2016-2017 وقۋ جىلىندا ءبىلىم مازمۇنىن جاڭارتۋ شەڭبەرىندە استانانىڭ 70 مەكتەبىندە «روبوتوتەحنيكا» كۋرسى ەنگىزىلدى, دەپ حابارلايدى استانا قالاسى اكىمدىگىنىڭ ءباسپاسوز قىزمەتى.
اتالعان كۋرس ەلەكتيۆتى نەمەسە فاكۋلتاتيۆ كۋرس تۇرىندە وقۋ جوسپارىنىڭ ءۆارياتيۆتى بولىگى ەسەبىنەن ەنگىزىلدى.
«2017-2018 وقۋ جىلىنان باستاپ كۋرستى بارلىق وقۋشىلار مىندەتتى تۇردە وقيتىن ينۆاريانتى قۇرامداسقا اينالدىرۋ مۇمكىندىگى قاراستىرىلۋدا. قازىرگى ۋاقىتتا كۋرستى ينفورماتيكا ءپانىنىڭ مۇعالىمدەرى وتكىزەدى, الايدا بىرتىندەپ جاراتىلىستانۋ-ماتەماتيكالىق تسيكل پاندەرىنىڭ مۇعالىمدەرىنە بەرۋ جوسپارلانعان. جاز ماۋسىمىندا 158 ينفورماتيكا مۇعالىمى نازارباەۆ زياتكەرلىك مەكتەبىنىڭ بازاسىندا وقىتۋ كۋرستارىنان ءوتتى», – دەپ حابارلايدى باسقارماداعىلار.
قازىرگى ۋاقىتتا كۋرستىڭ تەوريالىق بولىگى وتكىزىلىپ جاتىر.
وقۋ پروتسەسىن ۇيىمداستىرۋ ساپاسىن ارتتىرۋ ءۇشىن مەكتەپتەردە ارنايى كابينەتتەر ءبولىپ, ولاردى روبوتوتەحنيكا ساباعىن وتكىزۋگە لايىقتاپ جاراقتاۋ جوسپارلانعان.