يزرايل پرەمەر-ءمينيسترى بينيامين نەتانياحۋ بارشا قازاقستاندىقتى ەل تاۋەلسىزدىگىنىڭ 25 جىلدىق مەرەيتويىمەن قۇتتىقتادى, دەپ حابارلايدى قازاقپارات. «قازاقستانعا ساپارمەن كەلگەن يزرايلدىك ءبىرىنشى پرەمەر-مينيستر بولۋ مۇمكىنشىلىگى مەن ءۇشىن زور باسىمدىق دەپ بىلەمىن. بۇل ساپارىم قازاقستاننىڭ 25 جىلدىق مەرەيتويىمەن تۇسپا-تۇس كەلىپ وتىر. سوندىقتان ءوز قۇتتىقتاۋىمدى جەتكىزسەم», - دەدى ول قر پرەزيدەنتى نۇرسۇلتان نازارباەۆپەن كەڭەيتىلگەن قۇرامداعى كەلىسسوزدەردەن كەيىنگى بىرلەسكەن مالىمدەمە بارىسىندا.
سونىمەن قاتار ول نۇرسۇلتان نازارباەۆ ساياساتىنىڭ كورەگەندىگىن باسا ايتىپ ءوتتى. «توڭىرەگىڭىزگە قاراساڭىز, جاڭا ۇلتتىڭ ورلەگەندىگىن كورەسىزدەر. مەن مۇنى جوعارى باعالايمىن جانە ءسىزدىڭ بولاشاققا دەگەن كوزقاراسىڭىزعا ءتانتىمىن. ءسىز شيكىزاتقا نەگىزدەلگەن ەكونوميكانى جاڭا ەكونوميكاعا كوشىرۋ جونىندە وتە دۇرىس ايتتىڭىز. ءبىز بۇل مىندەتتى بىرلەسىپ اتقارا الامىز دەپ ەسەپتەيمىز», - دەدى نەتانياحۋ قازاقستان پرەزيدەنتىنە قاراتا.
يزرايل ۇكىمەت باسشىسى گاز تابىلعانعا دەيىن ءوز ەلىندە تابيعي رەسۋرستاردىڭ كوپ بولماعاندىعىن ايتتى. «سىزدەر ءيزرايلدى ەنەرگەتيكا ەكسپورتتاۋمەن اينالىساتىن ەل رەتىندە ويلايتىن شىعارسىزدار. بىراق, وسى ۋاقىتقا دەيىن بىزگە كوپتەگەن زاتتاردى ەكسپورتتاۋمەن اينالىسۋعا تۋرا كەلدى. قازىرگى ۋاقىتتا ءبىزدىڭ جاعدايىمىز جاقسى, تابيعي رەسۋرستارىمىز دا, تەحنوگەندىك رەسۋرستارىمىز دا بار. مەنىڭشە, سىزدەردىڭ دە, ءبىزدىڭ دە ىستەۋگە تىرىسىپ جاتقانىمىزدى ۇيلەستىرۋ تاماشا بايلانىس بولا الار ەدى. بۇل ءبىزدىڭ ەكسپو-عا قاتىسۋعا نيەت تانىتۋىمىزدان-اق بايقالادى. بۇل رەتتە ءبىز وتە جەدەل شەشىم قابىلدادىق. ءبىز وسى جەردە بولعىمىز, سەرىكتەس بولعىمىز كەلەدى», - دەدى يزرايل ۇكىمەت باسشىسى.