وڭتۇستىك قازاقستان وبلىسىنىڭ اكىمى جانسەيىت تۇيمەباەۆ وڭىردەگى كينورەجيسسەرلارىمەن مەن انيماتسيا سالاسى ماماندارىمەن كەزدەسىپ, «ەرلىك» تولىقمەتراجدى ءفيلمىنىڭ پرەمەراسىنا قاتىستى, دەپ جازادى وقو اكىمىنىڭ ءباسپاسوز قىزمەتى.
جۇزدەسۋدە شىمكەنتتە كينو مەن انيماتسيا سالاسىنىڭ دامىتۋ جولدارى تالقىلانىپ, الداعى جوسپارلارى ايتىلدى.
ايتا كەتەيىك, ەلىمىزدە كينو يندۋسترياسى بويىنشا وڭتۇستىك قازاقستان ەكىنشى ورىندا بولسا, انيماتسيالىق فيلمدەر تۇسىرۋدەن كوش باسىندا.
بيىل قىركۇيەك ايىندا تۇركىستان قالاسىندا تۇركى الەمىنىڭ «التىن ساقا» انيماتسيالىق ءفيلمىنىڭ فەستيۆالى وتەدى. اتالعان فەستيۆالدە انيماتورلار تۇركى الەمىنە ورتاق ازىلدەرىمەن تانىلعان قوجا ناسىردىڭ وبرازى ۇسىنىلادى.
بۇگىندە وبلىستاعى جەكە كينوستۋديالاردىڭ 40-تان اسا كينو تۋىندىسى مەن 51 انيماتسيالىق ءفيلمى كورەرمەنگە جول تارتقان.
شىعارماشىلىق وكىلدەرىمەن بولعان وتىرىستا ءسوز باستاعان ءوڭىر باسشىسى سوڭعى جىلدارى ەلىمىزدە كينوعا جانە ونىڭ ساپاسىنا جاقسى كوڭىل ءبولىنىپ كەلە جاتقانىن ايتتى.
«شىمكەنت قالاسىندا كينو جانە انيماتسيا سالاسى قارقىندى دامىپ كەلەدى. وسى باعىتتاعى جۇمىستاردى جانداندىرۋ ماقساتىندا بيىل قوماقتى قارجى بولىنۋدە. ساپالى ءارى تاربيەلىك ماعىناسى جوعارى ستسەناري مەن كاسىبي رەجيسسەر ساپالى ءفيلمنىڭ كەپىلى. سوندىقتان ءبىز بىلىكتى كادرلار دايىنداۋ جۇمىستارىن قولعا الۋىمىز قاجەت. سونىمەن قاتار, وڭتۇستىكتەگى كينو ستۋديالاردى بىرىكتىرىپ, ورتاق قۇندى دۇنيە جاساپ شىعارۋدى ۇسىنامىن. بۇل قازاق كينو يندۋسترياسىنىڭ دامۋىنا سەپتىگىن تيگىزىپ, رەسپۋبليكا كولەمىندە وڭتۇستىكتىڭ اتىن شىعارۋعا, حالىقارالىق دەڭگەيدە قازاقستاندى تانىتۋعا مۇمكىندىك بەرەدى»,-دەدى اكىم.
جيىندا كينو سالاسىنىڭ ۇزدىكتەرى دە ءوز ويلارىن ورتاعا سالدى. بۇگىندە ەلىمىزدە وتاندىق كينونى دامىتۋعا مەملەكەتتەن قولداۋلار كورسەتىلىپ جاتقانىن ايتتى. تۇيمەباەۆتىڭ وڭىردە وسى سالانى دامىتۋدى قولعا الىپ, كينورەجيسسەرلارىمەن كەزدەسىپ وتىرعان العاشقى اكىم ەكەنىن جەتكىزدى.
«سىزبەن وتكەن كەزدەسۋ شىعارماشىلىق ۇجىم جۇمىسىنا, جاڭا يدەيالاردىڭ تۋىنا سەرپىن بەرەدى. ءبىزدىڭ پروبلەمالارىمىزبەن تانىسىپ, قازاق كينو يندۋسترياسىنىڭ دامۋى جايىندا ايتقان وي-پىكىرىڭىز ءبىز ءۇشىن ماڭىزدى»,- دەدى «ساق» كينوستۋدياسىنىڭ ديرەكتورى, رەجيسسەر نۋريددين پاتتەەۆ.
كەزدەسۋ سوڭىندا «شىمكەنت پلازا» ويىن-ساۋىق ساۋدا ورتالىعىنىڭ كينوزالىندا وبلىس اكىمدىگىنىڭ تاپسىرىسىمەن تۇسىرىلگەن «ەرلىك» تولىقمەتراجدى كوركەم ءفيلمىنىڭ تۇساۋكەسەرى ءوتتى. باتىرحان داۋرەنبەكوۆ ستسەناريى بويىنشا رەجيسسەر نۋريددين پاتتەەۆتىڭ تۇسىرگەن فيلم جاستاردىڭ پاتريوتتىق سەزىمىن تەرەڭدەتۋدى ماقسات ەتەدى.