مۇناي ءوندىرۋدىڭ جىلدىق كولەمى 81 ملن. تونناعا دەيىن ۇلعايتىلادى. بۇل تۋرالى بۇگىن ۇكىمەت وتىرىسىندا قر ەنەرگەتيكا ءمينيسترى قانات بوزىمباەۆ مالىمدەدى.
«ءبىرىنشى جارتىجىلدىققا ارنالعان جوسپارعا ەنەرگەتيكا مينيسترلىگىنىڭ 10 ءىس-شاراسى ەنگىزىلدى. بۇل تۇرعىدا مۇناي-گاز سالاسىنىڭ دامۋى ءۇشىن قاجەتتى شارالار قامتىلدى. بىرىنشىدەن, مۇناي ءوندىرۋدىڭ ناقتى كولەمى يندەكسىن 103,8 پايىزعا جەتكىزۋ ءۇشىن مۇناي ءوندىرۋدىڭ جىلدىق كولەمى 81 ملن. تونناعا دەيىن ۇلعايتىلادى. بۇل رەتتە قاشاعاننان - 5 ملن. توننا, تەڭىز كەن ورنىنان - 27,5 ملن. توننا, سونداي-اق قاراشىعاناق كەن ورنىنان 11,8 ملن. توننا مۇناي وندىرىلمەك. جارتىجىلدىقتا 40,7 ملن. توننا مۇناي ءوندىرۋ جوسپارلانىپ وتىر. ال مۇنايدىڭ ەكسپورتى 65 ملن. توننانى قۇرايدى», - دەدى بوزىمباەۆ.
ونىڭ سوزىنە قاراعاندا, گاز ءوندىرۋدىڭ فيزيكالىق يندەكسى 103, 6 پايىزعا جەتۋ ءۇشىن گاز ءوندىرۋدىڭ جىلدىق كولەمى 48, 1 ملرد. تەكشە مەترگە دەيىن ۇلعايتىلاتىن بولادى. وسى ورايدا قاشاعاننان - 3,1 ملرد. تەكشە مەتر, تەڭىزدەن- 14,4 ملرد. تەكشە مەتر, قاراشىعاناقتان -18 ملرد. تەكشە مەتر گاز قامتاماسىز ەتىلەدى. جالپى, ءبىرىنشى جارتىجىلدىقتا 24,5 ملرد. تەكشە مەتر گاز ءوندىرۋ جوسپارعا ەنگىزىلدى. بەلگىلى بولعانداي, ەكسپورت كولەمى 13, 7 ملرد. تەكشە مەترگە جەتكىزىلمەك.