پارلامەنت سەناتىنىڭ توراعاسى قاسىم-جومارت توقاەۆ «پارلامەنتشىلەر يادرولىق قارۋدى تاراتپاۋ جانە جويۋ جولىندا» (PNND) حالىقارالىق ۇيىمىنىڭ جاھاندىق ۇيلەستىرۋشىسى الان ۆارەنى قابىلدادى, دەپ حابارلادى پارلامەنت سەناتىنىڭ ءباسپاسوز قىزمەتى.
توراعا «يادرولىق قارۋسىز الەم قۇرۋ» حالىقارالىق كونفەرەنتسياسىن تابىستى وتكىزۋگە قوسقان قوماقتى ۇلەسى ءۇشىن پارلامەنتتىك ۇيىمعا العىس ايتتى. سەمەي يادرولىق پوليگونى جابىلۋىنىڭ 25 جىلدىعىنا ارنالعان فورۋم بيىلعى 29 تامىزدا استانادا وتكەن بولاتىن.
ا.ۆارە تامىز كونفەرەنتسياسىنىڭ قاتىسۋشىلارى قابىلداعان «استانا كوزقاراسى: راديواكتيۆتى تۇنەكتەن يادرولىق قارۋسىز الەمگە قادام» دەكلاراتسياسىن بۇۇ جانە باسقا حالىقارالىق ۇيىمداردا تانىستىرىلعانى تۋرالى حاباردار ەتتى. ۇيلەستىرۋشىنىڭ ايتۋىنشا, حالىقارالىق قوعامداستىق قارۋسىزدانۋ جانە ونى تاراتپاۋ سالاسىنداعى قازاقستان پرەزيدەنتى نۇرسۇلتان نازارباەۆتىڭ كوشباسشىلىعى مەن سىندارلى ۇسىنىستارىن اتاپ وتۋدە. PNND قازاقستاننىڭ, ونىڭ ىشىندە ەلىمىزدىڭ بۇۇ قاۋىپسىزدىك كەڭەسىنە مۇشە بولعان كەزەڭدەگى ساياساتىن جان-جاقتى قولداۋدى جالعاستىرا بەرۋگە نيەتتەنىپ وتىر.