13 جەلتوقسان كۇنى قىزىلوردادا جالپى سانى 820 پاتەردى قۇرايتىن كوپقاباتتى 16 تۇرعىن ءۇي ەل يگىلىگىنە بەرىلدى. قىزىلوردا وبلىسىنىڭ اكىمى قىرىمبەك كوشەرباەۆ جانە قر ۇلتتىق ەكونوميكا ۆيتسە-ءمينيسترى ايدار ءارىپحانوۆ جاڭا قونىس يەلەرىن قازاقستان رەسپۋبليكاسى تاۋەلسىزدىگىنىڭ 25 جىلدىعىمەن جانە باسپانالى بولۋلارىمەن قۇتتىقتادى.
- حالىقتى تۇرعىن ۇيمەن قامتاماسىز ەتۋ ماسەلەسى مەملەكەت ءۇشىن قاشان دا كۇردەلى باعىتتاردىڭ ءبىرى بولدى. بۇل ورايدا سىر ەلىندە ۇلگى ەتەرلىك ىرگەلى ىستەر بارشىلىق. سوڭعى جىلدارداعى تولايىم تابىستارىمىزدىڭ ءبىرى – وبلىس ورتالىعىندا تۇرعىن ءۇي قۇرىلىسى قارقىن الدى. مىسالى, وبلىس بويىنشا 2004 جىلى 92 مىڭ شارشى مەتر تۇرعىن ءۇي پايدالانۋعا بەرىلسە, بۇل كورسەتكىش قازىرگى تاڭدا 5,5 ەسەگە ءوسىپ, 500 مىڭ شارشى مەترگە جەتتى. وتكەن جىلى وبلىستا قۇرىلىس كولەمى 3,5 ەسەگە ءوستى, ال قىزىلوردا قالاسىندا 8 ەسەگە ارتتى. بيىلدىڭ وزىندە 80 كوپقاباتتى تۇرعىن ءۇيدىڭ قۇرىلىسى جۇرگىزىلۋدە. سوڭعى 3 جىلدا تەك قىزىلوردادا جاڭادان 11 شاعىن اۋدان بوي كوتەرىپ, 7 مىڭعا جۋىق وتباسى جاڭا پاتەرگە يە بولدى. بيىلعى جىلى دا ءبىز تۇرعىن ءۇي قۇرىلىسى قارقىنىن ارتتىرۋ ماقساتىندا «سامۇرىق-قازىنا» جىلجىمايتىن م ۇلىك قورى, «قازاقستان يپوتەكالىق كومپانياسى», «بايتەرەك» ۇلتتىق باسقارۋشى حولدينگى» اكتسيونەرلىك قوعامى جانە «تۇرعىنۇيقۇرىلىسجيناقبانكىمەن» قويان-قولتىق جۇمىس جاساۋدامىز. سوعان ساي كەلەسى جىلى دا بيىلدان كەم ەمەس كولەمدە قۇرىلىس قارقىنى ساقتالادى. بىلتىر ەلباسىنىڭ قاتىسۋىمەن وسى مولتەك اۋداندا 10 تۇرعىن ءۇي پايدالانۋعا بەرىلگەن بولاتىن. مىنە, بۇگىن سول تۇرعىنداردىڭ قاتارى جاڭا كورشىلەرمەن تولىعىپ, 16 كوپقاباتتى تۇرعىن ءۇيدى حالىق يگىلىگىنە تاپسىرعالى تۇرمىز. جاڭا باسپانا ءار وتباسىنا ساتتىلىك اكەلىپ, شاڭىراقتارىڭىزدا تەك ءسابيدىڭ كۇلكىسى ەستىلسىن,- دەپ وبلىس اكىمى قىرىمبەك كوشەرباەۆ ءوز لەبىزىن ءبىلدىردى.
«نۇر وردا» مولتەك اۋدانىنداعى بۇل ۇيلەر «نۇرلى جول» مەملەكەتتىك باعدارلاماسى بويىنشا سالىندى. مولتەك اۋداندا كوپقاباتتى 20 ءۇيدىڭ قۇرىلىسى جۇرۋدە, ونىڭ 12-ءسى (600 پاتەر) «بايتەرەكدەۆەلوپمەنت» اق, ال 8-ءى (420 پاتەر) «قازاقستاننىڭتۇرعىنۇيقۇرىلىسجيناقبانكى» اق مەن بىرلەسىپ جۇزەگە اسىرىلۋدا.
ايتا كەتۋ كەرەك, جەرگىلىكتى بيلىك تۇرعىنداردىڭ جەكە تۇرعىن ءۇي قۇرىلىسىن جۇرگىزۋلەرى ءۇشىن دە كومەك قولىن سوزۋدا. بيىل جاز ايىندا 6600 قىزىلوردالىق جەكە ءۇي سالۋ ءۇشىن قاجەتتى بارلىق ينجەنەرلىك-ينفراقۇرىلىمى تارتىلعان (سۋ, جارىق, گاز جانە اۆتوجول) 980 گەكتار اۋماقتى قامتيتىن جەر تەلىمدەرىن الدى. ال وتكەن سەنبىدە, 10 جەلتوقسان كۇنى قارماقشى اۋدانىنىڭ ورتالىعى جوسالى كەنتىندە ءوتىنىش بەرگەن 1380 تۇرعىن ينجەنەرلىك-ينفراقۇرىلىمى جۇرگىزىلگەن جەر تەلىمدەرىنە يە بولدى.