باتىس قازاقستان وبلىسىندا 2020 جىلعا دەيىنگى وڭىرلەردى دامىتۋ باعدارلاماسىنىڭ «اق بۇلاق» باعىتىنا سايكەس بيىل 3,4 ملرد. تەڭگەگە 31 سۋمەن قامتۋ جوباسى جۇزەگە اسىرىلماق, دەپ حابارلايدى قازاقپارات.
بقو قۇرىلىس باسقارماسى باسشىسىنىڭ ورىنباسارى الىبەك انتازيەۆتىڭ سوزىنە قاراعاندا, سونىڭ ىشىندە رەسپۋبليكالىق بيۋدجەت ەسەبىنەن 2,8 ملرد. تەڭگە (25 نىسان), جەرگىلىكتى قازىنادان 0,6 ملرد. تەڭگە (6 نىسان) ءبولىندى. مىسالى, رەسپۋبليكالىق بيۋدجەت قارجىسىنا اقجايىق اۋدانى اقسۋات اۋىلىنا جالپى ۇزىندىعى 19,062 كم سۋ قۇبىرى تارتىلماق. جوبا قۇنى - 297,994 ملن. تەڭگە بولسا, بيىلعا 60 ملن. تەڭگە قارالماقشى. قازىرگى كەزدە كونكۋرستىق راسىمدەۋ جۇمىستارى جۇرگىزىلۋدە.
بوكەي ورداسى اۋدانى ورتالىعى سايقىن اۋىلىندا 47,84 كم سۋ قۇبىرى قايتا قۇرىلماق. مۇنىڭ جالپى قۇنى 369,695 ملن. تەڭگە بولسا, وتكەن جىلى 37 ملن. تەڭگە يگەرىلدى. بيىل رەسپۋبليكالىق قازىنادان 110 ملن. تەڭگە, جەرگىلىكتى بيۋدجەتتەن 37,476 مىڭ تەڭگە بەرىلمەك. باس مەردىگەرى - «الفاسەرۆيسستروي» جشس.
جاڭاقالا اۋدانى پياتيمار اۋىلىندا جالپى قۇنى 346,817 ملن. تەڭگە تۇراتىن, ۇزىندىعى 14,581 كم سۋ قۇبىرى تارتىلۋدا. باس مەردىگەرى - «تاسقالاترانسگاز» جشس.
جانىبەك اۋدانى ورتالىعى جانىبەك اۋىلىندا «قازقۇرىلىسسەرۆيس» جشس 498,634 ملن. استام تەڭگەنىڭ جۇمىسىن اتقارماقشى. مۇنىڭ جالپى ۇزىندىعى - 55,606 كم. اسىرەسە, قازتالوۆ اۋدانىندا سۋمەن قامتۋ نىساندارى كوبىرەك سالىنباقشى. اتاپ ايتقاندا, جالپاقتال اۋىلىندا «پمك 117» جشس 384,690 ملن. تەڭگەگە 48,164 كم سۋ قۇبىرىن قايتا قۇرماق. ال تالدىاپان, سارىقۇدىق, قايشاقۇدىق, قوسوبا اۋىلدارىن سۋمەن قامتۋعا (103,249 كم) بارلىعى 820,6 ملن. استام تەڭگە كەتپەكشى.
وبلىستىڭ باسقا دا اۋداندارىندا وسىنداي سۋمەن قامتۋ نىساندارىن نەگىزىنەن 2018 جىلى اياقتاۋ كوزدەلۋدە. ال 7 نىساندى (بوكەي ورداسى اۋدانى كوكتەرەك جانە ءبورلى, قازتالوۆ اۋدانى قازتالوۆ, تاسقالا اۋدانى 2-شەجىن, زەلەنوۆ اۋدانى اقجول, پاۆلوۆ, تەرەكتى اۋدانى ءسارىومىر اۋىلدارى) بيىلعى جىل سوڭىنا دەيىن ىسكە قوسۋ جوسپارلانۋدا. سونىڭ ناتيجەسىندە 2584 تۇرعىن ورتالىقتاندىرىلعان سۋ كوزىنە قوسىلۋعا مۇمكىندىك الادى. 4940 ادام ءۇشىن سۋمەن قامتۋدىڭ ساپاسى جاقسارادى. جىل سوڭىندا ورتالىقتاندىرىلعان سۋ كوزىنە قوسىلعان اۋىلدىق ەلدى مەكەندەر سانى 169-عا جەتىپ, 38,1 پايىزدى قۇراماق. بۇلاردا 242 095 ادام نەمەسە اۋىل حالقىنىڭ 75,7 پايىزى تۇرادى. ايتا كەتەيىك, 2016 جىلى جەرگىلىكتى بيۋدجەت ەسەبىنەن اۋىلدىق ەلدى مەكەندەردە 6 سۋمەن قامتۋ نىسانىن سالۋ ءۇشىن 378,9 ملن. تەڭگە جۇمسالىپ, سونىڭ بىرەۋىندە (قازتالوۆ اۋدانى نۇرساي اۋىلى) جۇمىس مارەگە جەتىپ, بەسەۋىندە باستالعان بولاتىن.