جەر رەفورماسى جونىندەگى كوميسسيا 11 شەشىم قابىلداعان. بۇل تۋرالى جەر رەفورماسى جونىندەگى كوميسسيانىڭ قۇقىق ماسەلەلەرى جونىندەگى توبىنىڭ جەتەكشىسى مۇحتار تايجان ۇكىمەت وتىرىسىندا مالىمدەدى.
"بۇگىنگى تالقىعا سالىناتىن زاڭ جوباسى ەرەكشە ماڭىزدى دەپ بىلەمىن. وزدەرىڭىزگە ءمالىم, وتكەن جىلى بۇل زاڭ بارلىمىزعا اۋىر ءتيدى. وكىنىشكە قاراي, كەيبىر ازاماتتار قازاق حالقىنىڭ ءدىلىن, مەنتاليتەتىن تۇسىنبەي «جەردى ساتايىق» دەپ شىعا كەلدى. حالىق وعان قارسى بولىپ, مىنەزىن كورسەتتى. مۇنى ەلباسى كورىپ ءتۇسىندى. ول ارنايى كوميسسيا قۇردى. قۇرىلعان جەر كوميسسياسى بۇل ماسەلەنى بىرنەشە اي اقىلداسىپ, تالقىلاپ 11 شەشىم قابىلدادى. بۇگىنگى زاڭ جوباسى سول كوميسسيانىڭ شەشىمدەرى دايىندالدى", - دەدى ول.
سونداي-اق, ول وسى كوميسسيانىڭ قۇرامىندا جۇمىس ىستەگەنىن ايتتى. "كەيىن كوميسسيانىڭ وسىندا وتىرعان قر اۋىل شارۋاشىلىعى مينيسترلىگىنىڭ ماماندارىمەن بىرگە وسى زاڭ جوباسىن دايىندىق. بۇل جەردە العىسىمدى بىلدىرگىم كەلەدى. ۇلكەن كۇردەلى جۇمىس اتقارىلدى. زاڭ بويىنشا ءبىز قابىلداعان پروتوكولعا 100 پايىز cايكەس كەلەدى. وعان مەن كەپىل بەرەمىن. وزىمدە وسى جۇمىسقا قاتىستىم", - دەدى مۇحتار تايجان.
ال كونستيتۋتسيانىڭ 26-بابىنا قاتىستى مۇحتار تايجان بىلاي دەدى: "كونستيتۋتسياداعى وزگەرىستەرگە سايكەس 26-باپ وزگەرتىلگەلى جاتىر. مەنىڭ ويىمشا, سول باپتى سول قالپىندا قالدىرۋ كەرەك. ويتكەنى, بۇل ۇسىنىس وتە كۇماندى. لاتيفۋنديستەرگە وسى زاڭنىڭ ىشىندە نورمالار بار. ونى ەرلان نىسانباەۆ (قر اۋىل شارۋاشىلىعى ۆيتسە-ءمينيسترى اۆتور) ايتىپ كەتتى. ياعني ءبىر ادامعا نەمەسە ءبىر فيرماعا بەرىلەتىن جەردىڭ كولەمىنە شەكتەۋ بولادى. ول وتە ماڭىزدى. ويتكەنى, لاتيفۋنديزم دەگەن ۇعىمدى ءبىز جويىپ تاستاۋ كەرەك. جەر حالىققا تيمەي اۋىلدا جۇمىسسىزدىق بولادى. سوندىقتان ءبىز وعان ارنايى نازار اۋداعانىمىز ءجون. جەر تەك قازاقستان ازاماتتارىنا عانا بەرىلەدى".