تۇركيا قازاقستان, ازەربايجان جانە قىرعىزستانعا ءوزارا ساۋدا وپەراتسيالارىندا ۇلتتىق ۆاليۋتامەن ەسەپتەسۋدى جانداندىرۋدى ۇسىندى.
«تۇركيا ۇلتتىق ۆاليۋتامەن ساۋدا جاساۋعا ۇلكەن ءمان بەرەدى جانە ەلدىڭ ساۋدا اينالىمىنداعى ونىڭ ۇلەسىن 10 پايىزعا جەتكىزۋدى كوزدەيدى», – دەپ ءمالىم ەتتى سارسەنبىدە, باكۋدە تۇركىتىلدەس ەلدەر ىنتىماقتاستىعى كەڭەسىنە كىرەتىن مەملەكەتتەردىڭ ەكونوميكا مينيسترلەرىنىڭ VI كەزدەسۋىندە تۇركيانىڭ ەكونوميكا ءمينيسترى نيحات زەيبەكچي, دەپ جازادى «ينتەرفاكس-ءازىربايجان».
كەڭەس قۇرامىنا ازەربايجان, تۇركيا, قازاقستان جانە قىرعىزستان كىرەدى.
نيحات زەيبەكچيدىڭ ايتۋىنشا, تۇركيانىڭ جىلدىق ساۋدا اينالىمى 430 ملرد دوللاردى قۇرايدى, ونىڭ تەك 1 پايىزى عانا كەڭەس قۇرامىنا كىرەتىن ەلدەرمەن ساۋدا-ساتتىققا تيەسىلى. «جىبەرىپ العان قاتەلىكتەرىمىزدى تۇزەپ, ءوزارا ساۋدانى جانداندىرۋىمىز كەرەك», – دەپ مالىمدەدى مينيستر.
ول سونداي-اق ەلەكتروندى ساۋدا سالاسىندا ىنتىماقتاستىقتىڭ ماڭىزدىلىعىن اتاپ ءوتتى. ءسوز العان قازاقستاننىڭ ەكونوميكا ءمينيسترىنىڭ ورىنباسارى ايدار ارىپباەۆ ينۆەستيتسيا, ساۋدا, ترانزيت سالالارىندا ىنتىماقتاستىق پەرسپەكتيۆالارىنىڭ بار ەكەنىن مالىمدەدى. ول كەڭەسكە كىرەتىن ەلدەردىڭ ەكونوميكالىق ىنتىماقتاستىق باعدارلاماسىن ازىرلەۋدى ۇسىندى.