سوڭعى بەس جىلدا ERG ەۋرازيالىق توبى مەن وبلىس اكىمدىگى اراسىنداعى الەۋمەتتىك جوبالاردى جۇزەگە اسىرۋداعى ءوزارا مەموراندۋم اياسىندا وڭىردەگى سپورتتىڭ دامۋىنا 10 ملرد تەڭگە ينۆەستيتسيالانىپتى. جۋىردا اقسۋ قالاسىندا الىپ ءوندىرىس پەن جەرگىلىكتى بيلىكتىڭ بىرلەسكەن مەموراندۋمى بارىسىندا سپورت كەشەنى اشىلدى.
بۇعان دەيىن ERG ەۋرازيالىق توبى ءوز قاراجاتىنا اقسۋدا ءيمانجۇسىپ قۇتپان ۇلى اتىنداعى سپورت سارايىن تۇرعىزىپ, تۇرعىنداردى ءبىر قۋانتقان ەدى. ال ەكىنشى سىيلاعان قۋانىشتارى – جاڭا پايدالانۋعا بەرىلگەن جابىق حوككەي كورتى. ەۋرازيالىق توپ سپورت كەشەنىنىڭ قۇرىلىسىنا 70 ميلليون تەڭگە ءبولىپتى. مۇز ارەناسى 1,5 مىڭ شارشى مەتردى قۇرايدى.
قىس مەزگىلىندە مۇز ايدىنىندا قالا تۇرعىندارى وتباسىمەن كەلىپ, كونكي تەۋىپ, دەمالادى. جازدا جاساندى جابىندىدا سونداي-اق, بالالار جانە جەڭىل اتلەتيكامەن اينالىساتىن مۇمكىندىگى شەكتەۋلى جاندار جاتتىعادى. كەشەندە مۇز ايدىنىنان باسقا, حوككەيشىلەر بولمەلەرى, جاتتىقتىرۋشىلار مەن دارىگەرلەرگە ارنالعان كابينەتتەر بار, ىستىق جانە سۋىق سۋ, جىلۋ جۇيەسى ىسكە قوسىلعان. ءتۇرلى زاماناۋي جاتتىعۋ قۇرىلعىلارى, الاڭدار ورىن تەپكەن.
– قالامىزدا وسىنداي تاماشا حوككەي كورتىنىڭ اشىلۋى وتە قۋانىشتى, – دەيدى فەرروقورىتپا زاۋىتىنىڭ ديرەكتورى سەرگەي پروكوپەۆ. – ەندى ۇزىلمەس حوككەي ءداستۇرىن جالعاستىرۋعا مۇمكىندىك مول. سپورت جاستار, بالالار ءۇشىن, ۇلكەندەر ءۇشىن قاشاندا قاجەت.
ايتسا ايتقانداي, ريو وليمپياداسىنا قاتىسقان ەركىن كۇرەستەن حالىقارالىق دارەجەدەگى سپورت شەبەرى داۋلەت شابانباي اقسۋلىق. بيىل «دوستىق» ستاديونىندا تامىز ايىندا تاۋەلسىزدىكتىڭ 25 جىلدىعى قارساڭىندا ەلىمىزدىڭ كەن-مەتاللۋرگيا ونەركاسىپتەرى سپورتشىلارى اراسىندا ءحVىىى سپارتاكيادا ءوتتى. وعان 7 الىپ كاسىپورىن قاتىسىپ, 500-دەن اسا سپورتشىلار, قوناقتار كەلدى. جارىس فۋتبول, ءۇستەل تەننيسى, شاحمات, ۆولەيبول, باسكەتبول سەكىلدى بىرقاتار سپورتتىڭ ءتۇرلەرىنەن ءوتتى. ناتيجەسىندە, اقسۋ فەرروقورىتپا زاۋىتىنىڭ سپورتشىلار كومانداسى ءبىرىنشى ورىندى جەڭىپ الدى.
ال سپورت كەشەنى اشىلعان كۇنى تاۋەلسىزدىكتىڭ 25 جىلدىعى قۇرمەتىنە وراي حوككەيشى بالالار كومانداسىنا قۇنى 1 ميلليون تەڭگە تۇراتىن شايبالى حوككەي سەرتيفيكاتى تابىس ەتىلدى.
فاريدا بىقاي,
«ەگەمەن قازاقستان»
پاۆلودار وبلىسى,
اقسۋ قالاسى