دانيال احمەتوۆ كەڭەس مۇشەلەرىن شىعىس قازاقستان وبلىسىنىڭ 2016 جىلداعى الەۋمەتتىك-ەكونوميكالىق دامۋىنىڭ قورىتىندىلارىمەن جانە 2017 جىلى اتقارىلاتىن جۇمىستاردىڭ باستى باعىتتارى تۋرالى باياندادى, دەپ حابارلادى شقو اقپاراتتىق ورتالىعى.
وسكەمەندە شىعىس قازاقستان وبلىستىق قوعامدىق كەڭەسىنىڭ وتىرىسى ءوتىپ, وندا ءوڭىر باسشىسى دانيال احمەتوۆتىڭ ەسەبى تىڭدالدى. وبلىس اكىمى شىعىس قازاقستاننىڭ وتكەن جىلداعى الەۋمەتتىك-ەكونوميكالىق دامۋىنىڭ قورىتىندىلارى تۋرالى بايانداپ, پرەزيدەنتتىڭ قازاقستان حالقىنا جولداۋىن جۇزەگە اسىرۋدىڭ اياسىندا بيىل اتقارىلاتىن جۇمىستارعا توقتالدى.
2016 جىلى وڭىرلىك جالپى ءونىم 14%-عا ءوسىپ, 2,6 ترلن. تەڭگەدەن اسقان. ونەركاسىپ ءونىمىنىڭ كولەمى 41%-عا وسكەن. استىقتىڭ مول شىعۋى مەن مال شارۋاشىلىعى ءونىمى ءوندىرىسىنىڭ ءوسۋى ەسەبىنەن اۋىل شاراۋاشىلىعىنىڭ جالپى ءونىمىنىڭ كولەمى 11%-عا ارتقان. نەگىزگى كاپيتالعا ينۆەستيتسيا 6%-عا, قۇرىلىس جۇمىستارىنىڭ كولەمى 44%-عا وسكەن. مەملەكەتتىك باعدارلامالاردى ورىنداۋدىڭ اياسىندا جاڭا 17 مىڭ جۇمىس ورىندارى اشىلعان. 340 مىڭ شارشى مەتر تۇرعىن ءۇي مەن 10 الەۋمەتتىك نىسان سالىنىپ, قولدانىسقا بەرىلگەن.