نەسيە نارىعىندا سالالىق ترانسفورماتسيا. كوتەرمە ساۋدا, وڭدەۋشى ونەركاسىپ پەن اۋىل شارۋاشىلىعى بانكتەردىڭ ەڭ كوپ نەسيە بەرەتىن سالالارى بولىپ شىقتى. تاۋ-كەن ونەركاسىبى, كولىك ينفراقۇرىلىمى مەن قۇرىلىس سالالارىنان نەسيە كاپيتالى بىرتىندەپ ىعىسا باستادى. بۇل تۋرالى Finprom.kz جازادى.
2016 جىلدىڭ قورىتىندىسى بويىنشا, نەسيە بەرۋ كورسەتكىشىنىڭ ەڭ كوپ ازايعان سالاسى رەتىندە تاۋ-كەن سەكتورىن اتاۋعا بولادى. بۇل سالاداعى نەسيە پورتفەلى تورتتەن بىرگە (112,5 ملرد) ازايدى.
ال كولىك ينفراقۇرىلىمىنىڭ بانكتەن الاتىن قارجىسى 8 پايىز ازايسا, قۇرىلىس سالاسى 2015 جىلمەن سالىستىرعاندا 2016 جىلى نەسيەنى 5 پايىز از العان. سونىمەن قاتار, بولشەك ساۋدا دا نەسيە الۋدى ازايتقان. مۇناي ءوندىرىسى ىسىندە 1 پايىز ازايۋ بايقالدى. يپوتەكا مەن تۇتىنۋ نەسيەسى دە كۇرت تومەندەدى. تۇتىنۋ نەسيەسىنىڭ ازايۋىنا ساراپشىلار تاۋاردى ونلاين قارىزعا الۋدىڭ ەنگىزىلۋىمەن تۇسىندىرەدى.
وڭدەۋشى ونەركاسىپ كەرىسىنشە, نەسيە رەسۋرسىن وزىنە كوبىرەك تارتا باستادى. ءبىر جىلدا سالا پورتفەلى 22,8 پايىزعا ۇلعايدى. بانكتەر باسىم سەكتورلارداعى يتندۋستريالاندىرۋ مەن كاسىپكەرلىكتى دامىتۋ مەملەكەتتىك باعدارلامالارى بويىنشا دا نەسيە بەرۋدى كوبەيتتى.
ەكىنشى ورىندا تەلەكوممۋنيكاتسيا سالاسى. سالانىڭ العان نەسيەسى 8 پايىز ۇلعايدى. دەگەنمەن, جالپى بانكترەدىڭ بەرگەن نەسيەسىنىڭ ىشىندە بۇل سالانىڭ العانى تەك 1 پايىزدى عانا قۇرايدى. نەسيە الۋعا بۇل سالانىڭ ەڭ ۇلكەن كەدەرگىسى - IT كومپانيالاردىڭ كەپىلدىككە قوياتىن م ۇلىكتەرىنىڭ بولماۋى. مۇمكىن, بيىلعى جولداۋدا ايتىلعان "ساندىق ەكونوميكاعا" كوشۋ تۋرالى باستامادان كەيىن سالاعا بەرىلەتىن نەسيە كولەمى ۇلعايار.
سونىمەن قاتار, ەكىنشى دەڭگەيلى بانكتەردىڭ ەڭ كوپ نەسيە بەرەتىن سالاسى رەتىندە ساۋدا سالاسى ءوز ورنىن جوعالتقان جوق. 2016 جىلدىڭ قورىتىندىسى بويىنشا, بانكتىك قارىزداردىڭ 22 پايىزى وسى سالاعا تيەسىلى ەكەنى انىقتالدى. ساۋدا سالاسىنىڭ العان قارىزى 2,78 ترلن تەڭگەنى قۇرادى.