قازاقستان مەن يزرايل اراسىنداعى كەلىسىم ناتيجەسىندە العاشقى زاۋىت قۇرىلىسى باستالادى. بۇل تۋرالى بۇگىن استانادا قازاقستان - يزرايل بيزنەس-فورۋمىندا قازاقستان-يزرايل بيلاتەرالدى ساۋدا-ونەركاسىپ پالاتاسىنىڭ توراعاسى ميحاەل روە مالىمدەدى.
«زاۋىتتان شىعاتىن بارلىق ءونىم قىتايعا ەكسپورتتالادى. ودان تۇسەتىن پايدا – 10 ميلليون دوللار. الماتى وبلىسىندا سالىناتىن زاۋىتتىڭ قۇرىلىسىنا ءيزرايلدىڭ تەحنولوگياسى, قازاقستاننىڭ شيكىزاتى قولدانىلادى. كاسىپورىنعا تارتىلاتىن ينۆەستيتسيانى قوس ەلدىڭ كاسىپكەرلەرى موينىنا الدى. بەس جىلعا قىتايدان تاپسىرىس بار. كاسىپورىن ازىق-ت ۇلىك ونىمدەرىن شىعارادى», دەدى ول. م.روە نىساننىڭ قىتاي قازاقستانعا قۇس ەتىن ەكسپورتتاۋعا قايتا رۇقسات بەرگەننەن كەيىن, ياعني 10-12 ايدان سوڭ رەسمي تۇردە اشىلاتىندىعىن اتاپ ءوتتى. زاۋىت قۇنى 5 ميلليون دوللاردى قۇرايدى. ال زاۋىتتان شىعاتىن ءونىمنىڭ ەكسپورتتىق قۇنى 10-15 ميلليون دوللار بولادى دەپ كۇتىلۋدە.
زاۋىتتىڭ قۇرىلىسى جونىندەگى مەموراندۋمعا «بازيس-ا» جشس مەن «BAL International LTD» كومپانياسى قول قويدى.
سوڭعى دەرەكتەرگە سايكەس, ەلىمىزدە يزرايلدىك سەرىكتەستەرمەن بىرىگىپ اقپاراتتىق-كوممۋنيكاتسيالىق تەحنولوگيالار سالاسىندا جالپى سوماسى 86,5 ملن اقش دوللارىنا 7 جاڭا جوبا ىسكە قوسىلعان. ولار – ەلەكتروندى قۇرىلعىلارعا ارنالعان باسپا پلاتالارىن ءوندىرۋ, «Bank Hapoalim» كوممەرتسيالىق ۇيىمىنىڭ قۇرىلۋى, الماتى وبلىسىندا جانە استانا قالاسىندا جىلىجاي كەشەندەرىنىڭ, سولتۇستىك قازاقستان وبلىسىندا برويلەر قۇس فابريكاسىنىڭ, ماڭعىستاۋ وبلىسىندا تەڭىز سۋىن تۇششىتۋ قوندىرعىسىنىڭ قۇرىلىستارى. ال قازىرگى تاڭدا قازاقستاندىق-يزرايلدىك كاسىپكەرلەر مەديتسينالىق ساقتاندىرۋ جەلىسىن جانە «ارحيمەدەس قازاقستان» مەديتسينالىق ورتالىقتار جەلىسىن قۇرۋ جوباسىن ىسكە اسىرۋدا.
قازاقستاندا يزرايلدىك كاپيتالدىڭ قاتىسۋىمەن 254 كاسىپورىن تىركەلگەن. ونىڭ 112-ءسى جۇمىس ىستەۋدە.
اسحات رايقۇل, "ەگەمەن قازاقستان".