ەكىباستۇز قالاسىنداعى ورتالىق كوشەلەردىڭ بىرىندە ءماشھۇر ءجۇسىپ كوپەي ۇلىنىڭ قولادان قۇيىلعان ەسكەرتكىشى ءبوي كوتەرمەك, دەپ حابارلايدى pavlodarnews.kz. پاۆلودار وبلىستىق مادەنيەت, مۇراعاتتار جانە قۇجاتتاما باسقارماسى مادەنيەت, ونەر جانە تاريحي-مادەني مۇرانى قورعاۋ ءبولىمىنىڭ باس مامانى قايىربەك قارعاسەكوۆتىڭ ايتۋىنشا, قازىرگى كۇنى كونكۋرس جاريالانىپ, التى ەسكيز قابىلدانعان.
«بىزگە قاراعاندى, استانا, پاۆلودار قالالارىنىڭ مۇسىنشىلەرىنەن التى جۇمىس كەلىپ ءتۇستى. تاريحي ءمۇسىننىڭ بيىكتىگى التى مەتر بولادى دەپ جوسپارلانۋدا. ول قولادان قۇيىلۋى ىقتيمال. جىل سوڭىنا دەيىن ەسكەرتكىش ەكىباستۇز قالاسىندا تۇرعىزىلماق, – دەدى قايىربەك قارعاسەكوۆ.
بۇگىنگى تاڭدا پاۆلودار وبلىسىندا 283 ەسكەرتكىش تىركەلگەن. ونىڭ ۇشەۋى - رەسپۋبليكالىق ماڭىزى بار ەسكەرتكىشتەر. بۇل پاۆلودار قالاسىنداعى دەروۆ كوپەستىڭ ساۋدا ءۇيى, اقتوعاي اۋدانىنداعى ەستاي بەركىمباەۆ پەن باياناۋىل اۋدانىنداعى جاياۋ مۇسانىڭ زيراتتارى.
«قر مادەنيەت جانە سپورت مينيسترلىگىنىڭ 2015 جىلعى 2-جەلتوقسانىنداعى 371-بۇيرىعىنا سايكەس ءبوي كوتەرگەن ءمۇسىن بەس جىل وتكەن سوڭ عانا ەسكەرتكىشتەر قاتارىنا قوسىلادى. پاۆلودار قالاسىندا سوڭعى جىلدارى قۇيىلعان جۇسىپبەك ايماۋىتوۆ, بايان باتىر مەن مالايسارى تارحاننىڭ مۇسىندەرى ەسكەرتكىشتەر تىزىمىنە ەنگىزىلگەن جوق. سونداي-اق, ءبىز ارنايى كوميسسيا قۇرىپ, شالعايداعى ەلدى مەكەندەردەگى تراكتوردىڭ, كارل ماركستىڭ, ەنگەلس پەن لەنيننىڭ مۇسىندەرىن ەسكەرتكىشتەر تاراپىنان سىزىپ تاستادىق», – دەپ اتاپ ءوتتى باس مامان. ايتا كەتەرلىگى, وبلىستىق مادەنيەت باسقارماسىنا كەلىپ تۇسكەن جۇمىستار ساراپتاۋدان ءوتىپ, رەسپۋبليكالىق كوميسسيانىڭ تالقىلاۋىنا جىبەرىلەدى. سودان كەيىن عانا ءماشھۇر ءجۇسىپتىڭ ەسكەرتىشىنىڭ قانداي بولاتىنى انىقتالادى.