ءىجو – 0,8%
پرەمەر-مينيستر باقىتجان ساعىنتاەۆتىڭ توراعالىعىمەن وتكەن ۇكىمەت وتىرىسىندا بيىلعى جىلدىڭ 11 ايىنداعى الەۋمەتتىك-ەكونوميكالىق دامۋ جانە بيۋدجەتتىڭ اتقارىلۋ قورىتىندىلارى قارالدى. سونىمەن قاتار, «ستاندارتتاۋ تۋرالى» جانە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ولشەم بىرلىگىن قامتاماسىز ەتۋ جانە ستاندارتتاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوبالارى تالقىلاندى. «بيىلعى جىلدىڭ قاڭتار-قاراشا ايلارىندا ەكونوميكانىڭ جەدەل ءوسىمى بايقالدى. تاۋار ءوندىرىسىنىڭ ءوسۋى 0,9 پايىزدى, كورسەتىلەتىن قىزمەتتەر 0,6 پايىزدى, ونىمدەرگە سالىناتىن سالىق 2,4 پايىزدى قۇرادى», دەدى ۇلتتىق ەكونوميكا ءمينيسترى ق.بيشىمباەۆ ەلدىڭ ەكونوميكالىق دامۋى جايىنداعى بايانداماسىندا. ءمينيستردىڭ مالىمدەۋىنشە, بۇل وڭ ءۇردىس ەكونوميكانى ءارتاراپتاندىرۋ, ينفراقۇرىلىمدى, كاسىپكەرلىك پەن اگروونەركاسىپ كەشەنىن دامىتۋ جونىندەگى باعدارلامالار مەن جوسپارلاردى, سونداي-اق, جۇمىسپەن قامتۋ شارالارىن ىسكە اسىرۋ ارقىلى قامتاماسىز ەتىلدى. سونداي-اق, ەلدە ىسكەرلىك جانە ينۆەستيتسيالىق بەلسەندىلىك ساقتالۋدا, قارجى نارىعىنداعى احۋال تۇراقتى, قۇرىلىس, اۋىل شارۋاشىلىعى, كولىك جانە وڭدەۋ ونەركاسىبى سياقتى سەكتورلار ەكونوميكا ءوسىمىنىڭ نەگىزگى كۇشىنە اينالعان.ونەركاسىپتىڭ ءوسۋى – 4%
سونىمەن قاتار, ونەركاسىپتە دە وڭ ۇردىستەر بايقالۋدا. ماسەلەن, ونەركاسىپتىڭ ءوسۋى قازانمەن سالىستىرعاندا, قاراشادا 4 پايىزدى, وتكەن جىلعى قازانمەن سالىستىرعاندا 1,1 پايىزدى قۇرادى. كەن-مەتاللۋرگيا ونەركاسىبىنە قاراعاندا, جوعارى قالىپتاسقان وڭدەۋ ونەركاسىبىنىڭ وزىق ءوسۋ قارقىنى ونەركاسىپتەگى نەگىزگى ءوسۋ كوزىنە اينالدى. وڭدەۋ ونەركاسىبىندە مەتاللۋرگيا ونىمدەرىنىڭ ءوندىرىسى 6,8 پايىزعا, ازىق-ت ۇلىك 3,8 پايىزعا, فارماتسەۆتيكالىق ونىمدەر 2,8 پايىزعا, كوكس جانە مۇناي ونىمدەرى 0,3 پايىزعا ۇلعايدى. ماشينا جاساۋ سالاسىندا وتكەن جىلى ءوندىرىستىڭ تومەندەگەنىنە قاراماستان بيىل جاقسى ءوسىم بار. ماسەلەن, بۇل سالاداعى ءوندىرىس قازانعا قاراعاندا, قاراشادا 12,6 پايىزعا وسكەن. سونداي-اق, مۇناي, كومىر مەن تەمىر كەنىن ءوندىرۋ جاقسارىپ كەلەدى. ايتالىق, قاراشادا مۇناي ءوندىرۋ 2015 جىلعى قاراشامەن سالىستىرعاندا 3 پايىزعا ارتتى. ناتيجەسىندە 11 ايدىڭ قورىتىندىسى بويىنشا مۇناي ءوندىرۋ جوسپارىن 2,4 پايىزعا اسىرا ورىنداۋ قامتاماسىز ەتىلدى. جوسپارداعى 69,2 ملن توننانىڭ ورنىنا 70,8 ملن توننا ءوندىرىلدى. بيىل قىركۇيەكتىڭ سوڭىندا قاشاعان كەن ورنىنىڭ ىسكە قوسىلۋى مۇناي ءوندىرىسىنىڭ نەگىزگى ءوسۋ فاكتورىنا اينالدى, بۇل تاۋلىگىنە 75 مىڭنان استام باررەل قوسىمشا مۇناي ءوندىرىسىن قامتاماسىز ەتتى. قورىتىندى كورسەتكىشتەر ەلىمىزدىڭ وسىمدىك شارۋاشىلىعىندا دا ىلگەرىلەۋشىلىك بارىن اڭعارتتى. وسى سالا ءوندىرىسىنىڭ 5,9 پايىزعا ۇلعايۋى ەسەبىنەن اۋىلشارۋاشىلىق ءونىمىنىڭ ءوسۋى 4,5 پايىزدى قۇرادى. ال مال شارۋاشىلىعى ءونىمىن ءوندىرۋ 2,6 پايىزعا ۇلعايدى.تۇرعىن ءۇي – 16,1%
تۇرعىن ءۇي قۇرىلىسى مەن «نۇرلى جول» مەملەكەتتىك باعدارلاماسى شەڭبەرىندە ينفراقۇرىلىمدىق جوبالاردى ىسكە اسىرۋ ەسەبىنەن قۇرىلىس جۇمىستارىنىڭ دا كولەمى 7,5 پايىزعا ۇلعايدى. 2016 جىلعى قاڭتار-قاراشادا تۇرعىن ۇيلەردى پايدالانۋعا بەرۋ 16,1 پايىزعا, ياعني 8,9 ملن شارشى مەترگە دەيىن وستى, بۇل جالپى 2015 جىلى تۇرعىن ءۇيدى پايدالانۋعا بەرۋدىڭ جىلدىق كولەمىنە سايكەس كەلىپ وتىر.ينۆەستيتسيا – 4,7%
ينۆەستيتسيالار كولەمىنىڭ 11 ايداعى كورسەتكىشى دە كوڭىل قۋانتادى. ول 4,7 پايىزعا, ياعني 6 ترلن تەڭگەگە دەيىن ءوستى. جالپى العاندا, «نۇرلى جول», يندۋستريالىق-يننوۆاتسيالىق دامۋ, سونداي-اق, داعدارىسقا قارسى باعدارلامالار شەڭبەرىندە يندۋستريالىق-يننوۆاتسيالىق جانە ينفراقۇرىلىمدىق جوبالاردى ىسكە اسىرۋ وسۋگە ىقپال ەتتى. جىل باسىنان بەرى تىكەلەي شەتەلدىك ينۆەستيتسيالاردىڭ وڭ قارقىنىن اتاۋعا بولادى. ماسەلەن, اعىمداعى جىلعى قاڭتار-قىركۇيەكتە تىكەلەي شەتەلدىك ينۆەستيتسيالاردىڭ تازا اعىنى 12,1 ملرد اقش دوللارىن قۇرادى, بۇل – وتكەن جىلعى دەڭگەيدەن 4,4 ەسەگە جوعارى.ينفلياتسيا – 7,5%
سىرتقى ساۋدانىڭ دا سەرپىنى ارتقان. ماسەلەن, اعىمداعى جىلعى ون ايدىڭ ىشىندە سىرتقى ساۋدا اينالىمى 49,3 ملرد اقش دوللارىنا جەتتى, تومەندەۋ قارقىنى اعىمداعى جىلدىڭ ءبىرىنشى جارتىجىلدىعىنداعى 30,4 پايىزبەن سالىستىرعاندا 24,4 پايىزعا دەيىن باياۋلادى. ەكسپورت 29,1 ملرد اقش دوللارىن, يمپورت 20,2 ملرد اقش دوللارىن قۇرادى. سىرتقى ساۋدا تەڭگەرىمىنىڭ وڭ سالدوسى 8,9 ملرد اقش دوللارىن قۇرادى. ال ەلدىڭ حالىقارالىق رەزەرۆتەرى, ۇلتتىق قوردىڭ اكتيۆتەرىن قوسا العاندا, 90,9 ملرد اقش دوللارى بولدى. 2016 جىلدىڭ باسىنان باستاپ ينفلياتسيا 7,5 پايىزعا جەتتى. ازىق-ت ۇلىك تاۋارلارى 7,8 پايىزعا, ازىق-ت ۇلىك ەمەس تاۋارلاردىڭ باعاسى 8,6 پايىزعا قىمباتتادى. جىل باسىنان بەرى جۇمىسسىزدىق دەڭگەيى 5 پايىزدى قۇرادى.بيۋدجەت كىرىسى – 5,8 ترلن تەڭگە
«11 ايداعى مەملەكەتتىك بيۋدجەتتىڭ اتقارىلۋى بيۋدجەتتىڭ بارلىق دەڭگەيلەرىندەگى كىرىستەر ءوسىمىنىڭ جوعارى قارقىنىمەن بەلگىلەندى. قازىردىڭ وزىندە مەملەكەتتىك بيۋدجەتكە وتكەن جىلدىڭ جىلدىق كولەمىنىڭ دەڭگەيىندە كىرىستەر ءتۇستى. مەملەكەتتىك بيۋدجەت شىعىستارىنىڭ سوماسى وتكەن جىلدىڭ ءسايكەس كەزەڭىمەن سالىستىرعاندا 1,5 ترلن تەڭگەگە ارتىق تولەندى. قارجى مينيسترلىگى مەملەكەتتىك ورگاندارمەن بىرلەسىپ, اعىمداعى جىلدىڭ قىركۇيەك ايىنان باستاپ ناقتىلانعان بيۋدجەتتىڭ ءىس-شارالارىن ورىنداۋ بارىسىنا مونيتورينگ جۇرگىزدى. اپتا سايىن بيۋدجەت قاراجاتىن يگەرۋ ماسەلەلەرى جونىندە مەملەكەتتىك ورگاندارمەن سەلەكتورلىق كەڭەستەر وتكىزىلدى. وسى ءىس-شارالاردىڭ ارقاسىندا وتكەن جىلدىڭ كورسەتكىشتەرىمەن سالىستىرعاندا يگەرۋ قارقىنى اناعۇرلىم جاقسى», دەدى قارجى ءمينيسترى ب.سۇلتانوۆ. قارجى ءمينيسترىنىڭ ايتۋىنشا, مەملەكەتتىك بيۋدجەتكە 5,8 ترلن تەڭگە كولەمىندە كىرىس (ترانسفەرتتەردى قوسپاعاندا) ءتۇستى. مەملەكەتتىك بيۋدجەت بويىنشا اسىرا ورىنداۋ سوماسى 396 ملرد تەڭگەنى, رەسپۋبليكالىق بيۋدجەت بويىنشا 255 ملرد تەڭگەنى جانە جەرگىلىكتى بيۋدجەت بويىنشا 141 ملرد تەڭگەنى قۇرادى. «11 ايدا وتكەن جىلدىڭ وسى كەزەڭىنە قاراعاندا مەملەكەتتىك بيۋدجەت كىرىستەرى 31,8, رەسپۋبليكالىق بيۋدجەت كىرىستەرى 41,1 جانە جەرگىلىكتى بيۋدجەت كىرىستەرى 13,6 پايىزعا ءوستى. تۇتاستاي العاندا, مەملەكەتتىك بيۋدجەتتىڭ كىرىستەرى 107,3, رەسپۋبليكالىق بيۋدجەتتىكى 106,6 جانە جەرگىلىكتى بيۋدجەتتىكى 109,1 پايىزعا اتقارىلدى», دەدى سۇلتانوۆ. ۇكىمەت وتىرىسىندا ەلدىڭ الەۋمەتتىك-ەكونوميكالىق دامۋى جايىندا ينۆەستيتسيالار جانە دامۋ ءمينيسترى جەڭىس قاسىمبەك, ەنەرگەتيكا ءمينيسترى قانات بوزىمباەۆ, اۋىل شارۋاشىلىعى ءمينيسترىنىڭ ءبىرىنشى ورىنباسارى قايرات ايتۋعانوۆ, ۇلتتىق بانك ءتوراعاسى دانيار اقىشەۆ, «بايتەرەك» ۇلتتىق باسقارۋشى حولدينگى» باسقارماسىنىڭ ءتوراعاسى ەربولات دوساەۆ, «سامۇرىق-قازىنا» ۇلتتىق ءال-اۋقات قورى باسقارماسىنىڭ توراعاسى ومىرزاق ءشوكەەۆ جانە بىرقاتار وبلىس اكىمدەرى ەسەپ بەردى. پرەمەر-مينيستر ب.ساعىنتاەۆ وتىرىس قورىتىندىسىندا اتالعان ۆەدومستۆولار مەن ءوڭىر باسشىلارىنا بيۋدجەتتەن ءبولىنگەن قارجىنى ۋاقتىلى يگەرۋدى تاپسىردى. پرەمەر-مينيستر, سونداي-اق, ەكونوميكادا جاقسى كورسەتكىشتەر بايقالاتىنىن, جىل باسىمەن سالىستىرعاندا بارلىق وڭىردە وڭ ۇدەرىستەر بار ەكەنىن, سوعان ساي بيىلعى جىلدىڭ قورىتىندىسىندا ءىجو دەڭگەيىن 1 پايىزعا جەتكىزۋگە مۇمكىندىك بار ەكەنىن جەتكىزدى. سونىمەن قاتار, ۇكىمەت باسشىسى بيۋدجەت قارجىسىنىڭ يگەرىلۋىنە, اسىرەسە, «نۇرلى جول» باعدارلاماسى اياسىنداعى بيۋدجەت قارجىسىنىڭ يگەرىلۋ بارىسىنا نازار اۋداردى. «وڭىرلەرگە باعىتتالعان بارلىق قاراجاتتى يگەرۋ كەرەك, قارجى ءمينيسترى ورتالىق اتقارۋشى ورگاندارمەن مونيتورينگ جاساۋى قاجەت», دەدى ب.ساعىنتاەۆ. دينارا بىتىكوۆا, «ەگەمەن قازاقستان»