ەۋرازيالىق ەكونوميكالىق وداقتاعى (ەاەو) ىقپالداستىق پروتسەسى بىرتىندەپ جۇرۋگە ءتيىس, وعان مۇشە مەملەكەتتەردىڭ قاتارىن كوبەيتۋدىڭ قاجەتتىلىگى جوق. ەۋرازيالىق دامۋ بانكىنىڭ باسقارما توراعاسى دميتري پانكين وسىلاي دەپ سانايدى. بۇل تۋرالى abctv.kz جازىپ وتىر.
«قالاي دا بولماسىن, تەز ارادا ەلدەر قاتارىن كوبەيتۋگە تىرىسىپ, قانداي دا ءبىر ساياسي ۋاعدالاستىقتارعا بارماۋ قاجەت. بالكىم بۇل تەلەارنا, ءباسپاسوز تۇرعىسىنان قاراعاندا ادەمى ەستىلەتىن شىعار. مىنە, جاڭا ەل قوسىلدى. تاماشا, بىرىڭعاي ۆاليۋتا قۇردىق دەگەن سىڭايلى... بىراق جار سالىپ ايتىپ, كەيىن ەكونوميكالىق ماسەلەلەر تۋىنداپ, قانداي دا ءبىر ەلدە ەكونوميكالىق داعدارىس تۋىنداعان كەزدە سالدارى اۋىر بولادى», – دەدى دميتري پانكين.
ونىڭ ايتۋىنشا, ازىرشە بىرىڭعاي ۆاليۋتا, ورتالىق بانك جانە ورتاق قارجى نارىعىن قۇرۋدىڭ قاجەتتىلىگى جوق دەگەنمەن دميتري پانكين قازىرگى تاڭدا ەاەو-عا ەنۋگە ناقتى جالعىز ۇمىتكەر تاجىكستان ەكەنىن تىلگە تيەك ەتتى. الايدا ەۋرازيالىق ەكونوميكالىق وداق كەلىسسوزدەر بارىسىن جەدەلدەتۋگە اسىقپايدى.
«ولار سارالاپ جاتىر. ءبىراز ۋاقىتتان بەرى قارالۋدا, بىراق ەشكىم قانداي دا ءبىر قادام جاساعان جوق. تاجىكستانعا جەڭىلدىكتەر بەرىپ, ول قاتارىمىزعا قوسىلسىن دەمەيدى. ويتكەنى قاتارىمىزدى كوبەيتۋ ماقساتى جوق. ماڭىزدىسى – بارلىق ىشكى پروتسەستەردى ءتۇزىپ, ىشكى نارىقتار بويىنشا كەلىسىمگە كەلۋ قاجەت», – دەپ اتاپ ءوتتى ول.