ورتالىق سايلاۋ كوميسسياسىنىڭ جاڭادان سايلانعان پارلامەنت سەناتىنىڭ دەپۋتاتتارىن تىركەۋىنە بايلانىستى پالاتا دەپۋتاتتارىنىڭ جينالىسى بولدى, دەپ حابارلادى پارلامەنت سەناتىنىڭ ءباسپاسوز قىزمەتى.
جينالىستى اشا كەلىپ سەنات توراعاسى قايرات ءمامي بيىلعى 19 تامىزداعى سايلاۋ ناتيجەلەرى بويىنشا ەلىمىزدىڭ ورتالىق سايلاۋ كوميسسياسى جاڭادان سايلانعان سەنات دەپۋتاتتارىن تىركەگەنىن جانە ەندى سايلانعان ارىپتەستەرى دەپۋتاتتىق وكىلەتتىكتەرىن جۇزەگە اسىرۋعا بار كۇش-جىگەرىن, ءبىلىمى مەن ءتاجىريبەلەرىن ارنايتىنىنا سەنىم ءبىلدىردى.
ق.ءمامي پارلامەنت قىزمەتىنە جانە ۇلتتىق زاڭنامانى قالىپتاستىرۋعا قوسقان قوماقتى ۇلەسى ءۇشىن ءوز وكىلەتتىكتەرىن اياقتاعان دەپۋتاتتارعا العىس ايتتى. توراعا سونداي-اق وزدەرىنىڭ ءمارتەبەلى مىندەتتەرىن تابىستى اتقارۋعا جاردەمدەسكەن ولاردىڭ جوعارى كاسىبي شەبەرلىگى مەن ىسكە دەگەن جاۋاپكەرشىلىگىن اتاپ ءوتتى.
ق.ءمامي ايتقانداي, ەلىمىزدىڭ جوعارى وكىلدى ورگانى وكىلەتتىگىن بەكىتكەن, كونستيتۋتسيانىڭ نەگىزىندە قۇرىلعان قوس پالاتالى پارلامەنت سەناتىنىڭ تۇڭعىش توراعاسى ومىربەك بايگەلديدىڭ ەڭبەگىن جۇرتشىلىق جوعارى باعالايدى. قوعام جانە مەملەكەت قايراتكەرى ءو.بايگەلدي توراعالىق ەتكەن كەزەڭدە سەنات تاۋەلسىز قازاقستاننىڭ دامۋى ءۇشىن اسا ماڭىزدى زاڭداردى قابىلدادى, ەگەمەن دامۋ جولىنا تۇسكەن العاشقى جىلداردا ۋاقىت تالاپ ەتكەن قۇقىقتىق ىرگەتاس قالىپتاستىرىلدى.
دەپۋتاتتىق وكىلەتتىگىن اياقتاعان ءنۇسىپجان نۇرمانبەتوۆتىڭ, تاسباي سيمامباەۆتىڭ, باقبەرگەن دوسمانبەتوۆتىڭ, ەدىلباي يمانقۇلوۆتىڭ, سەرىك اياعانوۆتىڭ, امانجول بولەكباەۆتىڭ, جاقاي نۇرعاليەۆتىڭ سەناتتا قىزمەت ەتكەن جىلدارداعى ەڭبەگىنە توقتالعان ق.ءمامي ولاردىڭ دەپۋتاتتىق مىندەتتەرى مەن ازاماتتىق پارىزىن ورىنداۋدا ونەگە بولعانىن اتاپ ءوتتى.
توراعانىڭ ايتۋىنشا, قازاقستان مەملەكەتتىلىگىن دامىتۋدا قۇقىقتىق ىرگەتاس قالىپتاستىرۋداعى اۋقىمدى رەفورمالاردى جۇزەگە اسىرۋ ءۇشىن زاڭنامالىق احۋال جاساۋداعى ولاردىڭ ەڭبەگى جاڭادان سايلانعان دەپۋتاتتارعا عانا ەمەس, كەلەشەك ۇرپاق ءۇشىن دە ۇلگى.
وكىلەتتىگىن اياقتاعان دەپۋتاتتارعا العىس حات پەن ەستەلىك سىيلىق تابىس ەتىلدى.