«استانا» فۋتبول كلۋبىنىڭ باس جاتتىقتىرۋشىسى ستانيمير ستويلوۆ sportal.bg باسىلىمىنا بەرگەن سۇحباتىندا قارجىلىق فەير-پلەيدىڭ شەكتەۋلىگى, ونىڭ ەۋروپا ارەناسىندا جەتىستىكتەرگە جەتۋگە تيگىزەتىن كەرى اسەرى جايلى ءوز ويىمەن ءبولىستى.
«جاڭا ماۋسىمعا دايىندالۋ ۇستىندەمىز. قازىر جارتىلاي قورعانىسىمىزدى كۇشەيتۋ – باستى ماقساتىمىز. وكىنىشكە وراي, «استانا» جاقسى ويناپ جۇرگەن كەزدە جوعارى دەڭگەيلى فۋتبولشىلاردى قاتارىنا قوسا المادى. وسىنىڭ سالدارىنان كەيىن كەيبىر ويىنشىلارىمىزدى جىبەرۋگە ءماجبۇر بولدىق. قارجىلىق فەير-پلەي ەرەجەسىنە ساي بولۋ ءۇشىن ەركىن اگەنت رەتىندە جۇرگەن فۋتبوشىلارمەن تولىعىپ جاتىرمىز», – دەدى ستويلوۆ.
«ويىنشىلاردى چەمپيوندار ليگاسىنا قالاي دايىنداۋ كەرەك؟ قيىن سۇراق ەكەن. قاراماعىمداعى جىگىتتەردىڭ جوعارى دەڭگەيگە قاشان شىعاتىنى بەلگىسىز. ارينە, ماۋسىم ايىندا ءبارى تىڭعىلىقتى دايىن بولعانىن قالايمىز. بىراق ەڭ قيىنى – ويىن دەڭگەيىن ءبىر قالىپتا ۇستاپ تۇرۋ. فيزيكالىق تۇرعىدان عانا ەمەس پسيحولوگيالىق جاعىنان دا, ەموتسيونالدىق تۇرعىدان دا بارلىق سىناققا دايىن بولۋى كەرەك. ءبىزدى تارتىسقا تولى ون اي كۇتىپ تۇر. ىلعي دا جەڭىسكە جەتە بەرۋ قولدان كەلمەيدى», – دەدى جاتتىقتىرۋشى.