ءبىز بۇعان دەيىن ۇلتتىق ۇلاننىڭ «وڭتۇستىك» وڭىرلىك قولباسشىلىعىنا قاراستى 5571 اسكەري بولىمىندە ۋنيۆەرسيادا كەزىندە قوعامدىق ءتارتىپ پەن قاۋىپسىزدىكتى قامتاماسىز ەتەتىن كەلىسىمشارت نەگىزىندە ابىلاي حان اتىنداعى قازاق حالىقارالىق قاتىناستار جانە الەم تىلدەرى ۋنيۆەرسيتەتىنىڭ وقىتۋشىلارى اعىلشىن تىلىنەن كۋرستار وتكىزىپ جاتقانىن حابارلاعانبىز.
ەندى 2017 جىلعى ححVIII دۇنيەجۇزىلىك قىسقى ۋنيۆەرسيادا كەزىندە قىزمەت كورسەتەتىن مەديتسينالىق ماماندار مەن توتەنشە جاعدايلار دەپارتامەنتى قىزمەتكەرلەرىنىڭ ەكىنشى توبى الماتىدا اعىلشىن ءتىلى كۋرسىنان ءوتتى. قالانىڭ مەديتسينالىق قىزمەت كورسەتۋ سالاسىنداعى 83 قىزمەتكەرى جانە تجد-نىڭ 33 وكىلى بازالىق اعىلشىن ءتىلى كۋرسىن تامامداعانى جونىندە سەرتيفيكات الدى.
ۇستىمىزدەگى جىلدىڭ قىركۇيەك پەن جەلتوقسان ايلارى ارالىعىندا الماتى قالاسىنىڭ مەديتسينالىق ماماندارى جانە تجد قىزمەتكەرلەرى اعىلشىن ءتىلى گرامماتيكاسىن ۇيرەنىپ, اۋىزشا سويلەۋ داعدىلارىن يگەردى. اتالعان كۋرس مەديتسينالىق نەمەسە باسقا دا كومەك تۇرلەرىن كورسەتۋ قاجەت بولعان جاعدايدا, شەتەلدىك قوناقتارمەن, ۋنيۆەرسيادا قاتىسۋشىلارىمەن ەمىن-ەركىن تىلدەسۋگە مۇمكىندىك بەرمەك.
وقىتۋ كۋرستارى اباي اتىنداعى قازاق ۇلتتىق پەداگوگيكالىق ۋنيۆەرسيتەتى جانە قازاق مەملەكەتتىك قىزدار پەداگوگيكالىق ۋنيۆەرسيتەتىنىڭ بازاسىندا وتكىزىلدى.
– ءبىزدىڭ ۋنيۆەرسيتەتتىڭ 10 وقىتۋشىسى الماتى قالاسى مەديتسينالىق قىزمەتكەرلەرىنە اعىلشىن ءتىلىن ۇيرەتتى. وقىتۋ اياسىندا ءتۇرلى باعىتتارعا ارنالعان بازالىق لەكسيكانى عانا ەمەس, سونداي-اق, مادەنيەتارالىق قارىم-قاتىناس نەگىزدەرىن ۇيرەتەتىن باعدارلاما دايىندالدى. كۋرس تىڭداۋشىلارىنىڭ ءبىلىمى ايتارلىقتاي جەتىلگەنىن بايقاپ وتىرمىز. ءوز كەزەگىندە بۇل ءبىلىم ولارعا ۋنيۆەرسيادا قاتىسۋشىلارىمەن جانە قوناقتارمەن لايىقتى دەڭگەيدە ءتىلدەسىپ, قىزمەت كورسەتۋگە كومەكتەسەتىن بولادى, – دەدى اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ وقىتۋشىسى جانار كۇلەكەنوۆا.
ۇستىمىزدەگى جىلدىڭ قىركۇيەگىندە 2017 جىلعى ححVIII دۇنيەجۇزىلىك قىسقى ۋنيۆەرسيادا كەزىندە قىزمەت كورسەتەتىن 120-دان اسا مەديتسينالىق قىزمەتكەرگە اعىلشىن ءتىلى كۋرستارىن تابىستى تۇردە تامامداعانى جونىندە سەرتيفيكاتتار تابىستالدى.
الداعى كۇندەرى الماتىدا وتەتىن قىسقى ۋنيۆەرسياداعا 30 مىڭعا تارتا شەتەلدىك تۋريستەر كەلەدى دەپ بولجانىپ وتىر.
ايناش ەسالي,
«ەگەمەن قازاقستان»
الماتى