىسىنداعى «يۆۋشكا» وكپە دەرتىنە شالدىققان بالالارعا ارنالعان ديسپانسەرگە قارجىلاي كومەك كورسەتىلدى. ودان باسقا, جەڭىمپازدار ءبىلىم بەرۋ ۇيىمدارىندا كەزدەسۋلەر وتكىزىپ, جەتكىنشەكتەرمەن كوزدەگەن مۇراتقا جەتۋ تاقىرىبىنا اڭگىمەلەر جۇرگىزدى, اتا-انا قامقورلىعىنسىز قالعان بالالارعا سىيلىقتار جاسادى.
مىنە, وسىنداي ەرەكشەلىكتەرى بار بولعاندىقتان دا جىل وتكەن سايىن قاناتىن كەڭگە جايا تۇسكەن رەسپۋبليكالىق «ميسسيس قازاقستان» كونكۋرسىنىڭ ەل تاۋەلسىزدىگىنىڭ 20 جىلدىعىنا ارنالعان مارەلى سايىسى بيىل, 14 قىركۇيەك كۇنى استانا قالاسىندا وتكىزىلمەكشى. العاشقى كونكۋرستاعى زياتكەرلىك سايىسىندا قازاقستاننىڭ الەمدىك قوعامداستىققا كىرىگۋى ءسوز بولسا, ەكىنشى كونكۋرستاعى تاپسىرمالاردا ەلىمىزدىڭ ەۋروپاداعى قاۋىپسىزدىك جانە ىنتىماقتاستىق ۇيىمىنا توراعالىق ەتۋى, ازيادا اڭگىمە ارقاۋىنا اينالدى. ال بيىلعى جىلى قانداي ماسەلەلەرگە كوڭىل بولىنەتىنى ءار قازاقستاندىققا ايتپاسا دا تۇسىنىكتى بولسا كەرەك.
جالپى العاندا كوپشىلىكتىڭ باسىن قوسىپ, كوڭىلىن كوتەرەتىن ءىس-شارا سياقتى كورىنگەنىمەن, ايەلدەر اراسىنداعى كونكۋرستىڭ كوتەرەتىن جۇگى جۇرت ويلاعاننان الدەقايدا سالماقتى: وندا ادال جار, جاقسى انا, وتباسىنىڭ ۇيىتقىسى بولۋدان باستاپ, قىزدارىمىزدى كەلەڭسىز جايلاردان قورعاۋ, قوعامدا بايقالعان ءوزىمىزدىڭ ءومىر ءسۇرۋ سالتىمىزعا جات قۇبىلىسقا قارسى تۇرا ءبىلۋ سياقتى ماسەلەلەرگە ايرىقشا ءمان بەرىلەدى. ايتالىق, كونكۋرستى ۇيىمداستىرۋشىلاردى كەيبىر قىزدارىمىزدىڭ ءدىلى بولەك ۇلتتارعا ەلىكتەپ, حيدجاب كيۋى تولعاندىرادى, سوندىقتان ونىڭ ۇلتىمىزعا, عاسىرلار بويعى سالت-داستۇرىمىزگە, مادەنيەتىمىزگە جات ەكەندىگىن ءتۇسىندىرۋدى پارىزىمىز دەپ سانايمىز.
ارينە, كونكۋرس بولعاندىقتان كەلبەتتى, ءمۇسىنى ءمىنسىز, ءجۇرىسى اسەم, كويلەگى ءساندى جان بىردەن كوزگە تۇسەتىنى راس, بىراق ايەلدەر اراسىنداعى سايىستا جوعارى بالل الۋ ءۇشىن قاتىسۋشىنىڭ زياتكەرلىك دەڭگەيى, بالالارىنىڭ جەتىستىكتەرى, قىسىلتاياڭ ساتتەردە جول تاباتىن تاپقىرلىعى, بەلسەندى ءومىر ءسۇرۋ پوزيتسياسى, تالعامى مەن شەشەن سويلەۋ ونەرى سياقتى قاسيەت-قابىلەتتەردىڭ دە ءرولى ۇلكەن بولارى ءسوزسىز.
مارەلى سايىسقا استانا مەن الماتى قالالارىندا جانە جەتى وبلىستا وتكەن وڭىرلىك كونكۋرستاردىڭ 20 جەڭىمپازى قاتىسپاقشى. ولاردىڭ ىشىندە سان ماماندىق يەسى, بىرنەشە ۇلتتىڭ وكىلى بار. باس جۇلدەگە يە بولىپ, الەمدىك سايىسقا ەلىمىز اتىنان قاتىسۋ ءۇشىن قىزۋ تارتىس بولارى انىق. كىمنىڭ باعى جاناتىنىن سايىس كورسەتەدى.
بىراق بىزدەر, ۇيىمداستىرۋشىلار ءۇشىن ماڭىزدىسى مىناۋ: اتا-انانىڭ الاقانىنا سالىپ الپەشتەپ وتىرعان قىزدارى ەمەس, وتباسىن قۇرىپ, ۇل-قىز ءوسىرىپ, جارىنا سۇيەۋ, اعايىنعا دەمەۋ بولا العان 25 پەن 50 جاس اراسىنداعى ايەلدەردىڭ ەلىمىزدىڭ ەڭ ۇلكەن كينو-كونتسەرت زالىنىڭ ساحناسىنان ءوزىنىڭ ءساتتى تۇرمىسى, جۇبايلىق ءومىردىڭ باقىتى تۋرالى ايتۋى – ءبىز ىزدەگەن ونەگەلى وتباسىن قۇرۋدىڭ ءبىر فورمۋلاسى بولا الارى انىق.
گۇلشارا ابدىقالىقوۆا, ەڭبەك جانە حالىقتى الەۋمەتتىك قورعاۋ ءمينيسترى, قازاقستان رەسپۋبليكاسى پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ ءتورايىمى.