گالينانىڭ ەكىنشى التىنى, اننانىڭ بەسىنشى مەدالى...
الماتىنىڭ كۇللى سپورت اۋماعىن دۋماندى دۇبىرگە تولتىرعان ۋنيۆەرسياداشىلاردىڭ قارقىنى جارىستىڭ ونىنشى كۇنىندە دە ەش باسەڭدەمەدى. ولاي دەيتىنىمىز, كۇن ارالاتىپ سايىسقا شىققان بياتلونشىلار جانكۇيەرلەرىن قىزىق ويىندارىمەن تامساندىرۋىن قويمادى. قازاقستاندىق بياتلونشى گالينا ۆيشنەۆسكايا 12,5 شاقىرىم قاشىقتىقتاعى ماسس-ستارتتا ءوزىن تاعى دا جاقسى قىرىنان كورسەتتى. نىسانا كوزدەپ مىلتىق اتۋدىڭ ءتورت شەبىندە ءبىر-اق رەت قاتەلەسكەن گالينا ۆيشنەۆسكايا بۇل قاشىقتىقتى 36:15.4 مينۋتتا جۇگىرىپ ءوتتى. كۇمىس – ۋكراين قىزى يان بوندارعا, قولا رەسەيلىك لاريسا كۋكلينگە بۇيىردى. تاعى ءبىر بياتلونشى قىزىمىز ەليزاۆەتا بەلچەنكو جاقسى جۇگىرگەنىنە قاراماستان, نىسانا كوزدەۋدە ءۇش رەت ءسۇرىنىپ, ءتورتىنشى ورىندا قالىپ قويدى. قۇرامانىڭ وزگە بياتلونشىلارى الەكساندرا ساسينا ماسس-ستارتتى 13-ءشى, اناستاسيا كوندراتەۆا 15-ءشى ورىنمەن اياقتادى. قازاقستانعا زارىعا كۇتكەن ەڭ ءبىرىنشى التىندى الىپ بەرگەن الينا رايكوۆا, ءتىپتى... جارىستان شىعىپ قالدى. ونداي قىزىق تا بولادى ەكەن! قازاقستان قۇراماسىنىڭ ونىنشى كۇنگى قورجىنعا سالعان 11-ءشى التىن مەدالىنىڭ بار سىرى مەن جىرى وسىلاي بولىپ تۇيىندەلدى! وتكەندە جازعانىمىزداي, اننا شەۆچەنكو تۋرالى جاقسى ماعىنادا ايتساق, شىنىندا دا بۇل سارى قىز «شارشامايدى» ەكەن! ءححVىىى دۇنيەجۇزىلىك قىسقى ۋنيۆەرسيادادا ءبىر ءوزى موينىنا بەس مەدال تاقتى. ءبىر التىن, ءبىر كۇمىس, 3 قولا! شاڭعىمەن جۇگىرۋدەن ءوتكەن 15 شاقىرىمدىق ماسس-ستارتتا ەڭ العاشقى كۇنگى باسەكەدەگى سياقتى اننانىڭ جولىن ادەتتەگىدەي رەسەيلىك باسەكەلەستەرى ليليا ۆاسيلەۆا (التىن) مەن اننا نەچاەۆسكايا (كۇمىس) كەستى. ەرلەر اراسىندا بۇل قاشىقتىقتا ءبىرىنشى ورىندى فرانتسۋز سپورتشىسى جوۋتي باپتيستەگە بەرگەن رومان ەرەمين كۇمىس, انتون پانتوۆ قولا مەدال الدى.كورەيا شورت-ترەكشىلەرى شاڭعا كومىپ كەتتى
قازاق جانكۇيەرلەرىنىڭ جارىس باستالعان العاشقى كۇننەن كۇتكەنى شورت-ترەكشى جىگىتتەردىڭ جارىسى مەن التىنى ەدى! بالۋان شولاق اتىنداعى سپورت سارايىنىڭ مۇز ايدىنىندا 1500 مەترلىك جارىستا بارلىق مەدالدى كورەيالىق سپورتشىلارعا بەرىپ قويعان قازاقستاندىق سپورتشىلار كەلەسى كۇنگى 500 جانە 1000 مەترلىك اينالىمداردا ءجۇلدە سالادى دەگەن ءۇمىت بولعان. سپورتشىلارمىزدىڭ ۋادەلەرى جانكۇيەرلەردىڭ بۇل ويىمەن ءۇيلەسەتىندەي ءجونى بار. جاستار اراسىنداعى چەمپيوناتتار مەن الەم كۋبوگى كەزەڭىنىڭ ءجۇلدەگەرلەرى ابزال اجىعاليەۆ پەن دەنيس نيكيشانىڭ, نۇربەرگەن جۇماعازيەۆ پەن ايدار بەكجانوۆتىڭ شەبەرلىگىنە سەنگەندەيمىز. الايدا, كورەيالىق شورت-ترەكشىلەر قانداي قاشىقتىققا بولسا دا جول تالعامايتىندىقتارىن بىردەن كورسەتتى. وتكەن جىلى سولت-لەيك-سيتي (اقش) قالاسىندا الەم كۋبوگىنىڭ كەزەڭدىك جارىسىندا 500 مەترلىك جارىستا التىننان القا تاققان ابزال اجىعاليەۆ الماتىداعى 500 مەترلىك جارىستا كۇمىس مەدالدى قاناعات تۇتتى. شۇكىر! ...ساعاتىنا 50 شاقىرىمدىق جىلدامدىقپەن قۇستاي ۇشقان نۇربەرگەن جۇماعازيەۆ مارە سىزىعىن ءبىرىنشى بولىپ قيىپ ءوتكەنىمەن, ديسپلەيگە باس الماي ءۇڭىلگەن تورەشىلەر قازاق شورت-ترەكشىسىن ويىن ءتارتىبىن بۇزعانى ءۇشىن جارىستان شىعارىپ تاستادى. بۇل نۇربەرگەنگە ەكى كۇندە جاسالىنعان ەكىنشى وتە قاتاڭ ەسكەرتۋ. نۇربەرگەننىڭ ايدىنداعى جولى وسىلاي كەسىلدى. فينالدىق جارىستا 1000 مەترگە جۇگىرگەن ايدار بەكجانوۆ پەن دەنيس نيكيشا ءۇمىتىمىزدى اقتاي المادى دەۋگە كەلمەس... جارىستى ءتاپ-ءتاۋىر باستاعان ءجىتىتتەرىمىز سوڭعى اينالىمداردا كورەيالىق ەكى سپورتشىدان قالىپ قويدى. دەنيس قولاعا قول جەتكىزدى, ايدار 4-ءشى ورىندا قالدى. الدىمىزدا – 5000 مەترلىك جارىس.قولداعى التىن قولاعا قالاي اينالدى؟!
شورت-ترەكشى قىزدارىمىز 500 جانە 1000 مەترلىك قاشىقتىقتا جۇگىرۋدەن جۇلدەسىز قالدى. الايدا, 3 مىڭ مەترلىك كوماندالىق ەستافەتادا ءتورت ەلدەن قاتىسقان ءاربىر 4 سپورتشى سايىسىندا ءبىزدىڭ ءمادينا جانبوسىنوۆا, كيم لونگ ا ء(اليا), انيتا ناگاي, اناستاسيا كرەستوۆا ابىروي بولعاندا, قولا جۇلدەگە قول جەتكىزدى! مىنە, قازىر ەرلەر اراسىنداعى 5000 مەترلىك جارىس باستالىپ كەتتى. جاسىرمايمىز, ءۇمىتىمىز – التىن! ...الدىمىزدا 39 اينالىم بار. قازاقستان شورت-ترەكشىسى ابزال اجىعاليەۆ ادەتتەگىدەي 4-ءشى ورىندا سىناپتاي سىرعىپ كەلەدى. ورتا شەڭبەردە دايىن جۇرگەن ەستافەتا قولداۋشىلارى دا جان-جاعىن ءجىتى قاداعالاپ, جۇگىرىپ دەم بەرۋدە. وتە مۇقيات بولماسا, ەستافەتالىق بۇل ەرەكشە جارىستا قولداعى باردان قاس-قاعىم ساتتە ايىرىلىپ قالۋىمىز مۇمكىن. جىگىتتەرىمىز ازىرگە وتە جيناقى. مىنە, باستالدى... سوڭعى اينالىمدار. جانكۇيەرلەرگە دە جەل ءبىتتى! زال ىشىندەگى ايقايدان قۇلاق تۇنادى. ءبىزدىڭ جىگىتتەر ءۇشىنشى پوزيتسياعا شىقتى! جارىس شيەلەنىسە ءتۇستى. الدىمىزدا 10 اينالىم... جىگىتتەر قۇستاي ۇشتى! ەستافەتانى قابىلداعان بويدا سوڭعى اينالىمعا شىققان نۇربەرگەندى قىتاي سپورتشىسى يىقتان قاقتى. نۇربەرگەننىڭ تاعى دا جولى بولماعانى ما؟! قاپ! تورەشىلەر ۇزاق كەڭەستى! ...كوش باستاپ كەلىپ اقتىق ساتتە قازاقستان شورت-ترەكشىلەرى ءۇشىنشى ورىندا قالدى. تورەشىلەر شەشىمى وسىنداي. دايىن مازىرگە ءازىر بولا قالعان قىتاي شورت-ترەكشىلەرى ويلاماعان جەردەن ءبىرىنشى ورىنعا شىقتى. ەكىنشى ورىن – رەسەيدە. ابزال اجىعاليەۆ, ايدار بەكجانوۆ, دەنيس نيكيشا, نۇرتىلەك قاجعاليەۆ پەن نۇربەرگەن جۇماعازيەۆ توبى قازاقستاندى ءۇشىنشى ورىنعا كوتەردى. كورەيا سپورتشىلارى ءتارتىپ بۇزعانى ءۇشىن جارىستان شىعارىلدى. قولدا تۇرعان التىن قاراپ تۇرىپ قولاعا اينالدى دا كەتتى... اتتەڭ, اتتەڭ! تالعات ءسۇيىنباي, «ەگەمەن قازاقستان» الماتى