نۇرسۇلتان نازارباەۆتىڭ اتىنا قازاقستان رەسپۋبليكاسى تاۋەلسىزدىگىنىڭ 25 جىلدىعىنا وراي شەت مەملەكەتتەر باسشىلارىنان قۇتتىقتاۋلار كەلىپ تۇسۋدە, دەپ حابارلادى پرەزيدەنتتىڭ ءباسپاسوز قىزمەتى.
تۇرىكمەنستان پرەزيدەنتى گۋربانگۋلى بەردىمۇحامەدوۆ تۇرىكمەن حالقىنىڭ جانە جەكە ءوزىنىڭ اتىنان مەملەكەت باسشىسىن جانە بارشا
باۋىرلاس قازاقستان حالقىن تاۋەلسىزدىك مەرەيتويىمەن قۇتتىقتادى.
«ءسىزدىڭ ەلدىڭ تاۋەلسىزدىك جىلدارىندا ساياسي, ەكونوميكالىق جانە الەۋمەتتىك سالالاردا قول جەتكىزگەن تابىستارىن, سونداي-اق, ەلدەرىمىز اراسىندا قالىپتاسقان جان-جاقتى قارىم-قاتىناستىڭ دامۋ دەڭگەيىنىڭ جوعارى ەكەنىن ايتا كەلىپ, ءبىز ءوزارا قۇرمەت پەن سەنىم قاعيداتتارىنا نەگىزدەلگەن مەملەكەتارالىق ۇنقاتىسۋدى ودان ءارى ءوربىتۋ مەن نىعايتۋداعى ەلدەرىمىزدىڭ اينىماس ۇستانىمى ەكى حالىقتىڭ مۇددەسىنە تولىق ساي كەلەتىنىنە نىق سەنىمدىمىز», – دەلىنگەن جەدەلحاتتا.
بۇدان بولەك, جاپونيا يمپەراتورى اكيحيتو ءبىزدىڭ رەسپۋبليكا ازاماتتارىن مەرەيتويمەن قۇتتىقتاپ, قازاقستان حالقىنىڭ ودان ءارى ءوسىپ-وركەندەۋىنە نيەتتەستىك ءبىلدىردى جانە باق-بەرەكە تىلەدى.