رەسەيدىڭ كۋرورتتى سوچي قالاسىندا شاحماتتان مەكتەپ وقۋشىلارى اراسىندا الەم چەمپيوناتى بولىپ ءوتتى. وندا قازاقستاندىق مەرۋەرت كاماليدەنوۆا (سۋرەتتە) قولا جۇلدەگەر اتاندى.
چەمپيوناتقا الەمنىڭ 30 ەلىنەن 400-دەن استام جاس سپورتشى قاتىستى. ول 7, 9, 11, 13, 15 جانە 17 جاستاعى ۇلدار مەن قىزداردى باسەكەگە ءتۇسىردى. استانا قالاسىنىڭ مەكتەپ وقۋشىسى مەرۋەرت كاماليدەنوۆا 11 جاستاعى قىزدار اراسىندا سىنعا ءتۇستى. شۆەيتسار جۇيەسىمەن 9 تۋردان تۇراتىن تارتىپپەن وتكەن دودادا ول 6,5 ۇپاي جينادى. ال 7,5 ۇپايى بار ۇندىستاندىق پ. دحايانا – ءبىرىنشى, 7 ۇپايلى رەسەيلىك ە. ناسىروۆا ەكىنشى ورىنداردى جەڭىپ الدى.
ءبىزدىڭ جاس زياتكەرلەرىمىز اراسىندا مارەگە نازەركە نۇرعالي (13 جاس) – ءتورتىنشى, ايالىم قالداروۆا (9 جاس) – بەسىنشى, رامازان جالماحانوۆ (15 جاس) – التىنشى, ال ءادىل ساتىبالدى (7 جاس), ەلەنا سلەسارۋك (17 جاس) جانە تەمىرلان سافارعاليەۆ (17 جاس) توعىزىنشى بولىپ جەتتى.
ءسوچيدىڭ «گراند وتەل جەمچۋجينا» مەيمانحاناسىندا قانات جايعان چەمپيوناتتا وزبەكستاندىق ا.حماداموۆا مەن موڭعوليالىق ن.سودبيلەگت (7 جاس), ازەربايجاندىق س.گاسيموۆا مەن رەسەيلىكتەر ل.لىستسوۆ (9 جاس), ي.ماكوۆەەۆ (11 جاس), امەريكالىق ن.باشكانسكي مەن وزبەكستاندىق ن. ابدۋساتتوروۆ (13 جاس), ۇندىستاندىق ا. حارشيني مەن رەسەيلىكتەر و. بىكوۆ (15 جاس), ا.دميتريەۆا مەن تۇرىكمەنستاندىق س.اتاباەۆ (17 جاس) توپ جاردى.
تۋرنيردە بارلىعى 4 التىن, 6 كۇمىس جانە 3 قولا مەدال جەڭىپ العان رەسەي قۇراماسى ءبىرىنشى ورىنعا شىقتى. مۇنداي چەمپيونات الەمدە 2000 جىلدان بەرى ءوتىپ كەلەدى. وندا چەمپيون اتانىپ, جۇلدەگەرلەر تۇعىرىنان كورىنگەن قازاقستاندىق جاس شاحماتشىلار از بولعان جوق.
ايان ءابدۋالي,
«ەگەمەن قازاقستان»
استانا