جۇرتشىلىق ماناش قوزىباەۆ اتىنداعى سولتۇستىك قازاقستان مەملەكەتتىك ۋنيۆەرسيتەتىندە ەلباسى جايلى تىڭ ماعلۇماتتارمەن جان-جاقتى تانىسا الادى. « ۇلى دالا – تاۋەلسىزدىكتىڭ 25 نەگىزى» جۇلدىزدى 25 كۇن اكتسياسى اياسىندا مۇندا تۇڭعىش پرەزيدەنت زالى ەسىگىن ايقارا اشتى.
پروفەسسور-وقىتۋشىلار, ستۋدەنت-جاستار, ارداگەرلەر وكىلدەرى قاتىسقان سالتاناتتى شارادا جوعارى وقۋ ورنىنىڭ پرورەكتورى مۇكارام تايجانوۆا مەملەكەت باسشىنىڭ ومىرىنە, مەملەكەتتىك قىزمەتىنە قاتىستى تانىمدىق دەرەكتەر مولىنان قامتىلعانىن جەتكىزدى. كىتاپحانا ديرەكتورى ءباتيما جامەنوۆانىڭ ايتۋىنشا, زالدا تاۋەلسىزدىگىمىزدەن سىر شەرتەتىن تاريحي قۇجاتتار, ەلباسىنىڭ قىزىلجار وڭىرىنە كەلگەن ساپارلارىنان تۇسىرىلگەن دەرەكتى فيلمدەر, ەستەن كەتپەس قىزعىلىقتى كەزدەسۋلەر جيناقتالعان. ۋنيۆەرسيتەتتىڭ جەكە قورىنان الىنعان ماتەريالدار اراسىندا ءتۇرلى سۋرەتتەردەن قۇراستىرىلعان البومنىڭ ورنى بولەك. بۇدان تىسقارى دەرەكتى فيلمدەردى تەلەديدار ارقىلى تاماشالاۋعا دا مۇمكىندىك تۋدىرىلعان.
جيىن بارىسىندا تۇڭعىش پرەزيدەنت قورىنىڭ ستيپەندياتتارىنا سەرتيفيكاتتار تابىس ەتىلدى. مۇنداي مارتەبەگە ون ستۋدەنت يە بولدى. سولاردىڭ ءبىرى نيازبەك ۇكەنوۆ اقپاراتتىق تەحنولوگيالار فاكۋلتەتىنىڭ ءتورتىنشى كۋرسىندا وقيدى. وقۋ وزاتى قوعامدىق جۇمىستارعا بەلسەنە قاتىسادى. پرەزيدەنت اقىسىنان بولەك شاكىرتاقى دا الادى. ونىڭ ارمانى – جاقسى مامان بولۋ.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى