قازاقستاندا ءوزىنىڭ قۇقىق بۇزۋشىلىعىن مويىنداعان كاسىپكەرلەرگە ايىپپۇل بويىنشا 50 پايىزدىق جەڭىلدىكتەر ۇسىنىلۋدا. بۇل تۋرالى بۇگىن «اتامەكەن» ۇكپ باسقارۋشى ديرەكتورى ايجان بيجانوۆا ءمالىم ەتتى, دەپ حابارلايدى قازاقپارات.
وسىنداي نورمالار زاڭدى تۇلعالارعا قاتىستى اكىمشىلىك قۇقىق بۇزۋشىلىق كودەكسىنە وزگەرتۋلەر ەنگىزۋ تۋرالى زاڭ جوباسىندا قاراستىرىلىپ وتىر.
«العاش رەت قىسقارتىلعان ىستەر ينستيتۋتى ەنگىزىلدى. بۇل تۇرعىدا كاسىپكەرلىك سۋبەكتىسى كىناسىن مويىنداعان جاعدايدا, زاڭنامادا بەكىتىلگەن تالاپتارعا سايكەس, بەلگىلى ءبىر مەرزىم ىشىندە وعان قاتىستى ايىپپۇل 50 پايىزعا قىسقارادى. ايىپپۇل تولەنگەننەن كەيىن اكىمشىلىك ءىس توقتاتىلادى», - دەدى ا. بيجانوۆا.
وسى ورايدا كاسىپكەر ۇزاققا سوزىلعان تالقىلاۋلاردان, ءتيىستى قۇجاتتاردى جيناۋ بارىسىنداعى قاعازباستىلىقتان قۇتىلادى دەپ كۇتىلۋدە.