ەستەرىڭىزدە بولسا, بيىلعى جىلدىڭ تامىز ايىندا 2020 جىلى توكيودا وتەتىن وليمپيادا ويىندارىنىڭ ساناتىنا كاراتە-دو «WKF» شىعىس جەكپە-جەگى ەنگىزىلگەن بولاتىن. كوپتەن كۇتتىرىپ قابىلدانعان وسىنداي شەشىم مەن ەل تاۋەلسىزدىگىنىڭ 25 جىلدىعىنا وراي استانادا «ۇزدىك كاراتە» اتتى سەمينارلار سەرياسى ۇيىمداستىرىلدى.
ايتۋلى شارانىڭ باستى قوناعى رەتىندە كسرو-نىڭ سپورت شەبەرى, قارا بەلبەۋ يەگەرى, WKF كاراتە-دو- دان رەسەي قۇراماسىنىڭ باس باپكەرى ولەگ تسوي قاتىستى. م.وتەمىس ۇلى اتىنداعى جيىندا ءتۇرلى ءادىس-تاسىلدەردى قولدانۋ ەرەجەلەرى كورسەتىلىپ, مەكتەپ وقۋشىلارىنان بەلبەۋ ساناتى بويىنشا اتتەستاتسيا قابىلداندى.
كاراتە-دو «WKF» جانە ءداستۇرلى جەكپە-جەك تۇرلەرى فەدەراتسياسىنىڭ مۇرىندىق بولۋىمەن وتكەن سەميناردا توكيو وليمپياداسىنا ۇكىلەپ الىپ باراتىن سپورتشىلاردى دايىنداۋ مەن اتالعان سپورت ءتۇرىن ەل ىشىندە كەڭىنەنناسيحاتتاۋ جايى دا تالقىلاندى. ورايى كەلگەندە كاراتە-دو «WKF» جانە ءداستۇرلى جەكپە-جەك تۇرلەرى فەدەراتسياسىنىڭ پرەزيدەنتى مەيرامگۇل دۋكۋەۆا بىرقاتار ماقسات, مىندەتتەرمەن ءبولىستى.
«بۇگىنگى تاڭدا استانادا سپورتتىڭ وسى تۇرىمەن اينالىساتىندار سانى 600-گە جۋىقتايدى. ولاردىڭ ىشىندە جوعارى جەتىستىكتەردى باعىندىرعاندارى دا از ەمەس. اسىرەسە, اعايىندى قابدۋللاەۆتاردىڭ بولاشاعىنان زور ءۇمىت كۇتەمىز. ماسەلەن, ءبىز جاقىندا عانا يندونەزيادا وتكەن ازيا چەمپيوناتىندا جاقسى ناتيجەگە قول جەتكىزدىك. وندا اعايىندى قابدۋللاەۆتار «كاتو», «كۋميتە» باعدارلاماسى بويىنشا ونەر كورسەتىپ, ءۇشىنشى ورىن يەلەندى. بۇدان باسقا تاعى ەكى جەتكىنشەگىمىز جوعارى بالل جيناي الدى. ەندى ولاردى دامىتۋ ءۇشىن تاجىريبە جيناقتاپ, شەبەرلىگىمىزدى شىڭداۋىمىز قاجەت. بۇگىنگىدەيجيىندى ۇيىمداستىرۋداعى ماقساتىمىزدىڭ نەگىزگى ءمانىسى وسى», دەدى م.دۋكۋەۆا.
ايتا كەتەيىك, وسى كەزگە دەيىن الەم چەمپيونى اتانعان الىشەر قابدۋللاەۆ قازاقستاننىڭ ەكى دۇركىن چەمپيونى جانە مەكتەپ وقۋشىلارى اراسىنان شاكىرت تاربيەلەيتىن ونەگەلى ۇستاز.
نۇرلىبەك دوسىباي, «ەگەمەن قازاقستان»