ەلىمىزدە جەكە سوت ورىنداۋشىلار سانى ارتىپ كەلەدى

بيىل مەملەكەتتىك سوت ورىنداۋشىلاردىڭ سانى 30 پايىزعا قىسقارتىلدى. بۇل تۋرالى ورتالىق كوممۋنيكاتسيالار قىزمەتىندە «ۇلت جوسپارىنىڭ 27-قادامى اياسىندا زاڭ ۇستەمدىگىن قامتاماسىز ەتۋ» تاقىرىبىندا وتكەن ءباسپاسوز ءماسليحاتىندا ادىلەت مينيسترلىگى سوت اكتىلەرىن ورىنداۋ دەپارتامەنتى ديرەكتورىنىڭ مىندەتىن اتقارۋشى ەرنار ىبىراەۆ ءمالىم ەتتى. ونىڭ ايتۋىنشا, 2016 جىلدىڭ قاڭتارىنان باستاپ جەكە سوت ورىنداۋشىلاردىڭ قۇزىرەتىنە مەملەكەتتەن ءوندىرۋ, مەملەكەت پايداسىنا 1000 اەك-تەن استام (2 ملن 120 مىڭ تەڭگەگە جۋىق) سومانى ءوندىرۋ, مەملەكەت مۇددەسىن كوزدەيتىن جەر ۋچاسكەلەرىنەن قونىستاندىرۋ, ۇيلەردى بۇزۋ, جەر ۋچاسكەلەرىن الىپ قويۋدى قوسپاعاندا, وزگە اتقارۋشىلىق قۇجاتتاردىڭ بارلىق ساناتتارىن ورىنداۋ بەرىلدى. «قازىرگى تاڭدا جەكە سوت ورىنداۋشىلاردىڭ سانى 1348 تۇلعانى قۇرايدى, ولاردىڭ كومەكشىلەرىن قوسقاندا, جەكە سوت ورىنداۋ جۇمىستارىنا 4 مىڭعا جۋىق ادام جۇمىلدىرىلعان. بيىل مەملەكەتتىك سوت ورىنداۋشىلار سانى 30%-عا قىسقارتىلدى. سونداي-اق, 2017 جىلى ولاردىڭ 30%-ىن جانە 2018 جىلى 15%-ىن قىسقارتۋ جوسپارلانىپ وتىر. ناتيجەسىندە, 518 مەملەكەتتىك سوت ورىنداۋشىنى قالدىرۋ كوزدەلۋدە», – دەپ اتاپ ءوتتى ە. ىبىراەۆ. ايتا كەتەيىك, 2016 جىلى جەكە سوت ورىنداۋشىلار وندىرىسىندە 2 ميلليونعا جۋىق اتقارۋ ءوندىرىسى بولدى. بۇل مەملەكەتتىك سوت ورىنداۋشىلاردىڭ كورسەتكىشىنەن 1,2 ميلليونعا ارتىق. ايدار ورىسباەۆ, «ەگەمەن قازاقستان»