قازاقستاننىڭ تاجىكستانداعى ەلشىسى نۇرلان سەيتىموۆ «روحي وحاني توچيكيستون» مبك باستىعى («تاجىكستان تەمىر جولى») كوميل ميرزواليمەن كەزدەستى, دەپ حابارلادى قر سىرتقى ىستەر مينيسترلىگى.
«كەزدەسۋدە ەكى ەلدىڭ وكىلدەرى تەمىرجول سالاسىنداعى, سونىڭ ىشىندە تاجىكستانعا قازاقستاندىق «Evolution» لوكوموتيۆتەرىن جەتكىزۋ بويىنشا ەكىجاقتى ءوزارا ءىس-قيمىل ماسەلەلەرىن تالقىلادى», - دەلىنگەن حابارلامادا.
تاجىكستاندىق تاراپ تاجىك تەمىر جولىنىڭ قاجەتتىلىكتەرى ءۇشىن قازاقستاندا وندىرىلگەن تەمىرجول ماشينا جاساۋ سالاسى ونىمدەرىنىڭ, ءبىرىنشى كەزەكتە رەلستەر مەن جارتىلاي ۆاگونداردىڭ جەتكىزىلۋىنە مۇددەلى ەكەنىن ءبىلدىردى. تاراپتار 2017 جىلعى 15-16 اقپاندا استانا قالاسىندا وتەتىن قازاقستان رەسپۋبليكاسى مەن تاجىكستان رەسپۋبليكاسى اراسىنداعى ەكونوميكالىق ىنتىماقتاستىق جونىندەگى ۇكىمەتارالىق كوميسسيانىڭ 13-ءشى وتىرىسى تەمىرجول سالاسىنداعى ىنتىماقتاستىققا قوسىمشا سەرپىن بەرەتىنىنە سەنىم بىلدىردى. اڭگىمە سوڭىندا قازاقستاندىق ديپلومات كوميل ميرزواليگە كەزدەسۋ ءۇشىن العىس ايتىپ, ستراتەگيالىق ارىپتەستىك رۋحىندا قازاقستان-تاجىكستان قارىم-قاتىناستارىن نىعايتۋدا جەمىستى ىنتىماقتاستىق جاساۋعا دايىن ەكەنىن جەتكىزدى.