بايزاق اۋدانىنداعى قىزىل جۇلدىز اۋىلى اۋماعىندا ورنالاسقان «رولا-7» جاۋاپكەرشىلىگى شەكتەۋلى سەرىكتەستىگىنىڭ اتى بۇل كۇندە ەلىمىزدىڭ بارلىق وڭىرلەرىنە, ءتىپتى بىرقاتار شەتەلدەرگە دە تانىمال. 2008 جىلى اشىلعان بۇل كاسىپورىن وزىندىك دامۋ جولىنا ءتۇسىپ, جەلىسىن كەڭگە جايا تۇسۋدە, دەپ حابارلادى وبلىس اكىمدىگى.
سەرىكتەستىك جانىنان جاڭادان «رولا-يان» كاسىپورنىنىڭ اشىلۋى سونىڭ ءبىر ايعاعىنداي. قىتايلىق ينۆەستور سياو حونۆەيدىڭ 288 ميلليون تەڭگە ينۆەستيتسيا سالۋىنىڭ ناتيجەسىندە اتالمىش كاسىپورىن «DL-650X» قوندىرعىسىمەن جاراقتاندىرىلىپ وتىر. وسى زاماناۋي تەحنولوگيا التى ءتۇرلى ۇزىن كەسپەنى جاساپ شىعارۋعا مۇمكىندىك بەرەدى. ول وزىمىزدە وندىرىلەتىن ۇن, تۇز, جۇمىرتقا سەكىلدى وتاندىق ونىمدەردەن دايارلانادى.
جوبا 2015–2019 جىلدارعا ارنالعان قازاقستان رەسپۋبليكاسىنىڭ يندۋستريالدى-يننوۆاتسيالىق دامۋ مەملەكەتتىك باعدارلاماسى اياسىندا جۇزەگە اسىرىلىپ وتىر.
«جۋىردا قازاقستان حالقىنا ارناعان جولداۋىندا ەلباسى ەكى جاڭعىرۋ كەزەڭىنەن ابىرويلى ءوتىپ, ءۇشىنشى جاڭعىرۋ كەزەڭىنە قادام باسقانىمىزدى ايتىپ, ۇكىمەت پەن وبلىس باسشىلارىنا ەكونوميكالىق دامۋدىڭ جاڭا مودەلدەرىن قۇرۋدى تاپسىردى. بۇل جاڭا جوبالاردىڭ جۇزەگە اسۋىنا, جاڭا جۇمىس ورىندارىنىڭ اشىلۋىنا مۇمكىندىك بەردى. وڭىرىمىزدە تاياۋ جىلداردا 35 جوبا جۇزەگە اسىپ, 5500 ادام جاڭا جۇمىس ورنىمەن قامتىلادى. ال بيىلدىڭ وزىندە 12 جوبا جۇزەگە اسۋى ءتيىس. مىنە, سول كوزدەلگەن جوبانىڭ العاشقىسى وسى – «رولا-يان» كاسىپورنى بولىپ وتىر. جاڭا نىسان قۇتتى بولسىن. وسىنداعى باسشىلار مەن جۇمىسشىلارعا تابىس تىلەيمىن!», – دەدى وبلىس اكىمىنىڭ ورىنباسارى ت. جانكە.
مۇندا تاۋلىگىنە 30 توننا ءونىم وندىرۋگە مۇمكىندىك بار. ازىرگە كۇن سايىن 25 توننا ۇن كەسپەسى دايىندالۋدا. ونىمدەرگە ەلىمىزدىڭ بارلىق ايماعىنان جانە رەسەي, قىتاي, وزبەكستاننان دا سۇرانىس بار ەكەن. ءتىپتى, كورشىلەس قىرعىز باۋىرلارىمىز دا بۇل ءونىمدى تۇتىنۋعا ىقىلاستى. كاسىپورىننىڭ بولاشاعى وتە زور.