استانا قالاسىنىڭ اكىمى اسەت يسەكەشەۆ ەلوردانىڭ تەمىرجول ۆوكزالىنىڭ ماڭىنداعى جاعدايدى تەكسەردى, دەپ حابارلايدى قازاقپارات.
تەمىرجول ۆوكزالى مەن «ساپارجاي» باسشىلارى اكىمگە ءمالىم ەتكەندەي, ۆوكزال ماڭىنداعى اقىلى اۆتوتۇراق جۇيەسى اۋەجاي ماڭىنداعى اتۆوتۇراق سياقتى جۇمىس ىستەيدى. بۇل جەردە دە باستاپقى 20 مينۋتى تەگىن بولسا, كەيىن ءار ساعاتى ءۇشى 200 تەڭگە الىنادى. تەگىن ورىندار اككرەديتاتسيادان وتكەن تاكسي جۇرگىزۋشىلەرىنە عانا بەرىلەدى.
ال, «ساپارجاي» اۆتوۆوكزالىمەن ىنتىماقتاستىققا كەلمەگەن تاكسي جۇرگىزۋشىلەرىنە تەگىن ورىندار بەرىلمەيدى. بۇل تاكسي جۇرگىزۋشىلەرى كوبىنە استانا-پاۆلودار, استانا -قاراعاندى, استانا-كوكشەتاۋ باعىتتارىندا جولاۋشى تاسىمالداپ كەلەدى. ەگەر ولار اككرەديتاتسيادان وتپەسە, باسقا اۆتوكولىك يەلەرى سياقتى اقشا تولەيتىن بولادى.
سونداي-اق, قالا باسشىسى اسەت يسەكەشەۆ مۇگەدەكتەرگە ارنالعان ورىنداردى دايىنداۋدى تاپسىردى.
«بۇل جەردى رەتكە كەلتىرۋ ءۇشىن قانشا ۋاقىت كەرەك؟» دەگەن اكىمنىڭ سۇراعىنا جاۋاپتى ادامدار 10 قاڭتارعا دەيىن جولاۋشىلار لەگى كوپ بولاتىنىن, سوندىقتان, وزگەرىستەردى مەرەكەلەردەن كەيىن ەنگىزۋ كەرەكتىگىن ايتتى. بىراق, حالىققا ءتۇسىندىرۋ جۇمىستارى قازىردەن باستالادى.
«10 قاڭتارعا دەيىن پاركينگ دە, مۇگەدەكتەرگە ارنالعان ورىن دا, تاكسيلەر دە رەتتەلەتىن بولسىن,-دەپ تاپسىردى قالا باسشىسى.
ايتا كەتەيىك, استانا تۇرعىندارى مەن قوناقتارى تەمىرجول ۆوكزالىنىڭ ماڭىندا كەلىپ-كەتۋشىلەر ءۇشىن كولىك قوياتىن ورىن جوق ەكەنىن جانە ۆوكزالدان شىققان كەزدە, تاكسيلەر جول بەرمەيتىنىن ايتىپ, اكىمگە شاعىم تۇسىرگەن بولاتىن.