قىرشىن ءومىردىڭ وتەۋى كىمنەن؟

بۇگىنگىدەي قوي ۇستىنە بوزتورعاي جۇمىرت­قالاعان زاماندا كىنالىلەر جازادان قۇتىلىپ كەتەدى دەپ ەش ويلاماپپىن. «ەگەمەن قازاقستان» گازەتىندە جارىق كورگەن «قورعاۋشى ما, قور­لاۋشى ما؟» دەگەن ماقالانى (28 اقپان) وقىپ, جاعامدى ۇستادىم. «سۇمدىق-اي» دەگەن­نەن باسقا ءسوز اۋزىما تۇسەر ەمەس. جارتى عاسىرعا جۋىق ۋاقىت پروكۋراتۋرا سالا­سىندا قىزمەت ىستەدىم. ول ۋاقىتتاردا دا ءتۇر­لى قىلمىستار ورىن الىپ جاتاتىن. بىراق زاڭ تالاپتارى مۇلتىكسىز ساقتالاتىن. ادىلدىكتىڭ ءۇس­تەم­دىك قۇرۋىنا مۇددەلى ورگانداردىڭ, ونىڭ ءىشىن­دە ادۆوكاتۋرا دا بار, ون ەكىدە ءبىر گ ۇلى اشىل­ماعان قىز بالانىڭ “اششى ولىمىنە” بەيجاي قارا­عا­نى جانىمدى قاتتى اۋىرتتى. ورىمدەي قىزدىڭ اششى ءولىمىن جىلى جاۋىپ قويۋ ارەكەتتەرى تۇسىنىكسىز. اۋدان پروكۋرورى قىلمىستىق قۇرامنىڭ بولماۋىنا بايلانىستى ءىس توقتاتىلعانىن العا تارتادى. زورلاۋ فاكتىسى بويىنشا عانا قىلمىسكەر جازاسىن العان. ال ءجاسوسپىرىمدى سۋيتسيدكە ماجبۇرلەگەندەر سۇتتەن اق, سۋدان تازا كەيىپ تانىتىپ, تايراڭداپ ءجۇر. مۇندايلار جازاسىز قالماۋى ءتيىس. ادام ءومىرىن ويىنشىققا اينالدىرۋ – بارىپ تۇرعان باسسىزدىق. سونىڭ كەسىرىنەن ورىمدەي بالانىڭ ءومىرى قيىلدى. بۇل وقيعا شاڭىراعىندا الپەشتەپ ۇل-قىز ءوسىرىپ وتىرعان اتا-انالارعا دا, ۇستازدارعا دا ساباق بولۋى كەرەك. «كوزىمنىڭ قاراشىعى» دەپ وسىرگەن بالاسىن الدەبىرەۋلەر مازاققا اينالدىرسا, اكە-شەشەنىڭ جارىق كۇنى تۇنگە اينالعانى ەمەس پە؟ وبال-اي, قىرشىننان قيىلعان عۇمىردىڭ وتەۋىن كىمنەن سۇرايمىز؟ ەڭ سوراقىسى, ادۆوكات بەيكۇنا ءسابيدى اينالاسىنداعىلارعا جەككورىنىشتى قىلىپ كورسەتۋ ءۇشىن وسەك-اياڭعا جول بەرىپ, جالا جاپقان, قولىنان كەلگەنشە قارالاعان. شىندىقتى وتىرىكپەن بۇركەمەلەگەن مۇنداي قورعاۋشىدان نە ءۇمىت, نە قايىر؟ قىزعالداق گۇلدەي عانا عۇمىر كەشىپ, ارىن اجالمەن اراشالاعان بەيكۇنا قىزدىڭ مۇشكىل ءحالىن ماڭايىنداعىلاردىڭ تۇسىنبەگەنى, قولۇشىن بەرمەگەندەرى وتە وكىنىشتى. ابىز جاسقا كەلگەن شاعىمدا قولىما قالام الىپ, ءبىر وتباسىنا باقىتسىزدىق اكەلگەن وقيعاعا بەكەردەن-بەكەر ءۇن قوسىپ وتىرعان جوقپىن. جاس قىزدىڭ ولىمىنە كىنالى جاندار ءوز جازاسىن السا ەكەن دەگەن ءوتىنىشىمدى قۇزىرلى ورگاندار ەسكەرىپ, زەردەلەيتىن شىعار دەگەن سەنىمدەمىن. ساپار دۇيسەنوۆ, سوعىس جانە ەڭبەك ارداگەرى, پروكۋراتۋرانىڭ قۇرمەتتى قىزمەتكەرى پەتروپاۆل