قازاقستان رەسپۋبليكاسى پرەزيدەنتىنىڭ № 387 جارلىعىنا تۇسىندىرمە

قازاقستان رەسپۋبليكاسى پرەزيدەنتىنىڭ جارلىعى قازاقستان رەسپۋبليكاسىنداعى باس بوستاندىعىنان ايىرۋ ورىندارىنان بوساتىلعان جانە پروباتسيا قىزمەتىندە ەسەپتە تۇرعان ازاماتتاردى الەۋمەتتىك وڭالتۋدىڭ 2017-2019 جىلدارعا ارنالعان كەشەندى ستراتەگياسىن بەكىتۋ تۋرالى باس بوستاندىعىنان ايىرۋ ورىندارىنان بوساتىلعان جانە پروباتسيا قىزمەتىندە ەسەپتە تۇرعان ازاماتتاردى الەۋمەتتىك وڭالتۋدىڭ ءتيىمدى كەشەندى جۇيەسىن قالىپتاستىرۋ ماقساتىندا قاۋلى ەتەمىن: 1. قازاقستان رەسپۋبليكاسىنداعى باس بوستاندىعىنان ايىرۋ ورىندارىنان بوساتىلعان جانە پروباتسيا قىزمەتىندە ەسەپتە تۇرعان ازاماتتاردى الەۋمەتتىك وڭالتۋدىڭ 2017-2019 جىلدارعا ارنالعان كەشەندى ستراتەگياسى (بۇدان ءارى – كەشەندى ستراتەگيا) بەكىتىلسىن. 2. قازاقستان رەسپۋبليكاسىنىڭ ۇكىمەتى ورتالىق مەملەكەتتىك ورگاندارمەن جانە جەرگىلىكتى اتقارۋشى ورگاندارمەن بىرلەسىپ: 1) 2016 جىلعى 31 جەلتوقسانعا دەيىن كەشەندى ستراتەگيانى ىسكە اسىرۋ جونىندەگى ءىس-شارالار جوسپارىن ازىرلەسىن جانە بەكىتسىن; 2) وسى جارلىقتان تۋىندايتىن وزگە دە شارالاردى قابىلداسىن. 3. وسى جارلىقتىڭ ورىندالۋىن باقىلاۋ قازاقستان رەسپۋبليكاسى پرەزيدەنتىنىڭ اكىمشىلىگىنە جۇكتەلسىن. 4. وسى جارلىق قول قويىلعان كۇنىنەن باستاپ قولدانىسقا ەنگىزىلەدى جانە رەسمي جاريالانۋعا ءتيىس. قازاقستان رەسپۋبليكاسىنىڭ پرەزيدەنتى  ن.نازارباەۆ استانا, اقوردا, 2016 جىلعى 8 جەلتوقسان  № 387

«قازاقستان رەسپۋبليكاسىندا باس بوستاندىعىنان ايىرۋ ورىندارىنان بوساتىلعان جانە پروباتسيا قىزمەتىندە ەسەپتە تۇرعان ازاماتتاردى الەۋمەتتىك وڭالتۋدىڭ 2017-2019 جىلدارعا ارنالعان كەشەندى ستراتەگياسىن بەكىتۋ تۋرالى» قازاقستان رەسپۋبليكاسى پرەزيدەنتىنىڭ 2016 جىلعى 8 جەلتوقسانداعى №387 جارلىعىنا   تۇسىندىرمە

جارلىق 100 ناقتى قادام – ۇلت جوسپارىنىڭ 33-قادامىن ىسكە اسىرۋ ماقساتىندا ازىرلەندى. كەشەندى ستراتەگيانىڭ ماقساتى – باس بوستاندىعىنان ايىرۋ ورىندارىنان بوساتىلعان جانە پروباتسيا قىزمەتىندە ەسەپتە تۇرعان ادامداردى كەشەندى الەۋمەتكە قوسۋدىڭ ۇلتتىق جۇيەسىن قۇرۋ, ونى ءتيىمدى ىسكە اسىرۋ ءۇشىن قايتالاپ قىلمىس جاساۋ دەڭگەيىن ازايتۋعا ىقپال ەتەتىن جاعدايلار جاساۋ بولىپ تابىلادى. كەشەندى ستراتەگيانىڭ نەگىزگى مىندەتتەرى بولىپ: 1) الەۋمەتكە قوسۋدىڭ ۇيىمداستىرۋشىلىق نەگىزدەرىن جانە نورماتيۆتىك قۇقىقتىق بازانى جەتىلدىرۋ; 2) باس بوستاندىعىنان ايىرۋ ورىندارىنان بوساتىلعان جانە پروباتسيا قىزمەتىندە ەسەپتە تۇرعان ازاماتتاردى الەۋمەتكە قوسۋ پروتسەسىن جاقسارتۋ ءۇشىن جاعدايلار جاساۋ; 3) الەۋمەتتىك سۇيەمەلدەۋ جۇيەسىن قۇرۋ ارقىلى سوتتالعانداردى الەۋمەتتىك بەيىمدەۋ تەتىگىن جەتىلدىرۋ; 4) كادر الەۋەتىن جانە الەۋمەتكە قوسۋ پروتسەسىنىڭ عىلىمي نەگىزدەرىن دامىتۋ بولىپ تابىلادى. كەشەندى ستراتەگيا ەرەجەلەرىن ىسكە اسىرۋ كەزەڭ-كەزەڭمەن جۇزەگە اسىرىلادى جانە قازاقستان رەسپۋبليكاسىنىڭ ۇكىمەتى بەكىتەتىن ءىس-شارالار جوسپارىمەن قامتاماسىز ەتىلەدى. جوسپاردى ىسكە اسىرۋ بويىنشا مەملەكەتتىك ورگاندار قىزمەتىنىڭ اشىقتىعى قول جەتكىزىلگەن ناتيجەلەر تۋرالى قوعامدىق پىكىردى مونيتورينگتەۋ ناتيجەلەرىن ەسەپكە الۋمەن, ولاردىڭ ءىس-شارالاردى ورىنداۋ بارىسى تۋرالى اشىق ەسەپتىلىكپەن قامتاماسىز ەتىلەدى. قازاقستان رەسپۋبليكاسى پرەزيدەنتى اكىمشىلىگىنىڭ قۇقىق قورعاۋ جۇيەسى ءبولىمى