ەلىمىز ءوزىنىڭ الەۋمەتتىك-ساياسي مودەلىنىڭ ينستيتۋتسيونالدىق ترانسفورماتسياسى كەزەڭىنە اياق باسىپ كەلەدى. جاڭا كونستيتۋتسيا جوباسى بۇل ءماتىننىڭ رەسمي جاڭارتىلۋى ەمەس, مەملەكەت پەن قوعام اراسىنداعى ءوزارا ارەكەتتەسۋ ەرەجەلەرىن قايتا قاراۋ ەكەنىن كورسەتەدى. ۇسىنىلعان نورمالار جاي عانا دەكلاراتسيالار ەمەس, مەملەكەتتىك باسقارۋ مەن قوعامنىڭ قاتىسۋ قاعيداتتارىن انىقتايتىن ءتيىمدى تەتىكتەر بولۋى كەرەك.
كونستيتۋتسيالىق رەفورما ءاربىر وتانداسىمىزدىڭ كۇندەلىكتى ومىرىنە تىكەلەي نەمەسە جاناما تۇردە اسەر ەتەدى, قۇقىقتاردىڭ, مىندەتتەردىڭ جانە قاتىسۋ مۇمكىندىكتەرىنىڭ شەڭبەرىن انىقتايدى.
الەۋمەتتانۋ تۇرعىسىنان العاندا, جاڭا جوبا ازاماتتىق قاتىسۋدى نىعايتۋ مەن كەرى بايلانىس ارنالارىن كەڭەيتۋ ءۇشىن جاڭارتىلعان نەگىز قالايدى دەپ بولجاۋعا بولادى. بۇل ءوز كەزەگىندە ساياسي ساۋاتتىلىق پەن ازاماتتىق بەلسەندىلىكتىڭ وسۋىنە ىقپال ەتە الادى.
بۇل تۇرعىدان العاندا حالىق كەڭەسى ينستيتۋتىن كونسۋلتاتيۆتىك جانە وكىلدىك فورۋم رەتىندە قۇرۋ ەرەكشە ماڭىزعا يە. ونىڭ مارتەبەسى كونستيتۋتسيا جوباسىندا بەكىتىلگەن, وندا ينستيتۋتقا بىرقاتار ناقتى وكىلەتتىكتەر بەرىلۋى كوزدەلگەن. ناقتىراق ايتقاندا, قازاقستان حالىق كەڭەسى – ىشكى مەملەكەتتىك ساياساتتىڭ نەگىزگى باعىتتارىن, قوعامدىق كەلىسىمدى, ۇلتتىق بىرلىك پەن ىنتىماقتاستىقتى نىعايتۋ, ەلدىڭ نەگىزگى قاعيداتتارى مەن ۇلتتىق قۇندىلىقتاردى ىلگەرىلەتۋ بويىنشا ۇسىنىستار مەن ۇسىنىمدار ازىرلەيدى, قۇرىلتايعا زاڭ جوبالارىن ەنگىزەدى, رەسپۋبليكالىق رەفەرەندۋم تاعايىنداۋ تۋرالى باستاما كوتەرەدى, كونستيتۋتسيالىق زاڭعا سايكەس باسقا دا وكىلەتتىكتەردى جۇزەگە اسىرادى. بۇل وكىلەتتىلىكتەر اياسى ينستيتۋتتىڭ فۋنكتسيونالدىق مارتەبەسىن رەسمي تۇردە كەڭەيتەدى جانە ونى كەڭەسشى ورگان شەگىنەن عانا شىعارادى.
قازاقستان حالىق كەڭەسىنىڭ قۇرامى ەل ازاماتتارىنان تۇرادى. ۇلتتىق قۇرىلتايدا جاريالانعانداي, ونىڭ قۇرامىنا 126 مۇشە كىرەدى, ياعني ەتنومادەني بىرلەستىكتەردەن, قوعامدىق ۇيىمدار مەن ايماقتاردان ء(ماسليحاتتار مەن قوعامدىق كەڭەستەر ارقىلى) 42 وكىلدەن الىنادى. بۇل قۇرىلىم قوعامدىق, ايماقتىق جانە ەتنومادەني وكىلدىكتىڭ تەپە-تەڭدىگىن بىلدىرەدى.
حالىق كەڭەسى مەملەكەت پەن وڭىرلەردىڭ وكىلدەرىن, كاسىبي قاۋىمداستىقتار مەن ەتنومادەني بىرلەستىكتەردى بىرىكتىرە وتىرىپ, ءتۇرلى قوعامدىق توپ اراسىنداعى ديالوگتى جۇيەلى نەگىزدە قالىپتاستىرۋعا باعىتتالادى. بۇل قۇرىلىم مۇددەلەردى ءبىلدىرۋ جانە الەۋمەتتىك ماڭىزى بار ماسەلەلەردى تالقىلاۋ ءۇشىن قوسىمشا الاڭ رەتىندە قىزمەت ەتەدى.
دەگەنمەن بۇل تەتىكتىڭ تيىمدىلىگى ونىڭ قۇرىلۋىنا عانا ەمەس, سونىمەن قاتار پروتسەدۋرالىق اشىقتىعىنا, شىنايى وكىلدىك دارەجەسىنە جانە شەشىمدەرگە پراكتيكالىق اسەرىنە دە بايلانىستى بولادى. قوعامنىڭ قاتىسۋى دا ماڭىزدى. نەگىزىنەن حالىق كەڭەسىنىڭ ناقتى ءرولىن ازاماتتىق قاتىسۋ دەڭگەيى, بەرىلگەن قاتىسۋ قۇرالدارىن پايدالانۋعا دايىندىق جانە ەلدە بولىپ جاتقان ۇدەرىستەر ءۇشىن جاۋاپكەرشىلىكتى ايقىندايدى.
جانار ناقىپباەۆا,
پرەزيدەنت جانىنداعى قسزي قوعامدىق پىكىردى زەرتتەۋ ءبولىمىنىڭ باس ساراپشىسى