«مەدەۋ» «مەدەۋ» بولعالى قازاقستاندىق سپورتشىلار ۋنيۆەرسيادا سىندى الامان جارىسقا العاش رەت ات سالىسقانىمەن, رەكورد جاڭعىرتا المادى. كونكيمەن جۇگىرۋشى ەكاتەرينا ايدوۆانىڭ ەكى مارتە العان قولا مەدالىنە مالداندىق. بارلىعى 23 ەلدەن كەلگەن 170 كونكيشىنىڭ اراسىندا, ءتىپتى, ءبىزدىڭ سپورتشىلارىمىز قالىڭ شاڭنىڭ اراسىنان كورىنبەي قالدى. وكىنىشتى-اق...
بۇگىن اتاقتى مۇز ايدىنىندا كونكي جارىسىنان ماسس-ستارتتان سوڭعى جارىستار ءوتتى. جۇلدەسىزبىز... ءبىز بيىك تاۋداعى «مەدەۋ» سپورت كەشەنىنىڭ ۋنيۆەرسيادالىق ويىندارعا بايلانىستى باس مەنەدجەرى دۋلات كەيكيندى اڭگىمەگە تارتقان ەدىك.
– دۋلات جاردەم ۇلى, قازاق جەرىندە العاش رەت وتكىزىلىپ تۇرعان حالىقارالىق قىسقى جارىستا «مەدەۋ» سپورت كەشەنىنىڭ جولى بولمادى ما, الدە سپورتشىلاردىڭ اسىعى الشىسىنان تۇسپەي قويدى ما؟
– بيىك تاۋداعى «مەدەۋ» سپورت كەشەنىنىڭ «رەكوردتار ۇستاحاناسى» دەگەن اتى بار. 1972 جىلدان بەرى وسى مۇز ايدىنىندا 120 رەت الەمدىك رەكورد جاڭارتىلدى. ونى جەر شارى مويىنداعان, ەندەشە, بۇعان ايدىننىڭ ەش قاتىسى جوق. نەگىزى, «مەدەۋ» مۇمكىندىكتەر بەرگەن ەدى...
– ول كەزدەگى «مەدەۋ» مەن قازىرگى «مەدەۋدى» سالىستىرۋعا بولا ما؟
– ارينە, بولادى. مۇز ايدىنىنا قاشان دا كەشەن جانىنداعى سۋ قويماسىنان مولدىرەگەن تاۋ سۋى قۇيىلىپ, مۇز قاتىرىلادى.
– الاتاۋدىڭ مۇزداقتارىنان تۇزىلگەن ول سۋدىڭ سپورتقا قانداي قاتىسى بار, سپورتشىعا ماڭىزدىسى قاتقان مۇز ەمەس پە؟
– مۇزداق سۋى كىرشىكسىز, ءتىپتى, ونىڭ قۇرامىندا كادىمگى ءبىز ءىشىپ جۇرگەن سۋدىڭ قۇرامىنداعى ءبىرتالاي مينەرالدى قوسپالار دا جوقتىڭ قاسى. مۇنداي مۇزدا سپورتشى دا جۇلدىزداي اعادى. كونكي مەن مۇز اراسىنداعى ءۇيكەلىس مەيلىنشە جەڭىلدەيدى. مۇنى كونكيشىلەرىمىز دە جاقسى بىلەدى...
– «مەدەۋ» سپورت كەشەنى ايدىنىنىڭ باستى ەرەكشەلىگى وسى عوي سوندا؟
– ءيا, باستى ەرەكشەلىگى مۇزدىڭ كريستالداي تازالىعىندا. ارينە, ونىڭ بيىك تاۋدىڭ قويناۋىندا ورنالاسقانىنىڭ دا سەبەبى زور.
– ەندەشە, دۇنيەجۇزىلىك قىسقى سپورت سايىسىندا «مەدەۋدە» نەگە جەرلەستەرىمىز ءجۇلدەسىز قالدى؟
– رەكوردتى سپورتشى جاسايدى, كەشەن – تىركەيدى. جەڭىس – سپورتشىنىڭ قانداي دايىندىقپەن كەلگەنىنە بايلانىستى.
– كونكيمەن جارىسۋشىلار سايىسى باستالعاندا, مەدەۋ شاتقالىندا جاپالاقتاپ قار جاۋدى. ءبىزدىڭ سپورتشىلارىمىزعا تابيعاتتىڭ توسىن وسى قۇبىلىسى قاتتى اسەر ەتتى دەگەنگە نە ايتار ەدىڭىز؟
– شيرەك عاسىردان استام ۋاقىت وسىندا جاتتىعاتىن سپورتشىلارمەن جۇمىس ىستەدىم, «مەدەۋ» سپورت كەشەنىندە قىزمەت اتقاردىم. مەنىڭ بىلەتىنىم, كەرىسىنشە, تۋعان جەردىڭ كيەسى سپورتشىلاردى قولدايدى دەپ جاتادى.
– دەيتۇرعانمەن, تاۋ شاتقالىنداعى توپەلەپ جاۋعان قار قىرسىعىن از تيگىزبەگەن شىعار؟
– مەن مۇزداتۋ تەحنولوگياسىنىڭ ينجەنەرىمىن. بۇل سۇراعىڭىزعا ەلىمىزدىڭ كونكيمەن سىرعاناۋشىلار قۇراماسىنىڭ باس باپكەرى, اتاقتى كونكيشىمىز ليۋدميلا پروكاشەۆانىڭ جاۋاپ قايتارعانى دۇرىس دەپ ويلايمىن.
– باس باپكەر جاپالاقتاپ جاۋعان قاردىڭ استىندا تۇرىپ, قازاقستاندىقتاردىڭ ۇكىلى ءۇمىتىندەي بولعان ەكاتەرينا ايدوۆاعا قاتىستى «اۋا رايى نەعۇرلىم قولايسىز بولسا, بىزگە سولعۇرلىم ءتيىمدى», دەپ ەدى. ءبىز كۋامىز...
– سپورتتىڭ قۋانىشى مەن وكىنىشى قاتار جۇرەدى. ەڭ باستىسى – الەمدىك ۋنيۆەرسيادا سپورتشىلارىنا «مەدەۋ» ادەتتەگىدەي جىلى قاباق تانىتتى. داۆيدە دجوتتو (يتاليا) مەن الەكساندرا كاچۋركينا (رەسەي) التىن, سەيتارو يچينوحە مەن نانا تاكاحاشي كۇمىس, لينۋس حايتدەگگەر (اۆستريا) قولا مەدالدى ەلىنە وسى جەردەن الىپ كەتتى عوي. باس جاتتىقتىرۋشى ايتقانداي تابيعات, ياعني, «مەدەۋ» ءبىزدىڭ سپورتشىلارىمىزعا حال-قادەرىنشە كومەكتەستى...
– اڭگىمەڭىزگە راحمەت.
اڭگىمەلەسكەن
تالعات ءسۇيىنباي,
«ەگەمەن قازاقستان»
الماتى