ەلورداداعى ۇلتتىق اكادەميالىق كىتاپحانادا حالىقارالىق تۇركى اكادەمياسىنىڭ ۇيىتقى بولۋىمەن جيىن وتتى. تۇركى تىلدەس حالىقتاردىڭ اتاجۇرتى سانالاتىن قازاقستان استاناسىنداعى جيىنعا قازاق زيالىلارىمەن قاتار, باتىس پەن شىعىستان, تۇستىك پەن تەرىسكەيدەگى ءتۇبى ءبىر تۋىس حالىقتاردىڭ زيالى قاۋىم وكىلدەرى قاتىستى. وتىرىس بارىسىندا «جويىلۋ قاۋپىندەگى تۇركى تىلدەرى» اتتى كوپتومدىق ەڭبەكتىڭ تۇساۋى كەسىلدى.
يۋنەسكو-نىڭ شەشىمىمەن «حالىقارالىق انا ءتىلى كۇنى» دەپ جاريالانعان 12-اقپان قارساڭىندا باسىلىپ شىققان بۇل سۇبەلى ەڭبەك ق.ا.ياسساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ قولداۋىمەن جارىق كورگەن. تۇركيالىق پروفەسسور سۋەر ەكەردىڭ عىلىمي جەتەكشىلىگىمەن ىسكە اسقان جوباعا الەمنىڭ 26 ەلىنەن 130 عالىمنىڭ 132 زەرتتەۋى توپتاستىرىلعان. ال ماقالالار اعىلشىن, تۇرىك, ورىس, قازاق, وزبەك جانە باسقا دا تىلدەردە جازىلعان.
ءتۇرلى-ءتۇستى فوتوسۋرەتتەرمەن كوركەم بەزەندىرىلگەن كوپتومدىقتى وقىرمان قاۋىمعا تانىستىرعان اكادەميا باسشىسى تۋىس حالىقتاردىڭ تامىرىنا قان جۇگىرتەتىن مۇنداي تۋىندىنى باسىپ شىعارۋ باستاماسى يۋنەسكو-نىڭ ارنايى باعدارلاماسى اياسىندا ورىندالىپ وتىرعاندىعىن اتاپ ءوتتى.
شارا اياسىندا ءسوز العان ق.ا.ياسساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ وكىلەتتى كەڭەس توراعاسى, پروفەسسور مۇسا يىلدىز بەن باشكەنت ۋنيۆەرسيتەتىنىڭ پروفەسسورى, جوبا جەتەكشىسى سۋەر ەكەر كىتاپتىڭ جازىلۋ تاريحىن اڭگىمەلەپ, تاعدىرلى تىلدەردى زەرتتەۋ مەن قورعاۋ جايلى پايىمدى پىكىرلەرىمەن ءبولىستى. اڭگىمە بارىسىندا جيناققا زەرتتەۋلەرى ەنگەن مامانداردىڭ الەمنىڭ ءتۇرلى ەلدەرى مەن سان ءتۇرلى ۋنيۆەرسيتەتتەرىندە, عىلىمي ۇيىمدارىندا جۇمىس ىستەيتىنى بەلگىلى بولدى. ال ولاردى تاۋىپ, تانىپ, ۇجىمدىق ەڭبەككە جۇمىلدىرۋدا بايلانىس تەتىگى رەتىندە الەۋمەتتىك جەلىلەردىڭ ءوزىن اجەتكە جاراتا بىلگەن.
«ماسەلەن, ءبىز وسى كىتاپقا ماتەريالدار ازىرلەۋ بارىسىنداعى سوڭعى بەس جىل ىشىندە بايلانىس قۇرالى وسى ەكەن تەلەفونمەن عانا شەكتەلگەن جوقپىز. حات, حابار الماسۋدا ەلەكتروندى پوشتانى بىلاي قويىپ, الەۋمەتتىك جەلىلەردىڭ ىشىندەگى فەيسبۋكتىڭ ءوزىن پايداعا جاراتتىق. سونىڭ ناتيجەسىندە الەمگە تارىداي شاشىلعان تۇركى تىلدەس حالىقتاردىڭ وكىلدەرىنەن باس-اياعى 10 مىڭنان استام دەرەكتەر جينالدى», – دەدى س.ەكەر.
سونداي-اق, القالى جيىندا تۋىس حالىقتاردىڭ اتىنان تىلەكتەستىگىن ءبىلدىرىپ, ءسوز سويلەگەندەر قاتارىندا مەملەكەت قايراتكەرى مىرزاتاي جولداسبەكوۆ پەن استانادا تۇركى كەڭەسى اقساقالدار كەڭەسىنىڭ مۇشەسى ءادىل احمەتوۆ بۇرىنعى تۇرىك ءداۋىرىنىڭ اسقاق وركەنيەت بولمىسىن تانىتاتىن زەرتتەۋلەردىڭ بۇگىنگى ءبۇتىن تۇركى الەمى ءۇشىن زور ماڭىزعا يە ەكەنىن ايتتى.
نۇرلىبەك دوسىباي, «ەگەمەن قازاقستان»
سۋرەتتەردى تۇسىرگەن ەرلان وماروۆ