كونستانتين ۆولودەنكو جاساعان ۇرلىق ورتا دارەجەلى قىلمىس تۇرىنە جاتادى. ونىڭ قاسىندا كومەكشىلەرى بولعان. ياعني, ول قىلمىسقا توپتانىپ بارىپتى. قالاداعى №2 سوتتىڭ وتىرىسىندا ك.ۆولودەنكونىڭ امنيستياعا ىلىنگەندىگى تۋرالى شەشىم شىعارىلدى. ول ءبىر ەمەس, بىرنەشە ءاۆتوموبيلدىڭ اككۋمۋلياتورلارىن ۇرلاپتى.
سىبايلاستارى ەڭ الدىمەن كىمدە قىمبات كولىك بار, سونى اڭدىپ, اقپارات جەتكىزگەن. ال ولار توناۋلارىن ءتۇن مەزگىلىندە جۇزەگە اسىرىپ وتىرعان. ال ۇرلانعان اككۋمۋلياتورلاردى الىپساتارلارعا وتكىزىپ كەلىپتى. ءسويتىپ ءجۇرگەندە, ك.ۆولودەنكو قولعا ءتۇسىپ قالادى. كولىك ۇرلاۋشىلارعا قىلمىستىق كودەكستىڭ 175-بابى بويىنشا, ياعني بوتەننىڭ مۇلكىن توناۋ, توپتالىپ بارىپ قىلمىستىق ارەكەتتەرگە بارۋ ىستەرىنە قاراي ايىپ تاعىلعان.
بىراق, ونىڭ جاساعان قىلمىسى ورتا دارەجەلى بولعاندىقتان, ەل تاۋەلسىزدىگىنىڭ 25 جىلدىعىنا وراي «قازاقستان رەسپۋبليكاسىنىڭ راقىمشىلىق تۋرالى» زاڭىنا ىلىگىپتى. ءسويتىپ, №2 سوتتىڭ سۋدياسى جانات ابەنوۆا بارلىق ءماسەلەنى زاڭ بويىنشا بۇگە-شىگەسىنە دەيىن تەكسەرىپ, تولىق قاراپ, كونستانتين ۆولودەنكونىڭ ءىسىن امنيستياعا جاتقىزدى.
– مەن ءوز جاساعان ىسىمە وكىنەمىن, – دەدى ك.ۆولودەنكو سوت وتىرىسىندا. – وتباسىمدى اسىراۋعا اقشام جەتپەدى. سودان كەيىن ۇرلىققا باردىم. قازىردە زاتون اۋداندىق پوليتسيا قىزمەتكەرلەرى مەنىڭ سلەسار بولىپ جۇمىسقا ورنالاسۋىما مۇمكىندىك جاسادى. ەلباسىمىز نۇرسۇلتان نازارباەۆقا ۇلكەن راحمەت. مەنىڭ قاتەمدى تۇزەتىپ, ادام بولۋىما مۇمكىندىك بەردى. تەمىر توردىڭ ار جاعىنا تۇسپەۋىمە جاعداي جاسادى. ەندى ۇرلىق جاسامايمىن.
سۋديا جانات ابەنوۆانىڭ ايتۋىنشا, راقىمشىلىق تۋرالى زاڭ كىشى جانە ورتا دارەجەلى قىلمىس جاساعاندارعا ءۇلكەن جەڭىلدىك بەرەدى. قاراماعىندا كامەلەتكە تولماعان بالاسى بار ايەلدەر, جاڭعىزىلىكتى انالار, ەكىقابات ايەلدەر, بارلىق توپتىڭ مۇگەدەكتەرى, ۇلى وتان سوعىسى ارداگەرلەرىنىڭ بالالارى دا وسى راقىمشىلىق جاساۋ تۋرالى زاڭعا ءىلىنىپ, قايىرىن كورىپ وتىر.
راۋشان نۇعمانبەكوۆا
سەمەي