ەۋرازيالىق ەكونوميكالىق كوميسسيا (ەەك) القاسى «قازاقستان رەسپۋبليكاسىندا ينفلياتسيا دەڭگەيىن (تۇتىنۋشى باعالارىنىڭ يندەكسىن) تومەندەتۋگە باعىتتالعان شارالار بويىنشا ەۋرازيالىق ەكونوميكالىق كوميسسيا ۇسىنىستارى تۋرالى» ۇسىنىس قابىلدادى, دەپ حابارلايدى strategy2050.kz.
ەەك-تە بۇل مۇشە ەل ءۇشىن ەۋرازيالىق ەكونوميكالىق وداقتاعى (ەاەو) ماكروەكونوميكالىق تۇراقتىلىقتى قامتاماسىز ەتۋ ماقساتىندا كوميسسيا دايىنداعان ەكىنشى قۇجات ەكەنى حابارلاندى. ۇسىنىم قازاقستاننىڭ ەاەو تۋرالى شارتتا ايقىندالعان ينفلياتسيا دەڭگەيى كورسەتكىشىنىڭ ساندىق مانىنەن اسۋىنا بايلانىستى ازىرلەنگەن. ول بيىلعى جىلدىڭ ءبىرىنشى توقسانىندا - 115,7 %, ەكىنشى توقسانىندا - 117,3 % جانە ءۇشىنشى توقسانىندا 116,6 % قۇرادى.
كوميسسيا ەكونوميكالىق جاعدايدى جاقسارتۋ جونىندەگى قازاقستان قابىلداعان ۇلتتىق شارالاردى قولداي وتىرا, رەسپۋبليكاعا تۇتىنۋ باعالارىنىڭ ءوسۋىن تومەندەتۋ بويىنشا شارالار كەشەنىن ىسكە اسىرۋدى ۇسىندى.
كوميسسيانىڭ ۇسىنىستارىن ىسكە اسىرۋ ورتاشا مەرزىمدى پەرسپەكتيۆادا قازاقستان ەكونوميكاسىنىڭ يمپورتقا تاۋەلدىلىگىن تومەندەتۋگە ىقپال ەتەدى. بۇل ەلىمىزدە تۇتىنۋشى قورجىنىندا يمپورتتىڭ جوعارى ۇلەسىنە يە سالالاردا باسەكەگە قابىلەتتى ءونىم ءوندىرىسىن دامىتۋ ەسەبىنەن ورىن الادى.
ناتيجەسىندە قازاقستاننىڭ سىرتقى اسەرلەرگە ماكروەكونوميكالىق توزىمدىلىگى ارتادى, ينفلياتسيا تومەندەيدى.
ەەك-تە ەاەو ەلدەرى ەكونوميكالىق دامۋدىڭ تۇراقتىلىعىن انىقتايتىن كورسەتكىشتەر اياسىندا ماكروەكونوميكالىق ساياسات جۇرگىزۋى ءتيىس ەكەنى ءتۇسىندىرىلدى.
2016 جىلعى 15 قاراشادا كوميسسيا القاسى «قىرعىز رەسپۋبليكاسىنىڭ مەملەكەتتىك باسقارۋ سەكتورىنىڭ بورىشىن ازايتۋعا باعىتتالعان شارالار بويىنشا ەۋرازيالىق ەكونوميكالىق كوميسسيا ۇسىنىستارى تۋرالى» ۇسىنىم قابىلدادى.