سيريا بويىنشا حالىقارالىق كەزدەسۋ 3-4 مامىر كۇندەرى ەلوردادا وتەدى. بۇل تۋرالى استانا پروتسەسى ءۇشىنشى راۋندىنىڭ قورىتىندىسىنا وراي كەپىلگەر ەلدەر بىرلەسە ازىرلەگەن مالىمدەمەدە ايتىلعان, دەپ حابارلايدى قازاقپارات.
بىرلەسكەن مالىمدەمەنى قر سىرتقى ىستەر ءمينيسترىنىڭ ورىنباسارى اقىلبەك كامالدينوۆ وقىپ بەردى. وندا: «ءبىز ناۋرىزدا جەنەۆادا كەلىسسوزدەردىڭ جالعاسۋىنا قولداۋ بىلدىرەمىز. ۇشجاقتى كەزدەسۋ جوعارى دەڭگەيدە جالعاساتىندىعىن اتاپ وتەمىز. سيريا ۇكىمەتى مەن سيريا وپپوزيتسياسىنىڭ وكىلدەرى, سونىمەن بىرگە بايقاۋشى رەتىندە باسقا دا تاراپتار بۇل وتىرىستارعا شاقىرىلۋى مۇمكىن. ءبىز جوعارى دەڭگەيدەگى كەلەسى وتىرىستى 3-4 مامىردا استانادا وتكىزۋ تۋرالى شەشىم قابىلدادىق جانە 2017 جىلدىڭ ساۋىرىندە تەگەراندا ساراپشىلار كونسۋلتاتسيالارىن وتكىزۋگە كەلىستىك. قازاقستان پرەزيدەنتى نۇرسۇلتان نازارباەۆقا جانە قازاق بيلىگىنە وسىناۋ كەزدەسۋدى وتكىزگەنى ءۇشىن ريزاشىلىعىمىزدى بىلدىرەمىز», - دەلىنگەن.
سونىمەن قاتار, اقىلبەك كامالدينوۆ قازاقستان جانە پرەزيدەنت نۇرسۇلتان نازارباەۆ كەلىسسوزدەرگە ورىن ۇسىنىپ قانا قويماي, سونىمەن بىرگە بىتىمگەرشىلىك ۇسىنىستارىن دا جالعاستىراتىنىن باسا ايتتى.
«قازاقستان بۇل جانجالدا بەيتاراپ ءارى وبەكتيۆتى ارااعايىن بولىپ قالا بەرەدى. استانا سيريا بويىنشا بولاشاقتاعى كەلىسسوزدەر ءۇشىن ىڭعايلى ورىن بولۋىن جالعاستىرادى», - دەدى مينيستر ورىنباسارى.