ءوزىڭىزدىڭ سۇيىكتى سۋرەتشىڭىز, ءتىپتى, سىزگە ۇنايتىن اعىمدار مەن جانرلار دا بار ەكەنىندە كۇمان جوق. ءتىپتى, سۋرەتشىنىڭ تۇپكى ويىن ناقتى تۇسىنبەسەڭىز دە, قانداي دا ءبىر تۋىندى اسەر ەتپەي قويمايتىنى دا بار. جاي كورەرمەن رەتىندە بەلگىلى ءبىر كارتينانى ءسىز «ۇنادى نەمەسە ۇنامادى» دەپ تە ايتا الاسىز. نەگىزى سۋرەتشى, ءانشى, مۋزىكانت بولۋ ءۇشىن الدىمەن تابيعي تالانت قاجەت دەگەن وي كوپشىلىكتىڭ ساناسىن جاۋلاپ الىپ, كەيبىر ادامدارعا ەشقانداي ارەكەتكە نەمەسە وسى ونەرگە قاراي اياق باسۋعا مۇمكىندىك بەرمەي كەلگەنى ايان. قانشاما ادام ءوزىنىڭ ەرەكشە ءبىر قىرىن اشا الماي, سول كۇيىندە بىردە-ءبىر سۋرەت سالماي, بىردە-ءبىر مۋزىكالىق شىعارما ورىنداماي, توقىما, گوبەلەن, وريگامي, ويىنشىق, قىش قۇمىرا سىندى بىردە-ءبىر ونەر تۋىندىسىن جاساماي ومىردەن وزعان دا بولار... سوندىقتان قالاعان دۇنيەنى جاساۋعا, جاڭا ءبىر نارسەنى ۇيرەنۋگە شابىتتاندىراتىن, قاتىپ قالعان بىرجاقتى وي-پىكىردى وزگەرتىپ, ادامنىڭ جاڭا ءبىر قىرىن اشۋعا كومەك كورسەتۋ باعىتىندا جۇمىس ىستەگەن ادامداردىڭ ەڭبەكتەرىن قالاي جارنامالاساق تا ازدىق ەتپەيدى. سونىڭ ءبىرى مارك كيستلەردىڭ «30 كۇندە سۋرەت سالۋعا ۇيرەنۋ» («You can draw in 30 days») كىتابى ميلليونداعان ادامدى سۋرەت سالۋعا ۇيرەتىپ قانا قويماي, سۋرەت سالۋدىڭ تۋا بىتكەن قاسيەت ەمەس, ۋاقىت وتە كەلە قالىپتاساتىن داعدى ەكەنىن تاعى ءبىر دالەلدەپ بەردى. كەز كەلگەن ادامعا ادەمى سۋرەت سالۋ ءۇشىن قاعاز, قارىنداش جانە ءوزىڭىزدى جاڭا قىرىڭىزدان اشقىڭىز كەلگەن قالاۋىڭىز عانا كەرەك. سۋرەت سالۋعا كۇنىنە 20 مينۋت ۋاقىت ءبولۋ ارقىلى ءبىر ايدىڭ ىشىندە قالاعان سۋرەتىڭىزدى سالا الۋ دەڭگەيىنە جەتەسىز, دەيدى اۆتور. ول قارىنداشپەن سۋرەت سالۋدىڭ رەتى مەن كەزەگىن كورسەتە وتىرىپ, كولەمدى سۋرەتتەردى سالۋعا كومەكتەسەتىن قۇپيالار مەن كەڭەستەردى, سۋرەت سالۋدىڭ زاڭدىلىقتارىن ايتادى. سۋرەت سالۋ كەيبىر ادامدارعا تىنىشتىق پەن سابىرلىلىق بەرسە, باسقالارىنا ويىن جيناقتاۋعا, ءبىر ارناعا توعىستىرۋعا كومەكتەسەدى. وسى ورايدا, سۋرەت سالۋعا ۇيرەتەتىن شەبەرلىك-ساعاتتارىن وتكىزىپ جاتقان ماماندار دا ءبىر جاعىنان بيزنەسىن العا جىلجىتىپ, اقشاسىن تاۋىپ جاتسا, ەكىنشى جاعىنان ادامداردىڭ سۇرانىستارىن دا وتەيدى. جاپونيادان بىزگە جەتكەن وريگامي ونەرى بويىنشا ۇسىنىلاتىن كىتاپتاردىڭ كوپتىگى وقىرمانعا جاقسى تاڭداۋ بەرەدى. سونىڭ ءبىرى, ءوزىم قولدانىپ كورگەن ريك ءبيچتىڭ اۆتورلىعىمەن شىققان «وريگامي: ۇلكەن يلليۋستراتسيالى ەنتسيكلوپەديا» جيناعىنا ريزاشىلىعىم شەكسىز. ارينە, ينتەرنەتتەن دە ءتۇرلى ادەمى, وڭايىنان ەڭ كۇردەلىسىنە دەيىنگى جانۋارلار فورمالارىن, كوپ ۋاقىت پەن شەبەرلىكتى قاجەت ەتەتىن وريگامي فيگۋرالاردىڭ ۇلگىلەرىنىڭ جاسالۋ جولدارىن, ءتىپتى, بەينەكورىنىستەرىن دە تابا الاسىز. دەگەنمەن, كىتاپتىڭ ورنى بولەك ەكەنىن اتاپ وتكىم كەلەدى. تاماق ءپىسىرۋدىڭ ونەر جانە ەرەكشە ىقىلاس قويۋعا تۇرارلىق سالا ەكەنىنە ميلليونداعان ادامنىڭ كوزىن جەتكىزىپ, جاڭا ارماندارعا جەتەلەگەن شەبەرلەردىڭ ءبىرى بريتان اسپازى, رەستوراتور جانە شوۋ جۇرگىزۋشى دجەيمي وليۆەردى مىسالعا الايىق. ونىڭ باعدارلامالارى, كىتاپتارى, فيلمدەرى ارقىلى قانشاما ادام دۇرىس تاماقتانۋعا, ءدامدى تاماق پىسىرۋگە ۇيرەندى. سونىمەن بىرگە, امەريكالىق جازۋشى دجۋلي پاۋەللدىڭ «دجۋلي جانە دجۋليا: باقىت رەتسەپتى» كىتابى مەن فيلمىندە اس ءمازىرى مەن ءدامدى تاماق, جالپى, ومىردە العا قويعان ماقساتىڭىزعا جەتۋ جولى سيپاتتالادى. ارينە, اۆتوردىڭ دا, كەيىپكەردىڭ دە ومىرلىك ماقساتى وقىعان اسپازدىق كىتابىنان ءبىر جىلدا 254 تاعام ءتۇرىن ءپىسىرىپ شىعۋ عانا ەمەس, ودان تەرەڭدە جاتقانى ايان. كىتاپ ارقىلى ۇيرەنۋ, ياعني ءوز بەتىنشە ۇيرەنۋ وڭاي ەمەس. ادامنان كوپ ەرىك-جىگەر, ءتارتىپ, باستاعان ءىستى اياعىنا دەيىن جەتكىزە الۋ قاسيەتتەرىن تالاپ ەتەدى. سوندىقتان قازىرگى تاڭدا سۋرەت سالۋمەن قاتار, تاماق پىسىرۋگە, ويىنشىق, قىش قۇمىرا جاساۋعا, قۇممەن سۋرەت سالۋعا, بيسەر, كەستە توقۋعا ۇيرەتەتىن ءتۇرلى كۋرستاردىڭ كوپتەپ اشىلىپ جاتىر. مۇنداي شەبەرلىك ساعاتتارىندا ەڭ باستىسى, وقىتۋشىنىڭ سۋرەت سالۋ, تاماق ءپىسىرۋ, ويىنشىق جاساۋ, ويۋ ويىپ, كەستە تىگۋ جولدارىن جاقسى تۇسىندىرە الۋ, الدىنا كەلگەن بالانىڭ نەمەسە ەرەسەك ادامداردىڭ قىزىعۋشىلىعىن وياتىپ, وزىنە دەگەن سەنىمىن ودان ءارى نىعايتىپ, ءوز ىسىنە, جاسالعان جۇمىستىڭ ناتيجەسىنە ريزا بولۋ, راحاتتانۋ, قۋانۋ, جاڭا باستامالارعا قاناتتانۋ سەزىمىنە بولەنۋىنە مۇمكىندىك جاساۋ ماڭىزدى. ءومىر ادامعا مۇمكىندىك بەرەتىنى ءسوزسىز. تەك سول مۇمكىندىكتى جىبەرىپ الماڭىز. ەڭ باستىسى, مۇعالىم, اتا-انا, دوس, اينالاداعى ادامدار وقيمىن, ۇيرەنەمىن, ىستەيمىن, تىرىسامىن دەپ تۇرعان ادامنىڭ مىسىن باسىپ, تالابىن قايتارىپ, ءۇمىتىن ءوشىرىپ, ارمانىن شەكتەيتىن بەيجايلىق پەن نەمقۇرايدىلىق تانىتپاسا ەكەن دەيمىز.
باقىتگۇل سالىحوۆا,
پەداگوگيكا عىلىمدارىنىڭ كانديداتى