الماتىدا XXVIII دۇنيەجۇزىلىك قىسقى ۋنيۆەرسيادانىڭ باستالاتىن ۋاقىتى بىرتە-بىرتە جاقىنداپ كەلەدى. وسىعان وراي وعان قاتىساتىن سپورتشىلاردىڭ دا, جارىستى قابىلداۋشى نىسانداردىڭ دا دايىندىقتارى قىزا تۇسۋدە.
قازاقستان سپورتشىلارى قىسقى ستۋدەنتتىك ويىندارعا دەربەس ەلدىڭ كومانداسى ساپىندا قاتىسۋدى 1993 جىلدان باستادى. وسى جىلى ءبىزدىڭ ەلىمىزدە ستۋدەنتتەر سپورتى فەدەراتسياسى قۇرىلدى. وسى جىلى كوماندا حالىقارالىق ارەنادا ءبىرىنشى رەت جارىس جولىنا شىقتى. بۇل پولياكتىڭ زاكوپانە قالاسىندا جالاۋ جەلبىرەتكەن ۋنيۆەرسيادامەن تۇسپا-تۇس كەلدى. وندا رەسپۋبليكا حوككەيشىلەرى وزدەرىنىڭ ءبىرىنشى جارىسىندا-اق كۇمىس مەدالدىڭ يەگەرلەرى اتاندى. ولار جولاي كەزدەسكەن قارسىلاستارىنىڭ بارىنەن ءوتىپ, فينالدا كانادا قۇراماسىمەن كەزدەستى.
سودان بەرگى جىلداردا قازاقستان دەلەگاتسياسى 12 قىسقى ۋنيۆەرسياداعا بارىپ قايتتى. ءبىزدىڭ سپورتشىلارىمىز سول سايىستاردا 32 مەدال جەڭىپ السا, ولاردىڭ 12-ءسى التىن, 7-ءى كۇمىس جانە 13-ءى قولا مەدال بولدى. سونىڭ ىشىندە ۇلتتىق كوماندامىز 2005 جىلى اۆستريانىڭ ينسبرۋك قالاسىندا قانات جايعان ويىنداردا تابىستى ونەر كورسەتتى. وسى ۋنيۆەرسيادادا قازاقستاندىقتار 4 التىن, 1 كۇمىس جانە 2 قولا مەدال جەڭىپ الدى. 2013 جىلى يتاليانىڭ ترەنتينو شاھارىندا كورىك قىزدىرعان ستۋدەنتتەر ويىنىنان دا قورجىنىمىز تولىپ قايتتى. مۇندا قازاقستاندىقتار 2 التىن, 2 كۇمىس جانە 1 قولا مەدالعا قول سوزدى.
ال بۇدان كەيىنگى ۋنيۆەرسيادانىڭ تاريحتا ءبىرىنشى رەت ەكى ەلدە ءبولىنىپ وتكىزىلگەنى بەلگىلى. وسىلايشا 2015 جىلى ول الدىمەن سلوۆاكيانىڭ شتربسكە-پلەسو جانە وسربلە ەلدى مەكەندەرىندە مارەدەن شىقسا, سوڭى يسپاننىڭ گرانادا قونىسىندا مارەگە جەتتى. ناتيجەسىندە ءبىزدىڭ ستۋدەنت-سپورتشىلار 5 التىن, 6 كۇمىس مەدالدىڭ يەگەرلەرى اتانىپ, جالپى ەسەپتە رەسەي جانە وڭتۇستىك كورەيا ساڭلاقتارىنان كەيىنگى ءۇشىنشى ورىنعا تابان تىرەدى.
ءبىزدىڭ سپورتشىلار اراسىنان شاڭعىشى اناستاسيا سلونوۆا ەرلەدى. ول ويىنداردا 2 التىن, 2 كۇمىس مەدالعا قول جەتكىزدى. التىن جۇلدەنى سونداي-اق, بياتلونشى الينا رايكوۆا, فريستايلشىلار يۋليا گالىشەۆا مەن پاۆەل كولماكوۆ كوماندا قورجىنىنا سالدى.
ال الداعى ۋنيۆەرسيادادا ءبىزدىڭ ءوز سپورتشىلارىمىزدان كۇتەتىن ءۇمىتىمىز بۇدان دا كوپ.