ورالدا بەلگىلى ديريجەر, قازاقستان كومپوزيتورلار وداعىنىڭ مۇشەسى, مەملەكەتتىك «دارىن» جاستار سىيلىعىنىڭ لاۋرەاتى, «قۇرمەت» وردەنىنىڭ يەگەرى ەركىن نۇرىمبەتوۆتىڭ «اقجايىق سازدارى» اتتى جاڭا كىتابى جارىق كوردى, دەپ حابارلايدى قازاقپارات.
تاۋەلسىزدىكتىڭ 25 جىلدىعى اياسىندا جارىق كورگەن كىتاپتا قازاقستان كومپوزيتورلارىنىڭ اق جايىق وڭىرىنە ارنالعان تۋىندىلارى توپتاستىرىلعان. ەركىن نۇرىمبەتوۆتىڭ قازاق حالىق اسپاپتار وركەسترىنە لايىقتاپ, وڭدەپ تۇسىرگەن بۇل پارتيتۋرالار جيناعىن مۋزىكالىق وقۋ ورىندارىنىڭ وقىتۋشىلارى مەن شاكىرتتەرى, كاسىبي ديريجەرلار مەن وركەستر جەتەكشىلەرى وقۋ قۇرالى رەتىندە پايدالانا الادى. وعان قوسا CD-ديسكىلەرگە اق جايىق پەن اسەم ورالعا ارنالعان ءان-كۇيلەر جازىلعان. جيناق اتاقتى كومپوزيتور, قازاقستاننىڭ جانە قىرعىزستاننىڭ ەڭبەك سىڭىرگەن قايراتكەرى, حالىقارالىق جامبىل اتىنداعى سىيلىقتىڭ لاۋرەاتى يليا جاقانوۆتىڭ ەركىن نۇرىمبەتوۆ تۋرالى جازعان «ديريجەر اۋەزىنىڭ پاليتراسى» اتتى ليريكالىق ەسسەسىمەن اشىلعان.
كىتاپقا نۇرعيسا تىلەنديەۆ, ءابىلاحات ەسپاەۆ, يليا جاقانوۆ, بازارباي جۇمانيازوۆ, مانسۇر ساعاتوۆ, ءاشىر مولداعايىنوۆ, ەسكەندىر حاسانعاليەۆ سىندى تانىمال كومپوزيتورلاردىڭ اندەرى پارتيتۋتالارىمەن, اۆتورلارىنىڭ ومىرباياندارىمەن قوسا بەرىلگەن.
«بۇل كىتاپتى تاۋەلسىزدىكتىڭ تورقالى تويىنا ارنادىم. ونداعى شىعارمالاردىڭ ءبارى دە وتانشىلدىق رۋحتا جازىلعان, تۋعان جەر, اتامەكەندى دارىپتەپ, قاستەرلەۋگە جەتەلەيدى», – دەيدى ەركىن نۇرىمبەتوۆ.
ايتا كەتەيىك, قىزىلوردا قالاسىندا 1973 جىلى تۋعان ەركىن نۇرىمبەتوۆ - قۇرمانعازى اتىنداعى قازاق ۇلتتىق كونسەرۆاتورياسىنىڭ تۇلەگى. 1992-2001 جىلدارى قۇرمانعازى اتىنداعى اكادەميالىق قازاق حالىق اسپاپتار وركەسترىنىڭ قۇرامىندا قىزمەت ەتىپ, تاجىريبە جيناقتادى.
2001 جىلدان ع.قۇرمانعاليەۆ اتىنداعى باتىس قازاقستان وبلىستىق فيلارمونياسىندا ەڭبەك ەتىپ كەلەدى. 2011 جىلدان بەرى داۋلەتكەرەي اتىنداعى قازاق حالىق اسپاپتار وركەسترىنىڭ كوركەمدىك جەتەكشىسى ءارى باس ديريجەرى. ديريجەر جانە كومپوزيتور رەتىندە كوپتەگەن رەسپۋبليكالىق بايقاۋلاردىڭ لاۋرەاتى. جۋىردا قر تاۋەلسىزدىگىنىڭ 25 جىلدىعىنا وراي «قۇرمەت» وردەنىمەن ماراپاتتالدى.