كەشە اقوردادا ەلباسى نۇرسۇلتان نازارباەۆ ەلىمىزدىڭ الەۋمەتتىك-ەكونوميكالىق جانە مادەني دامۋىنا, حالىقتار اراسىنداعى دوستىق پەن ىنتىماقتاستىقتى نىعايتۋعا قوسقان ەلەۋلى ۇلەسى جانە بەلسەندى قوعامدىق قىزمەتى ءۇشىن ءبىر توپ ازاماتقا مەملەكەتتىك ناگرادالار تاپسىردى. ولاردىڭ قاتارىندا ءوندىرىس, بيزنەس, ءبىلىم بەرۋ, دەنساۋلىق ساقتاۋ سالالارىنىڭ كورنەكتى وكىلدەرى, اسكەري قىزمەتشىلەر, قۇقىق قورعاۋ ورگاندارىنىڭ قىزمەتكەرلەرى, سپورتشىلار, عىلىم جانە مادەنيەت قايراتكەرلەرى بار.
سالتاناتتى شارادا پرەزيدەنت نۇرسۇلتان نازارباەۆ ءبىرىنشى كەزەكتە جۇرتشىلىقتى تاۋەلسىزدىكتىڭ 25 جىلدىق مەرەكەسىمەن قۇتتىقتاي كەلىپ, اتالعان ماراپاتتاۋ شارا-
سىنىڭ ماڭىزدىلىعىنا توقتالدى.
– بارشاڭىزدى الدا كەلە جاتقان ەلىمىزدىڭ تاۋەلسىزدىك كۇنى مەرەكەسىمەن شىن جۇرەكتەن قۇتتىقتايمىن. بۇل – قازاق ەلىنىڭ جاھانعا تانىلعان, بارلىق يگىلىگىمىزدىڭ باستاۋى بولعان ەڭ باستى مەرەكەمىز. سىزدەر وسىنداي ايتۋلى كۇن قارساڭىندا جوعارى ماراپاتقا يە بولىپ وتىرسىزدار. بۇل – جەكە ازاماتتار ارقىلى بارشا حالقىمىزدىڭ ىستەگەن ەرەن ەڭبەگىنە دەگەن باعا. كەز كەلگەن ەل ءوزىنىڭ ەرەن ونەرىمەن, مايەكتى مادەنيەتىمەن ەرەكشەلەنەدى. بۇل رەتتە تالانتتى تۋىندى تۇتاس ۇلتتىڭ رۋحاني قازىناسىن بايىتا تۇسەدى. وسىعان وراي بۇگىن ادەبيەت پەن ونەر سالاسىنداعى مەملەكەتتىك سىيلىقتاردى دا تاپسىرعالى تۇرمىز. اقوردانىڭ تورىنە جينالعان بارشاڭىز ءۇشىن بۇل ەرەكشە مەرەيلى ءسات دەپ بىلەمىن. قۋانىشتارىڭىز قۇتتى بولسىن! – دەدى ەلباسى.
ودان ءارى مەملەكەت باسشىسى ەل تاۋەلسىزدىگى باستى قۇندىلىعىمىز ەكەنىن ايتا كەلىپ, ماراپات يەلەرىنىڭ ەل دامۋىنداعى ەڭبەگىنە نازار اۋداردى.
– ارداقتى اعايىن, تاۋەلسىزدىك كەز كەلگەن ەلدىڭ باعا جەتپەيتىن ەڭ قاستەرلى قۇندىلىعى بولىپ تابىلادى. ءبىز – ازاتتىقتىڭ ارقاسىندا ايىمىز وڭىنان تۋىپ, تورتكۇل دۇنيەگە تۇگەل تانىلعان حالىقپىز. شيرەك عاسىردا ەل ەسىندە قالاتىن ۇلان-عايىر ىستەر اتقاردىق. وسى جىلدارداعى بارلىق جەتىستىكتەر ءاربىر قازاقستاندىقتىڭ ەرەن ەڭبەگىنىڭ ناتيجەسى بولىپ تابىلادى. سونىڭ ىشىندە بۇگىنگى ماراپات يەلەرىنىڭ ارقايسىسىنىڭ قوسقان ۇلەسى زور. سىزدەر ونەگەلى ىستەرىڭىزبەن وزگەلەرگە ۇلگى بولىپ, كوپشىلىك قۇرمەتىنە بولەنىپ جۇرسىزدەر. ءوز ەڭبەكتەرىڭىزبەن ەلىمىزگە بەدەلدى ازاماتتار بولدىڭىزدار. ءوز سالاسىندا ەرەكشە تابىسقا جەتىپ جۇرگەن ازاماتتار ەڭ جوعارى ناگراداعا لايىقتى دەپ سانادىق, – دەدى قازاقستان پرەزيدەنتى.
سونىمەن قاتار, مەملەكەت باسشىسى بيىلعى مەملەكەتتىك ناگرادالارمەن ماراپاتتاۋ سالتاناتىنىڭ وزىندىك ەرەكشە ماڭىزى بار ەكەنىن, بۇل شارانىڭ ەلىمىزدىڭ ەڭ ۇلىق مەرەكەسى – تاۋەلسىزدىكتىڭ 25 جىلدىعىنىڭ اياسىندا ءوتىپ وتىرعانىن جەتكىزدى. سونداي-اق, ەلباسى تاۋەلسىزدىكتىڭ شيرەك عاسىرىندا ءوزىنىڭ ەڭبەگىمەن, بەلسەندى قىزمەتىمەن ەلىمىزگە, قوعامىمىزعا تانىلىپ, مەملەكەتتىك ناگرادالارعا يە بولعان وتانداستارىمىزدىڭ تۇتاستاي شوقجۇلدىزى پايدا بولعانىن, ولاردىڭ ەل ماقتانىشىنا اينالعانىن اتاپ كورسەتتى.
بۇدان كەيىن مەملەكەتتىك ناگرادالاردى تاپسىرۋ راسىمىنە كەزەك بەرىلدى.
سونىمەن, شارا بارىسىندا تومەندەگى ازاماتتار ماراپاتتالدى.
قازاقستان رەسپۋبليكاسى ەكونوميكالىق, الەۋمەتتىك-گۋمانيتارلىق دامىتۋداعى اسا ۇزدىك جەتىستىكتەرى ءۇشىن «قازاقستاننىڭ ەڭبەك ەرى» اتاعى «ۇلتتىق نەيروحيرۋرگيا ورتالىعى» اق باسقارما توراعاسى س.ق.اقشولاقوۆ پەن قوستاناي وبلىسى قاراسۋ اۋدانى «قاراسۋ» سوك» جشس باس ديرەكتورى ا.ج.تۇرسىنوۆقا تاپسىرىلدى.
ال مەملەكەتتىك جانە قوعامدىق قىزمەتتە سىڭىرگەن ەڭبەگى, ەلدىڭ الەۋمەتتىك-ەكونوميكالىق جانە مادەني دامۋىنا, حالىقتار اراسىنداعى دوستىق پەن ىنتىماقتاستىقتى نىعايتۋعا قوسقان ۇلەسى ءۇشىن ءى دارەجەلى «بارىس» وردەنىمەن – پرەزيدەنت اكىمشىلىگىنىڭ باسشىسى ءا.ر.جاقسىبەكوۆ ءجانە جوعارعى سوتتىڭ توراعاسى ق.ءا.ءمامي, ءىى دارەجەلى «بارىس» وردەنىمەن – «ۇلتتىق شتاتتىق كوماندالار جانە سپورت رەزەرۆى ديرەكتسياسى» رمقك نۇسقاۋشى-سپورتشىسى ز.ر.گابيدۋللينا, «قازاقستان رەسپۋبليكاسى ۇلتتىق عىلىم اكادەمياسى» رقب پرەزيدەنتى م.جۇرىنوۆ, ۇلتتىق قاۋىپسىزدىك كوميتەتىنىڭ توراعاسى ك.ق.ءماسىموۆ, قازاقستان رەسپۋبليكاسىنىڭ رەسەي فەدەراتسياسىنداعى توتەنشە جانە وكىلەتتى ەلشىسى م.م.ءتاجين, پرەزيدەنت جانىنداعى مەملەكەتتىك باسقارۋ اكادەمياسىنىڭ مەملەكەتتىك جانە جەرگىلىكتى باسقارۋ ينستيتۋتىنىڭ ديرەكتورى ز.ل.فەدوتوۆا, قازاقستان پرەزيدەنتى ءىس باسقارۋشىسىنىڭ ءبىرىنشى ورىنباسارى د.ق.ىڭكارباەۆ, ءىىى دارەجەلى «بارىس» وردەنىمەن – كومپوزيتور ا.قورازباەۆ, «نۇر وتان» پارتياسى توراعاسىنىڭ ءبىرىنشى ورىنباسارى م.ا.قۇل-مۇحاممەد, وڭتۇستىك قازاقستان وبلىسى «ساۋتس ويل» جشس پرەزيدەنتى س.سەيىتجانوۆ, «قازاقستان حالىق بانكى» اق باسقارما ءتورايىمى ءۇ.ب.شاياحمەتوۆا ماراپاتتالدى.
سونداي-اق, «پاراسات» وردەنىن – قازاق ۇلتتىق حورەوگرافيا اكادەمياسىنىڭ رەكتورى ا.ءا.اسىلمۇراتوۆا, قاراعاندى وبلىسىنىڭ اكىمى ن.ق.ابدىبەكوۆ, دەنساۋلىق ساقتاۋ جانە الەۋمەتتىك دامۋ ءمينيسترى ت.ب.دۇيسەنوۆا, استانا قالاسىنىڭ اكىمى ءا.ءو.يسەكەشەۆ, مادەنيەت جانە سپورت ءمينيسترى ا.مۇحامەدي ۇلى, اتىراۋ وبلىسىنىڭ اكىمى ن.ا.نوعاەۆ جانە «قازاقستان كامەراتاسى» كلاسسيكالىق مۋزىكا ءانسامبلىنىڭ ديرەكتورى گ.ق.مىرزابەكوۆا يەلەندى.
بۇعان قوسا, ءى دارەجەلى «دوستىق» وردەنى – كونستيتۋتسيالىق كەڭەستىڭ توراعاسى ي.ي.روگوۆقا, ءىى دارەجەلى «دوستىق» وردەنى – «تاڭ» تاتار-باشقۇرت ەتنومادەني بىرلەستىگىنىڭ توراعاسى ر.گ.ۆاليەۆكە, «قۇرمەت» وردەنى – «ۇلتتىق شتاتتىق كوماندالار جانە سپورت رەزەرۆى ديرەكتسياسى» رمقك نۇسقاۋشى-سپورتشىسى ر.ز.قويشىباەۆاعا تاپسىرىلدى.
سونداي-اق, ءىىى دارەجەلى «ەڭبەك داڭقى» وردەنىمەن – «كازارماپروم» جشس سلەسارى م.س.احمەتسافين, «كازتسينك» جشس وسكەمەن مەتاللۋرگيا كەشەنىنىڭ بالقىتۋشىسى ب.م.بايبوسىنوۆ, «جامبىل تسەمەنت ءوندىرىستىك كومپانياسى» جشس ماشينيسى ە.ب.شەۆياكوۆ, «قازاقستاننىڭ ەڭبەك سىڭىرگەن قايراتكەرى» قۇرمەتتى اتاعىمەن – «استانا وپەرا» مەملەكەتتىك وپەرا جانە بالەت تەاترىنىڭ جەتەكشى بالەت ءسوليسى ءا.ب.بەكەتاەۆا, ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترىنىڭ ءارتىسى ا.ب.بەرمۇحامبەتوۆا ماراپاتتالدى.
بۇدان كەيىن اسكەري جانە قىزمەتتىك بورىشىن ۇلگىلى اتقارعانى, زاڭدىلىق پەن قۇقىقتىق ءتارتىپتى قامتاماسىز ەتۋدە كورسەتكەن ەرلىگى ءۇشىن ءى دارەجەلى «داڭق» وردەنى – ىشكى ىستەر ءمينيسترىنىڭ ورىنباسارى ە.تۇرعىمباەۆ پەن قارۋلى كۇشتەر باس شتابى باستىعىنىڭ ورىنباسارى ءا.ق.حالىقوۆقا, ءىى دارەجەلى «داڭق» وردەنى – ۇلتتىق قاۋىپسىزدىك كوميتەتى توراعاسىنىڭ ورىنباسارى س.س.ءابىش پەن ۇلتتىق قاۋىپسىزدىك كوميتەتى توراعاسىنىڭ ورىنباسارى – «ارىستان» قىزمەتىنىڭ باستىعى ءا.ت.سادىقۇلوۆقا, ءى دارەجەلى «ايبىن» وردەنى – مەملەكەتتىك كۇزەت قىزمەتىنىڭ اپپارات باسشىسى ءا.ءا.ءجۇسىپوۆكە, ءىى دارەجەلى «ايبىن» وردەنى – قورعانىس مينيسترلىگى 10216 ءاسكەري ءبولىمىنىڭ كومانديرى ت.ج.ءاجىباەۆقا, ءىىى دارەجەلى «ايبىن» وردەنى – ۇلتتىق ۇلان «باتىس» ءوڭىرلىك قولباسشىلىعى 6655 اسكەري ءبولىمىنىڭ ساربازى ب.ق.قايىربەكوۆ پەن ىشكى ىستەر مينيسترلىگى الماتى قالاسى مامانداندىرىلعان كۇزەت قىزمەتى باسقارماسىنىڭ پوليتسەيى ن.ا.قارتباەۆقا, «قۇرمەت» وردەنى قورعانىس مينيسترلىگى اۆياتسيالىق وقۋ ورتالىعىنىڭ ىزدەۋ-قۇتقارۋ جانە پاراشيۋتتىك-دەسانتتىق قىزمەتىنىڭ باستىعى ا.ءا.قاراتابانوۆقا بەرىلدى.
جيىننىڭ بۇدان كەيىنگى بولىگى 2016 جىلعى ادەبيەت پەن ونەر سالاسىنداعى مەملەكەتتىك سىيلىقتى تاپسىرۋ راسىمىنە ۇلاستى.
سالتاناتتى شارا بارىسىندا مەملەكەت باسشىسى ۇستىمىزدەگى جىلى مەملەكەتتىك سىيلىق جونىندەگى كوميسسيا 4 تۋىندىنى ىرىكتەپ العاندىعىن اتاپ ءوتتى.
– جوعارى ماراپاتقا ەلوردامىزداعى «ماڭگىلىك ەل» مونۋمەنتىنىڭ اۆتورلارى لايىق دەپ تانىلدى. بىزدە, ەلوردامىزدا مۇنداي عيماراتتار از ەمەس. دەگەنمەن, «ماڭگىلىك ەل» – ماعىناسى جاعىنان دا, كوركەمدىك جاعىنان دا وزىمىزگە دە, باسقالارعا دا بەلگىلى بولىپ كەلە جاتقان عيمارات. مۇنى تاۋەلسىز ەلىمىزدىڭ مارتەبەسىن ساۋلەت ونەرى ارقىلى ءساتتى ايشىقتايتىن تۋىندى دەپ سانايمىز, – دەدى نۇرسۇلتان نازارباەۆ. ناقتىلاي ايتقاندا, مەملەكەتتىك سىيلىق «ماڭگىلىك ەل» مونۋمەنتى ءۇشىن اۆتورلار ۇجىمى – ي.ن.تاسماعامبەتوۆكە, س.س.جانبولاتوۆقا, م.ا.مانسۇروۆقا, ن.ا.دالبايعا بەرىلدى. كەلەسى مەملەكەتتىك سىيلىق «قۇنانباي» ءفيلمىن ءتۇسىرگەن شىعارماشىلىق توپقا – د.ق.جولجاقسىنوۆقا, ر.وديناەۆقا, ا.ج.بەكتەمىرگە, ن.ر.سالىقوۆاعا تاپسىرىلدى.
بۇل ورايدا ەلباسى كينودا ۇلى ابايدىڭ اكەسى قۇنانباي تاعدىرى ارقىلى حالىق ءومىرىنىڭ كۇردەلى كەزەڭى بەينەلەنگەنىن جەتكىزدى. مەملەكەت باسشىسى تاعى ءبىر مەملەكەتتىك سىيلىقتى بەلگىلى جازۋشى بەكسۇلتان نۇرجەكەەۆكە «ءاي, دۇنيە-اي» رومانى ءۇشىن تابىستادى. قازاقستان پرەزيدەنتى بۇل شىعارما ەلىمىزدىڭ تاۋەلسىزدىككە دەيىنگى 75 جىل تاريحىن قامتيتىنىن, 1916 جىلعى ۇلت-ازاتتىق كوتەرىلىس كەزىندە جەتىسۋ ءوڭىرى حالقى باسىنان وتكىزگەن قيلى كەزەڭ روماننىڭ وزەگىنە اينالعانىن اتاپ كورسەتتى.
قازاقستان پرەزيدەنتى كەلەسى مەملەكەتتىك سىيلىقتى قازاقستان رەسپۋبليكاسى تاۋەلسىزدىگىنىڭ 25 جىلدىعىنا ارنالعان «تاۋەلسىزدىككە تارتۋ» جۇمىستار تسيكلى ءۇشىن سۋرەتشى كاميل مۋللاشەۆقا تاپسىردى.
سوڭىندا ەلباسى نۇرسۇلتان نازارباەۆ ماراپات يەلەرىن تاعى دا قۇتتىقتاپ, ولارعا ەڭبەكتە تابىستى بولا بەرۋلەرىن تىلەدى.
جولدىباي بازار,
«ەگەمەن قازاقستان»
سۋرەتتەر پرەزيدەنتتىڭ ءباسپاسوز
قىزمەتىنەن الىندى