ەلباسى جولداۋىن ناسيحاتتاۋ جانە حالىققا ءتۇسىندىرۋ ماقساتىندا ءماجىلىس دەپۋتاتى ساۋىتبەك ابدراحمانوۆ وڭىرلەردەگى كەزدەسۋلەرى اياسىندا بايزاق اۋدانىندا بولدى.
دەپۋتات اۋدان ورتالىعى – سارىكەمەر اۋىلىنداعى «قازاقستاننىڭ 40 جىلدىعى» اتىنداعى ورتا مەكتەپتە ءوڭىر تۇرعىندارىمەن كەزدەسىپ, ەلباسى جولداۋى توڭىرەگىندەگى ويلارىمەن ءبولىستى. اۋىل تۇرعىندارىمەن كەزدەسۋ بارىسىندا اڭگىمە نەگىزىنەن ەكى ارنادا ءوربىدى. ونىڭ ءبىرىنشىسى – بيلىك تارماقتارى اراسىندا وكىلەتتىكتەردى قايتا ءبولۋ جونىندەگى ەلباسى ۇندەۋى, ەكىنشىسى پرەزيدەنتتىڭ قازاقستان حالقىنا جولداۋى بولدى.
دەپۋتات ەلباسى شەشىمىمەن حالىق تالقىلاۋىنا سالىنىپ وتىرعان ءوزگەرىستەر تۋرالى تولىق اڭگىمەلەپ, ولار ەلىمىزدىڭ مەملەكەتتىك بيلىگىن دەموكراتيالاندىرا ءتۇسۋ ءىسىندەگى اسا ماڭىزدى قادام بولىپ تابىلاتىنىن تۇسىنىكتى ءتىلمەن جەتكىزدى. سونداي-اق, حالىق قالاۋلىسى قازاقستاننىڭ ءۇشىنشى جاڭعىرۋىن كوزدەيتىن ەلباسى جولداۋىنىڭ ءمانىن بايانداۋ بارىسىندا جاھاندىق ءباسەكەلەستىك پەن الەمدەگى تۇراقسىزدىق جاعدايىندا تۋىندايتىن سىن-قاتەرلەرگە قارسى تۇرۋعا وراي كوزدەلگەن باعىتتار ءجونىندە دە بايان ەتتى. ءوز سوزىندە ساۋىتبەك ابدراحمان ۇلى قازاقستان بۇگىنگى تاڭدا الەم تاعدىرىنا ىقپال جاساپ وتىرعان مەملەكەت ەكەندىگىن دە باسا ايتتى. سيريا بيلىگى مەن قارۋلى وپپوزيتسيانى استاناداعى ءبىر ۇستەل باسىنا توعىستىرعان ەلباسىنىڭ الەمدىك ءدارەجەدەگى بەدەلى ەكەنىن دە اتاپ ءوتتى.
سونداي-اق, دەپۋتات جولداۋدا ايتىلعان «تسيفرلىق قازاقستان», ادامي كاپيتالدى ارتتىرۋ ءماسەلەلەرى بويىنشا دا اڭگىمە ءوربىتتى. ال ەلىمىزدەگى كۇن, جەل ەنەرگيالارىنىڭ اسا ماڭىزدىلىعىنا دا توقتالدى. ءوز كەزەگىندە اۋدان تۇرعىندارى دا ۇندەۋ مەن جولداۋ جايىندا ءوز ويلارىن ورتاعا سالىپ, ەلباسى باستامالارىنا قولداۋ ءبىلدىردى. وزدەرىن تولعاندىراتىن جايلارعا قاتىستى دەپۋتاتقا قويعان سۇراقتارىنا تولىمدى جاۋاپتار الدى.
مۇنداي كەزدەسۋلەر اۋداننىڭ ءبىلىم بەرۋ سالاسىنىڭ قىزمەتكەرلەرىمەن, مىرزاتاي اۋىلىنىڭ تۇرعىندارىمەن, «جامبىلقۇس» جشس ۇجىمىمەن, قىزىل جۇلدىز اۋىلىنىڭ تۇرعىندارىمەن, «ROLA» جشس ۇجىمىمەن جانە اۋدان كاسىپكەرلەرىمەن دە بولىپ ءوتتى.
حاميت ەسامان, «ەگەمەن قازاقستان»
جامبىل وبلىسى