ەلىمىزدەگى قوعامدىق – ساياسي تۇراقتىلىقتى, تىنىشتىق پەن بىرلىكتى قامتاماسىز ەتۋدە «نۇر وتان» پارتياسىنىڭ ۇلەسى زور. سوندىقتان دا حالىق بۇل پارتياعا سەنەدى, ونىڭ باعدارلامالىق باعىتتارىن قولدايدى. سونىڭ ءبىر كورىنىسى پارتيا مۇشەلەرىنىڭ قاتارى جىل سايىن كوبەيە تۇسۋدە. جاقىندا «قر ءىىم تجك اقتوبە وبلىسى تجد جەدەل قۇتقارۋ جاساعى» مەملەكەتتىك مەكەمەسىنىڭ 25 قۇتقارۋشىسى ەل تاۋەلسىزدىگىنىڭ 25 جىلدىعى قارساڭىندا «نۇر وتان» پارتياسىنا ءوتىپ, مۇشەلىك بيلەتتەرىن سالتاناتتى جاعدايدا الدى.
پارتيا بيلەتتەرىن تاپسىرۋعا بايلانىستى سالتاناتتى جيىندى قىسقاشا ءسوز سويلەپ اشقان «جەدەل قۇتقارۋ جاساعى» مەملەكەتتىك مەكەمەسىنىڭ باسشىسى قاسىمجان بايساداقوۆ بيىلعى جىلدىڭ ايتۋلى تاريحي وقيعاسى - تاۋەلسىزدىكتىڭ 25 جىلدىعىنىڭ ەلىمىز اۋماعىندا كەڭ كولەمدە مەرەكەلەنۋى ەكەنىن اتاپ ءوتتى. ول شيرەك عاسىر ىشىندە قازاقستاندى الەم تانىعانىن تىلگە تيەك ەتە كەلىپ, قول جەتكەن جەتىستىكتەرىمىزدىڭ عاسىردا جۇزەگە اسىرىلاتىن جۇمىستارعا تەڭ ەكەنىن جەتكىزدى. وسى جىلداردا قۇتقارۋ قىزمەتىندە دە ىلگەرىلەۋشىلىك بولعانىنا ناقتى دەرەكتەر كەلتىردى.
سالتاناتتى راسىمدە ءسوز العان اقتوبە وبلىسى بويىنشا توتەنشە جاعدايلار دەپارتامەنتىنىڭ باستىعى, ازاماتتىق قورعاۋ پودپولكوۆنيگى باۋىرجان سىزدىقوۆ «نۇروتاندىقتار» قاتارىنا قوسىلىپ جاتقان قۇتقارۋشىلارعا پارتيا بيلەتتەرىن تاپسىرىپ, ادام ومىرىمەن تىعىز بايلانىستى جۇمىستارىندا تابىستار تىلەدى. پارتيا بيلەتىن الۋشىلار اتىنان قۇتقارۋشى ەرلان ورازعاليەۆ ءسوز الىپ, ءوزىنىڭ تاۋەلسىزدىكتىڭ 25 جىلدىعى قارساڭىندا ەلىمىزدىڭ جەتەكشى ساياسي ۇيىمى «نۇر وتان» پارتياسىنا ءوتىپ جاتقانىنا قۋانىشتى ەكەنىن جەتكىزدى. قازىر وسى 71 ادام ەڭبەك ەتەتىن ۇجىمداعى باستاۋىش پارتيا ۇيىمىندا 41 مۇشە بار.
ساتىبالدى ءساۋىرباي, «ەگەمەن قازاقستان».
اقتوبە.