قوستانايدا سەيىت كەنجەاحمەتوۆكە ەسكەرتكىش تاقتا ءىلىندى

قوستانايدا بەلگىلى ساتيريك جازۋشى, ەتنوگراف سەيىت كەنجەاحمەتوۆ تۇرعان ۇيگە ەسكەرتكىش تاقتا ءىلىندى. وعان قوستاناي قالاسىنداعى زيالى قاۋىم وكىلدەرى, قالا باسشىلارى جانە سەيىت كەنجەاحمەتوۆتىڭ قالامداستارى مەن بالالارى, تۋعان-تۋىستارى كەلدى. تاقتانىڭ اشىلۋ سالتاناتىندا قوستاناي قالالىق اكىمىنىڭ ورىنباسارى بيبىگۇل اققوجينا, جازۋشى عۇمار احمەتچين, تاريح عىلىمدارىنىڭ دوكتورى امانجول كۇزەمباي ۇلى, جازۋشىنىڭ قىزى زامزاگۇل كەنجەاحمەتوۆا ءسوز سويلەپ, سەيىت اعانى ەسكە الدى, ونىڭ شىعارماشىلىعىن جوعارى باعالادى. بالالارى ەسكەرتكىش تاقتانىڭ ىلىنۋىنە باستاما كوتەرگەن اكەسىنىڭ زامانداستارى مەن قالالىق اكىمدىك قىزمەتكەرلەرىنە العىس ايتتى. «سەيىتپەن وبلىستىق «كوممۋنيزم تاڭى» گازەتىندە قاتار قىزمەت ىستەدىك. سەكەڭ ادەبيەتتىڭ ساتيرا جانرىندا عانا ەمەس, جۋرناليستيكادا, ەتنوگرافيا سالاسىندا كوپ مۇرا قالدىردى. ارتىنان ەرگەن شىعارماشىلىق جاستارعا ەرەكشە قامقورلىقپەن, ىلتيپاتپەن قارادى, ولاردىڭ ءار شاعىراماسىنا بالاشا  قۋاناتىن», دەپ عۇمار احمەتچين سەيىت كەنجەاحمەتوۆتىڭ وزىنە جازىپ بەرگەن ەستەلىك قولتاڭباسىن وقىپ بەردى. ەسكەرتكىش تاقتا اشىلعاننان كەيىن كاسىپكەر تولەگەن جايلاۋباەۆ قوستاناي قالالىق مەشىتىندە سەيىت كەنجەاحمەتوۆكە ارناپ اس بەرىپ, رۋحىنا قۇران باعىشتاتتى. ءنازيرا جارىمبەتوۆا, «ەگەمەن قازاقستان». قوستاناي